აქედან 2 მალევე ქუთაისისა და ბათუმის საავადმყოფოებში გადაიყვანეს, ხოლო მანამდე 4 მძიმედ დაშავებული ასევე რეანომობილებით კატასტროფის ცენტრში მოათავსეს.
დაახლოებით ღამის პირველი საათისთვის, საპატრულო ეკიპაჟმა დასაკითხად წაიყვანა თურქული კომპანიის ავტობუსის მძღოლი ისმაელ ჰაკი. მისი მდგომარეობა ექიმებმა დამაკმაყოფილებლად შეაფასეს. ჰაკიმ საავადმყოფო კოჭლობით დატოვა. სწორედ ის არის ერთ-ერთი მთავარი მოწმე, რომელმაც იცის, თუ რამ გამოიწვია ავარია.
“თქვენ კი მიგყავთ ეს ადამიანები, მაგრამ მაგათი დაკითხვა ჩვენ რაში გვარგია? ფული აქვთ გადასახდელი, მე რუსული არ ვიცი. ექიმმა კი უთხრა, მაგრამ ვერ შეაგნებინა,” _ საავადმყოფოს რეგისტრატორი დახმარებას პატრულს თხოვდა.
როგორც გაირკვა, ერთ-ერთი სომეხი ეროვნების მგზავრს 43 ლარი უნდა გადაეხადა.
_ გადაიხდის, ქალბატონო, ან მაგათ დაზღვევა ექნებათ! _ გამოესარჩლნენ უცხოელ პაციენტს.
_ რად მინდა მაგის დაზღვევა, ჩვენ ხელშეკრულება არ გვაქვს გაფორმებული.
_ ჰო, მაგრამ იქნებ ფული არ აქვს? გაუფორმეთ ხელშეკრულება და შემდეგ გადაიხდის!
_ სად ვდიო მაგას, სომხეთიდან გამოაგზავნის? აქაა და არ იხდის!
_ დაზღვევა ნამდვილად ექნება!
_ მერე გადაიხადოს მაგან ფული, მივცემ ქვითარს და სადაზღვევო გადაუხდის!
მიუხედავად იმისა, რომ ბევრი ეცადნენ, პაციენტმა ფული არ გადაიხადა: _ საგანგებო მდგომარეობაა, რა ფული, რის ფული? _ ამბობდა იგი და ირწმუნებოდა, რომ ფული არ ჰქონდა, მაგრამ მას შემდეგ, რაც სასწრაფო სამედიცინო დახმარების მანქანით ბათუმში მისი გადაყვანა გახდა აუცილებელი, 100 დოლარი გამოაჩინა _ სასწრაფოთი პაციენტის ერთ კილომეტრზე გადაყვანის ფასი 2 ლარი ყოფილა!
“რა საგანგებო მდგომარეობა? ქართველებისთვის არ იყო საგანგებო, ფული რომ გადაიხადეს და ამისთვისაა?” _ უკმაყოფილო იყო მედპერსონალი, რომელიც წუხდა იმაზე, რომ “ექიმი გადაყვა პაციენტს, 2 ხელთათმანი დაეხა და მესამე ვერ ნახეს”(?!).
თუმცა, აქ მედიკოსებსაც ვერც გაამტყუნებ _ საავადმყოფოს მფლობელი კომპანია “ადიტტი” მათ კატეგორიულად თხოვს, პაციენტები თანხის გადაუხდელად არ გაუშვან, თავად მედპერსონალს კი ხელფასები მესამე თვეა არ მიუღიათ: “სამი თვეა, ხელფასი არ მიგვიღია. ივლისის თანხას ველოდებით ჯერ. ამდენი ხალხი რომ შეამცირეს, ახლა ხომ გამოჩნდა, რომ ლანჩხუთს მეტი სჭირდება?!” _ ერთმანეთს უზიარებდა გულისტკივილს სამედიცინო ცენტრის პერსონალი.
ჩვენთვის ცნობილი გახდა, რომ მიკროავტობუსის მძღოლი, რომელიც არა ოზურგეთელი, როგორც ეს ავარიის ადგილზე გავრცელდა, არამედ ბათუმელი ყოფილა. სამწუხაროდ, იგი ადგილზევე გარდაიცვალა. “მძღოლი ბიძაჩემია. მგზავრები მიჰყავდა ლილოში, მისაბმელიც მისი იყო. ამბობენ, რომ ტრაქტორს მორი გადმოუვარდა და ამას მოჰყვა ავარიაო. სხვა დეტალები არ ვიცი,” _ გვითხრა მიკროავტობუსის მძღოლის ახლობელმა.
ახალი ვერსია, რომელსაც, ჩვენი ინფორმაციით, პატრული ამუშავებს, შემდეგში მდგომარეობს: ჯერ საქმეში ოფიციალურად არ ფიგურირებს და ვერ ზუსტდება ტრაქტორის მონაწილეობა ავარიაში (შემთხვევის ადგილზე ტრაქტორი ნამდვილად არ ყოფილა, რაც წარმოშობს ვარაუდს, რომ მძღოლმა მისი გადამალვა მოახერხა), თუმცა, არის ვერსია, რომ შეშით დატვირთული მისაბმელიდან გადმოვარდა მორი, რამაც მოძრაობა შეუფერხა ავარიაში მონაწილე ტრანსპორტიდან მინიმუმ ერთს მაინც. ამ დროს “ფორდის” მარკის ავტომობილი ცდილობდა გადასწრებაზე გასვლას და იგი შემხვედრ ავტობუსს შეეჯახა, ხოლო მიკროავტობუსმა ავარიის თავიდან აცილების მცდელობის დროს წონასწორობა დაკარგა და ავტობუსთან შეჯახებისას გზის პირას გადავარდა, მისაბმელი მოწყდა და ისიც ასევე გზის პირას, ოღონდ მოშორებით ჩავარდა. რაც შეეხება გარდაცვლილთა რაოდენობას, 03.00 საათის მდგომარეობით, ეს ციფრი 11-ს უდრიდა: “უნდა გენახათ, რა ხდებოდა ადგილზე! ხალხი არხში იყო ჩაყრილი და იქ ვეძებდით, ზოგი ასფალტზე იწვა უსულოდ. ავარიის ადგილზე ერთდროულად სასწრაფო დახმარების რვა ბრიგადა ვმუშაობდით,” _ ამბობენ ექიმები.
ღამის 02.58 საათზე ლანჩხუთის საავადმყოფო ბოლოსწინა პაციენტმა დატოვა _ მიკროავტობუსის მგზავრი ქალბატონი ბათუმის საავადმყოფოში რეანომობილით გადაიყვანეს, რამდენიმე წუთით ადრე კი ავტობუსის მგზავრი სომეხი ეროვნების ქალბატონი ბათუმში წაიყვანეს, ოღონდ მისი მდგომარეობა რთული არ გახლდათ _ უბრალოდ, ცხვირიდან სისხლდენა მთლიანად ვერ შეუჩერეს და მისი გადაყვანა მხოლოდ იმის გამო გახდა საჭირო, რომ ლანჩხუთში ყელ-ყურ-ცხვირის ექიმი არ ჰყოლიათ. მიხეილ ჩაჩავას სახელობის ცენტრში მხოლოდ ერთი პაციენტი დარჩა _ მიკროავტობუსის მგზავრი მამაკაცი. “მიკროავტობუსში სულ 2 მგზავრი გადარჩა, როგორც ვიცი, ბიძაჩემს 12 მგზავრი გადაჰყავდა,” _ გვითხრა მიკროავტობუსის მძღოლის ახლობელმა.
შეგახსენებთ, რომ ანალოგიური ტრაგედია ლანჩხუთში რამდენიმე წლის წინათაც დატრიალდა: ქორწილიდან მიმავალი მაყრიონი ავარიაში მოხვდა და მიკროავტობუსში მსხდომი 14 ადამიანი დაიღუპა _ პატარძლის დეიდა, ბიძა, ბიცოლები, ბიძაშვილები, დეიდაშვილები და სხვა უახლოესი ნათესავები.
