ჩვენი ინფორმაციით, ტრაილერს ტრანზიტული ტვირთი _ ტყვიაგამძლე მინები და ალუმინი გადაჰქონდა. ავარიის შედეგად მხოლოდ მინების უმნიშვნელო ნაწილი დაზიანდა, ხოლო ალუმინი გადარჩა. როგორც ამბობენ, ავტოსაგზაო შემთხვევა გამოიწვია იმ ფაქტმა, რომ მძღოლს ჩაეძინა. ავტომობილს 23 წლის ახალგაზრდა მართავდა. ის მძიმედ არ დაშავებულა. იმის გამო, რომ ტვირთი ტრანზიტული გახლდათ, ფოთიდან ჩამოვიდნენ საბაჟო სამსახურის თანამშრომლები, რომლებმაც ჯერ დალუქეს გადასატანი ნივთები, შემდეგ კი გააკონტროლეს მისი სხვა ტრაილერში გადატანა. ავტოშემთხვევის გამო, მაგისტრალის კონკრეტულ მონაკვეთზე მოძრაობა რამდენიმე საათით შეჩერდა, რადგან ამწეს ფოთიდან ჩამოყვანას და მანქანის ამოყვანას, დაახლოებით, 5 საათი დასჭირდა.
შეგახსენებთ, რომ ერთი კვირის წინ, მაგისტრალის იმავე მონაკვეთზე ტრაგედია დატრიალდა _ ავტობუსისა, მინი-ვინისა და მიკროავტობუსის შეჯახებას ამ უკანასკნელში მჯდომი 8 ადამიანის სიცოცხლე ემსხვერპლა. როგორც გავარკვიეთ, მაშინაც ავტობუსს, რომელსაც თურქი მძღოლი მართავდა, მგზავრების გადაყვანასთან ერთად, ტრანზიტული ტვირთიც გადაჰქონდა და მისი დალუქვისა და აღწერის გამო, მაშინაც დაგვიანდა გზის გახსნა. რაც შეეხება ერთი კვირის წინანდელ ავარიაში დამნაშავედ ეჭვმიტანილ მძღოლს, ისიც თურქი ეროვნების გახლავთ და სამართალდამცველებმა საგზაო მოძრაობის წესების დარღვევისა და გადაჭარბებული სიჩქარით მოძრაობის გამო, ავარიის ღამესვე დააკავეს.
ჩვენთან საუბარში ლანჩხუთის მოსახლეობა აღშფოთებას გამოთქვამს თურქი მძღოლების მიერ მოძრაობის წესების ხშირი დარღვევის გამო. მათი თქმით, პატრული ზედმეტად ლოიალურია უცხოელი მძღოლების მიმართ, არადა, სწორედ ისინი ქმნიან განსაკუთრებულ ხიფათს, როცა სატვირთო და გადამზიდავი მანქანებით დასახლებულ ტერიტორიებზე მაღალი სიჩქარით მოძრაობენ. მთავარი მაგისტრალის ლანჩხუთის მონაკვეთზე წინა კვირაში მომხდარი ტრაგედიის გარდა, თურქი მძღოლების დაუდევრობით, რამდენიმე ადამიანი დაიღუპა. ყველაზე გახმაურებული გახლდათ შუხუთში მომხდარი ავარია, რომელმაც მასწავლებლის სიცოცხლე შეიწირა.
_ სანამ ამ თურქმა მძღოლებმა მთლად არ ამოგვჟლიტეს, ხმა უნდა ამოვიღოთ, თორემ პატრულის იმედზე ჩვენი მტერი იქნა _ ქართველებს უსაფრდებიან და უცხოელებს კი აჯეჯილებენ! ვანო მერაბიშვილთან მიმიწვდინეთ ხმა, რომ რამენაირად კონტროლი გაამკაცროს, ამხელა ტრაილერები რომ დახრიგინობენ ასეთი სიჩქარით, ქუჩაში ბავშვები ვერ გადმოგვიშვია. უაზროდ დადიან, ფეხებზე ჰკიდიათ, ისეთ გასწრებებს აკეთებენ, გადაირევი! ერთი საათით დადექით მაგისტრალის ნებისმიერ ადგილზე და ნახავთ, როგორ მოძრაობენ თურქი მძღოლები. მაგათი გამოისობით რამდენი ადამიანი დაიღუპა. ახლა იტყვიან, უცხოელებს მისდევენო, მაგრამ აბა სხვა ქვეყანაში ადგილობრივზე წინ ქართველს ვინმე დააყენებს? ღორებს ვერ იტანენ, მისდევენ გზაზე და ამით სულ ქმნიან საავარიო სიტუაციებს, _ ამბობს ჩვენი რესპონდენტი.
ჩვენ თავადაც გავხდით შემსწრე და “მონაწილე”, თუ როგორ გაეკიდა ღორს თურქი მძღოლი. მსუბუქი მანქანით მის საპირისპიროდ ვმოძრაობდით, როცა ვხედავდით, როგორ “დასდევდა” ტრაილერი შუა ხაზზე მოსიარულე ღორს. აშკარა იყო, მძღოლს მისი მოკვლა უნდოდა, “ღორთან თამაშში” გართულმა ჩვენ ვერ შეგვნიშნა და პირდაპირ წამოვიდა _ ავარია გარდაუვალი იყო, როგორღაც მოვახერხეთ წინა მხრიდან ტრაილერთან შეჯახების აცილება, თუმცა, მძღოლმა “მისია” შეასრულა _ ღორიც გაიტანა და გვერდითა მხრიდან შეჯახებით ჩვენც გზისპირა კვალში ამოგვატრიალა. მძღოლი მიმალვას ან მინიმუმ იმ ადგილიდან გასვლას ლამობდა, თუმცა მას ამის საშუალება არ მისცეს.
ყველა ზემონახსენებ შემთხვევაში, უცხოელი მძღოლები არ ისჯებოდნენ, წინა კვირაში მინი-ვინის მძღოლის დაკავება ამ კუთხით პირველი შემთხვევაა. აქვე იმასაც გეტყვით, რომ ხშირია ტრაილერის გადაბრუნების შემთხვევებიც, რომელთაგან გამოსარჩევია ერთი შემთხვევა _ ავტომობილს უნიტაზები გადაჰქონდა და პატრულის მოსვლამდე მოსახლეობამ ტრალიერიდან გადმოყრილი უნიტაზების ნაწილი დაიტაცა.
