“კიწმარიშვილის გარდაცვალება მუდმივი კითხვის ნიშნების მქონე რეზონანსულ საქმეებს მიემატება”

"საუბრობენ სისხლიან რევანშზე, რუსული მაფიის ხელწერაზე, 90-იანი წლების განუკითხაობის დაბრუნებაზე ქვეყანაში და ა.შ. სწორედ ამიტომ, ხელისუფლების ინტერესებშია, რომ ეს საქმე რაც შეიძლება მალე გამოიძიონ და საზოგადოებას მაქსიმალურად ამომწურავი პასუხები გაეცეს. თუმცა, სულ რომ ვიდეოჩანაწერი გაასაჯაროონ, სადაც მომხდარი ფაქტი იქნება ასახული, ეს საქმე მაინც იმ მუდმივი კითხვის ნიშნების მქონე რეზონანსულ საქმეებს მიემატება, რომლებზე პასუხებიც არ ჩანს ან რომლებზე პასუხებიც საზოგადოებისთვის არადამაჯერებელია“ , _ ასეთ შეფასებას აკეთებს  "რუსთავი 2“-ის დამფუძნებელ ეროსი კიწმარიშვილის გარდაცვალების ფაქტთან დაკავშირებით  ა/ო "პოლიტიკის და სამართლის ცენტრის“ ხელმძღვანელი,  ადვოკატი ამირან გიგუაშვილი.

სწორად დაიწყო თუ არა გამოძიება მთავარმა პროკურატურამ და რამდენად უკავშირდება ეროსი კიწმარიშვილის გარდაცვალების ფაქტი მის პოლიტიკურ საქმიანობას, – ამ და სხვა ვერსიებზე "გურია ნიუსი“ ამირან გიგუაშვილს ესაუბრა.

_ ეროსი კიწმარიშვილის ტრაგიკულ გარდაცვალებასთან დაკავშირებით გამოძიება თვითმკვლელობამდე მიყვანის მუხლით დაიწყო, რამაც საზოგადოებაში კითხვები გააჩინა. რამდენად მართებულად მიგაჩნიათ, გამოძიების მხრიდან, საქმისათვის თავიდანვე ასეთი კვალიფიკაციის მინიჭება, მით უფრო მაშინ, როდესაც ქვეყნის პრეზიდენტმა მომხდარს უკვე უწოდა “საზარელი მკვლელობა”?

_ მიმაჩნია, რომ ქვეყნის პრეზიდენტი არ არის იურისტი და შესაბამისად, მისი შეფასება არ შეიძლება კვალიფიციური ყოფილიყო. ეს უფრო საკითხისადმი მის სუბიექტურ დამოკიდებულებად შეიძლება ჩაითვალოს, თუმცა ყველა პოლიტიკოსმა და განსაკუთრებით მაღალი თანამდებობის პირებმა, თავი უნდა შეიკავონ სამართლებრივი შეფასებითი კატეგორიებით მსჯელობისგან. რაც შეეხება გამოძიების თვითმკვლელობამდე მიყვანის მუხლით აღძვრას, ეს არ არის გამონაკლისი და მაშინ, როდესაც ადამიანს, იზოლირებულ სივრცეში, მასზე გაფორმებული იარაღით ნახულობენ გარდაცვლილს, გამოძიება სტანდარტულად ამ მუხლით იწყება, თუმცა, ცხადია, ეს არ ნიშნავს, რომ საქმე ამ კვალიფიკაციით დასრულდება. მაშინვე, როდესაც რამე მტკიცებულება აღმოჩნდება, რომელიც თავდაპირველ ვერსიას გააქარწყლებს, პროკურორი ვალდებულია სამუშაო მუხლის გადაკვალიფიცირება მოახდინოს. ეს წმინდა სამართლებრივი პროცედურაა და ამას დიდი შერლოკ ჰოლმსობა არ სჭირდება.

_ ანუ, თქვენი აზრით, გამოძიება სწორად დაიწყო და შესაძლოა, ნამდვილად თვითმკვლელობა მომხდარიყო? ეროსი კიწმარიშვილის უახლოესი მეგობრები და თანამებრძოლები, ვინც მას წლების მანძილზე იცნობდნენ, კატეგორიულად გამორიცხავენ, რომ ასეთ აქტიურ და მიზანსწრაფულ ადამიანს, რომელსაც გრძელვადიანი გეგმები ჰქონდა, შეიძლება თავი მოეკლა.

_არც არაფრის გამორიცხვა შეიძლება და არც არაფრის დადასტურება. თქვენ მკითხეთ სწორად დაიწყო თუ არა გამოძიება,  როგორც იურისტი, ვფიქრობ,  რომ სწორად დაიწყო. რაც შეეხება იმას, შეეძლო თუ არა ეროსი კიწმარიშვილს თავი მოეკლა, ეს საკითხი იურისპრუდენციას ცდება, თუმცა, ვფიქრობ, რომ არა მხოლოდ ეროსი კიწმარიშვილს, არამედ თითოეულმა ჩვენგანმა შეიძლება გარკვეული გარემოებების არსებობისას ასეთი საბედისწერო ნაბიჯი გადადგას. მაგრამ რატომ ვსაუბრობთ თვითმკვლელობაზე და არა გაუფრთხილებლობაზე? როგორც პროკურატურამ განაცხადა სწორედ ამ დღეს გაუფორმებია გარდაცვლილს იარაღი საკუთარ სახელზე და მისი ახლო მეგობრის განცხადებით ძმისთვის დაბადების დღეზე აპირებდა ჩუქებას. ვფიქრობ, გამოძიებამ ეს ვერსიაც უნდა განიხილოს სხვა ყველა სამუშაო ვერსიასთან, მათ შორის თვითმკვლელობასა და მკვლელობასთან ერთად. აქ ჩასატარებელია მთელი რიგი პროცედურები, ექსპერტიზები, რომლებმაც უნდა გასცენ პასუხი კითხვებს, თითის ანაბეჭდებიდან დაწყებული, ტყვიის ტრაექტორიით და ავტომანქანაში მიკრონაწილაკების შესწავლით დამთავრებული. მხოლოდ ასეთი კომპლექსური საგამოძიებო მოქმედებების შემდეგ იქნება შესაძლებელი კონკრეტული ვერსიაზე დასაბუთებული მსჯელობა. მანამდე კი, ყველაფერი მარჩიელობა და იაფფასიანი პოლიტიკური პროპაგანდაა, მოქმედი ხელისუფლების დისკრედიტაციის მიზნით.

_ თქვენ პოლიტიკური პროპაგანდა და ხელისუფლების დისკრედიტაცია ახსენეთ. ეროსი კიწმარიშვილი ღიად აკრიტიკებდა მოქმედ ხელისუფლებას; რუსთავის არჩევნების მეორე ტურში ასევე ღიად დაუჭირა მხარი "ნაციონალური მოძრაობის“ მერობის კანდიდატს. ასევე, გავიხსენოთ, მისი ინტერესები და სასამართლო დავები "რუსთავი 2“-თან  და "მაესტრო“-სთან დაკავშირებით. სწორედ ამ დღეებში გავრცელდა მისი ინტერვიუ, სადაც იგი ტელეკომპანია "მაესტრო“-ში რუსეთის და ბიძინა ივანიშვილის ინტერესებზე საუბრობს. ხომ არ ფიქრობთ, რომ მისი გარდაცვალება შეიძლება ამ საკითხებსაც უკავშირდებოდეს?

_ ეროსი კიწმარიშვილი ჩვეულებრივი მოქალაქე არ იყო. მას მრავალმხრივი ინტერესები ჰქონდა და ამიტომაც არის მისი გარდაცვალების ფაქტზე ობიექტური ჭეშმარიტების დადგენა საზოგადოებისთვის მნიშვნელოვანი. ეს ასევე მნიშვნელოვანია ხელისუფლებისათვისაც, სწორედ თქვენს მიერ ჩამოთვლილი გარემოებებიდან გამომდინარე. კიდევ ერთხელ მინდა გავუსვა ხაზი, რომ არაფრის გამორიცხვა არ შეიძლება და ყველა ვერსია უნდა გადამოწმდეს. უკვე შეინიშნება ამ საკითხის პოლიტიზირება. "ნაციონალური მოძრაობის“ ლიდერები საუბრობენ სისხლიან რევანშზე, რუსული მაფიის ხელწერაზე, 90-იანი წლების განუკითხაობის დაბრუნებაზე ქვეყანაში და ა.შ. სწორედ ამიტომ, ხელისუფლების ინტერესებშია, რომ ეს საქმე რაც შეიძლება მალე გამოიძიონ და საზოგადოებას მაქსიმალურად ამომწურავი პასუხები გაეცეს. თუმცა, მაინც ვფიქრობ, რომ ადამიანების ბუნებიდან გამომდინარე, რომელთაც ქვეცნობიერად აქვთ მიდრეკილება საიდუმლოებების და შეთქმულების თეორიების მიმართ, ასევე ჩვენი პოლიტიკოსების დიდი ნაწილის ამორალურობის გათვალისწინებით ნებისმიერ ფასად მოიპოვონ დივიდენდები, სულ რომ ვიდეოჩანაწერი გაასაჯაროონ, სადაც მომხდარი ფაქტი იქნება ასახული, ეს საქმე მაინც იმ მუდმივი კითხვის ნიშნების მქონე რეზონანსულ საქმეებს მიემატება, რომლებზე პასუხებიც არ ჩანს ან რომლებზე პასუხებიც საზოგადოებისთვის არადამაჯერებელია.