ადგილობრივი თვითმმართველობის არჩევნების მეორე ტური 12 ივლისს გაიმართება. ცესკოს ეს გადაწყვეტილება „ნაციონალური მოძრაობამ“ კანონდარღვევად შეაფასა და სპეციალურად გამართულ ბრიფინგზე განცხადება გააკეთა.
"დარღვეულია ცენტრალური საარჩევნო კომისიის სხვადასხვა საკანონმდებლო ნორმა -169-ე პრიმა მუხლი, რომელიც ამბობს, რომ მათ არ ჰქონდათ უფლება არჩევნები დაენიშნათ გასაჩივრების ვადის ამოწურვამდე. დარღვეულია 77-ე მუხლიც, რომელიც აძლევს ოპოზიციურ ძალებს გასაჩივრების შესაძლებლობებს და ფაქტობრივად, ჩვენ მოგვესპო ეს შესაძლებლობა. ეს არის დარტყმა იმ ათ რაიონზე, სადაც ჩვენ მეორე ტურში ვმონაწილეობთ, ეს არის დარტყმა ქართულ დემოკრატიაზე, რადგან ეს ნიშნავს, რომ საქართველოში ნორმალური არჩევნები არ ტარდება", _ ნათქვამია განცხადებაში.
არჩევნების მეორე ტურის თარიღს გამოეხმაურა უმრავლესობის წარმომადგენელი ელისო ჩაფიძეც და განაცხადა, რომ არანაირ კანონდარღვევას არ აქვს ადგილი.
"კანონმდებლობის მიხედვით ოქმის შეჯამებიდან ორი კვირის ვადაში უნდა გაიმართოს მეორე ტური. ეს თარიღი ასევე მნიშვნელოვანია იმისთვის, რომ ქვეყანა ცხოვრების ნორმალურ რიტმს დაუბრუნდეს, გაიმართოს პარლამენტის სხდომები, რადგან ძალიან ბევრი კანონი გვაქვს მისაღები".
რას ფიქრობენ ამ საკითხზე არასაპარლამენტო ოპოზიციის წარმომადგენლები? „გურია ნიუსი“ რამდენიმე მათგანს დაუკავშირდა.
"ბურჯანაძე-ერთიანი ოპოზიციის" წარმომადგენელი კახა ძაგანია მიიჩნევს, რომ ცესკოს გადაწყვეტილება სამართლებრივი თვალსაზრისით კანონიერია.
"არჩევნების მეორე ტურის თარიღი – 12 ივლისი, რომელიც კენჭისყრით დაადგინა ცესკომ, სამართლებრივი თვალსაზრისით კანონიერია, რადგანაც ამის უფლება ჰქონდა ვადების თვალსაზრისით, თუმცა უკანონო, რადგანაც სასამართლო დავები არ დასრულებულა და საბოლოო შედეგები ცნობილი არ არის, ეს არის კანონის ხარვეზი. ამ შემთხვევაში უმრავლესობას აწყობს მეორე ტურის მალე ჩატარება, რადგან ეშინია, რომ მისი ამომრჩეველი არ გავიდეს ქალაქიდან, ხოლო "ნაციონალურ მოძრაობას" მეტი დრო სჭირდება საარჩევნო გადაჯგუფებისთვის", _ ამბობს ძაგანია.
"მერაბ კოსტავას საზოგადოების" თბილისის მერობის ყოფილი კანდიდატი, იურისტი გიორგი ლილუაშვილი კი მიიჩნევს, რომ საკამათო არაფერია და ყველა დაინტერესებულმა პირმა საარჩევნო კოდექსის 169-ე მუხლი უნდა გადაიკითხოს.
"საარჩევნო კოდექსში ნათლად არის გაწერილი განმეორებითი არჩევნების დანიშვნის წესი, კერძოდ საარჩევნო კოდექსის 169-ე მუხლის მეორე პუნქტი. მერის/გამგებლის არჩევნების მეორე ტურს ნიშნავს ცესკო შესაბამისი არჩევნების შედეგების შემაჯამებელი ოქმის გასაჩივრების ვადის ამოწურვიდან 3 დღის ვადაში, თუ ოქმი არ გასაჩივრდა, ხოლო ოქმის გასაჩივრების შემთხვევაში-სასამართლოს საბოლოო გადაწყვეტილების კანონიერ ძალაში შესვლიდან 3 დღის ვადაში, სასამართლოს გადაწყვეტილების გათვალისწინებით. არჩევნების მეორე ტური ტარდება ცესკოს მიერ მისი დანიშვნის შესახებ განკარგულების მიღებიდან არაუგვიანეს მე-14 დღისა. აქ საკამათო არაფერია, უბრალოდ კალენდარში უნდა ჩაიხედონ და გადათვალონ".
"ეროვნულ-რელიგიური ინსტიტუტის" ხელმძღვანელი ზვიად ტომარაძე კი „გურია ნიუსთან“ საუბარში აცხადებს:
"აქ კანონდარღვევაზე აპელირება უსაფუძვლოა, რადგან გასაჩივრებას განსაზღვრული ვადები გააჩნია და რეგულირდება საარჩევნო კოდექსის 77-ე მუხლით. "ნაციონალური მოძრაობის" ინტერესებში შედის მეორე ტურის მოგვიანებით გამართვა, რადგან წარმატების მინიმალური შანსი მხოლოდ იმ შემთხვევაში აქვთ, რაც მეტი თბილისელი გავა ქალაქიდან დასასვენებლად. აქედან გამომდინარე, ბუნებრივია, რომ 12 ივლისს არჩევნების მეორე ტურის ჩატარება მათ ინტერესებში არაა."
ანალიტიკოსი დემურ გიორხელიძე კი მცირე კომენტარით იფარგლება და ამბობს, რომ "ეს არასერიოზული თამაშები, არ აინტერესებს".
