27 აგვისტოს, ოზურგეთის მუნიციპალიტეტის საკრებულოს რიგგარეშე სხდომა შედგა. ის დათქმული დროის _ 11 საათის ნაცვლად, ათი წუთის დაგვიანებით დაიწყო, რისთვისაც საკრებულოს თავმჯდომარემ, დავით დარჩიამ დეპუტატებს შენიშვნა მისცა, მომავალში დაგვიანებას ადგილი არ ექნესო. ბევრს ესიამოვნა კიდეც ეს შენიშვნა, ახალი საკრებულო, ეტყობა, გერმანული პუნქტუალობით აპირებს მუშაობას და ძალიან კარგიაო.
დღის წესრიგით გათვალისწინებული 28 საკითხიდან, ჩვიდმეტი სხვადასხვა კომისიის დებულებათა დამტკიცებას შეეხებოდა. დღის წესრიგიდან ამოიღეს 22-ე საკითხი _ "საკრებულოს აპარატის საშტატო ნუსხის დამტკიცების შესახებ" და შეთანხმდნენ, რომ ამ საკითხის უკეთ განხილვის შემდეგ მოხდება მისი დამტკიცება. რამდენიმე ძირითადი საკითხის განხილვა ადგილების გადანაცვლებით მოხდა, რა თქმა უნდა, შეთანხმების საფუძველზე.
პირველი საკითხის: "ოზურგეთის მუნიციპალიტეტის 2014 წლის ბიუჯეტის დამტკიცების შესახებ", 2014 წლის 13 აგვისტოს დადგენილებაში ცვლილების შეტანის თაობაზე, საფინანსო-საბიუჯეტო სამსახურის უფროსმა გია მამაკაიშვილმა ისაუბრა. ცვლილებასთან დაკავშირებით მან გააკეთა განმარტება, რომ შემოსავლების ნაწილში ტრანსფერები გაიზარდა 420,0 ათასი ლარით, მათ შორის, ორი ერთეული ნაგავმზიდი ტექნიკისა და ნაგვის ურნების შესაძენად. ხოლო სკოლამდელი განათლების დაფინანსება შემცირდა 7,0 ათასი ლარით და ამდენივეთი გაიზარდა კულტურის ღონისძიებების დაფინანსება.
დეპუტატების სრულმა შემადგენლობამ, 2014 წლის ბიუჯეტის ამ სახით დამტკიცებას კენჭი უყარა და ხელის აწევით დაადასტურა.
ხმაური მოჰყვა და სერიოზული კამათი გამოიწვია მესამე საკითხად განხილული დღის წესრიგის 28-ე საკითხის: "ოზურგეთის მუნიციპალიტეტის არასამეწარმეო იურიდიული პირების რეორგანიზაცია-დაფუძნებისთვის, მუნიციპალიტეტის გამგებლისთვის თანხმობის მიცემის შესახებ " ოზურგეთის მუნიციპალიტეტის საკრებულოს განკარგულების დამტკიცების თაობაზე, განხილვას. ცნობილია, რომ ადგილობრივი თვითმმართველობის არჩევნების შემდეგ, ქალაქისგან სოფლების გამიჯვნა, წარმოიშვა რიგი აუცილებლობანი. ამ საკითხის ირგვლივ ისაუბრა საფინანსო-საბიუჯეტო კომისიის თავმჯდომარემ გელა ჩავლეშვილმა:
_ "მუნიციპალიტეტებს შორის ქონებისა და ვალდებულებების გადანაწილების წესის დამტკიცების შესახებ" საქართველოს მთავრობის დადგენილების და "ოზურგეთის მუნიციპალიტეტის მიერ დაფუძნებული კერძო სამართლის იურიდიული პირების ახლად შექმნილ მუნიციპალიტეტებისთვის მიკუთვნების შესახებ" ოზურგეთის მუნიციპალიტეტის საკრებულოს განკარგულების შესაბამისად, ოზურგეთის მუნიციპალიტეტის საკრებულოს საკუთრების უფლებით (100% წილი), გადმოეცა ლიკვიდირებული , ოზურგეთის მუნიციპალიტეტის მიერ დაფუძნებული კერძო სამართლის იურიდიული პირები და რეორგანიზაციის პროცესის შედეგად ოზურგეთის მუნიციპალიტეტის დაქვემდებარებაში არსებული იურიდიული პირები. ესენი საჭიროებენ მათი წესდებების ცვლილების, რეორგანიზაციის და ხელახალ რეგისტრაციას მეწარმეთა და არასამეწარმეო იურიდიული პირების რეესტრში. აქედან გამომდინარე, ოზურგეთის მუნიციპალიტეტის საკრებულომ, თვითმმართველობის კანონიდან გამომდინარე, გადაწყვიტა, ა(ა) იპ "ოზურგეთის ისტორიული მუზეუმი" და ა(ა)იპ "სათემო საბიბლიოთეკო გაერთიანების" შერწყმის შედეგად, შეიქმნას იმავე მიზნების მქონე ერთი იურიდიული პირი. ხოლო ეს ყველაფერი მოყვანილი უნდა იქნეს მოქმედ კანონმდებლობასთან შესაბამისობაში.
გელა ჩავლეშვილმა აღნიშნა ისიც, რომ მუნიციპალიტეტის სკოლამდელი აღზრდის ცენტრის ხელმძღვანელად ავთანდილ მექვაბიშვილი დაინიშნა და საშუალება ეძლეოდა, საკუთარ გეგმებზე ესაუბრა, თუმცა დიმიტრი კვერღელიძემ წინადადება შემოიტანა, პირები სამსახურების ხელმძღვანელებად როცა დაინიშნებიან, შემდეგ მოხდეს მათი მოსმენა. დეპუტატები ამაზეც შეთანხმდნენ.
სოფელ მაკვანეთის მაჟორიტარმა დეპუტატმა ნუგზარ კალანდარიშვილმა სოფლებში სპორტული სექციების გახსნის აუცილებლობაზე ისაუბრა:_ ქალაქის სპორტულ სკოლებში ბავშვები, ძირითადად, სოფლებიდან დადიან. ამიტომ იქ უნდა გაიხსნას შესაბამისი ბაზა. რაღაც უნდა ვიღონოთ ამ კუთხით, თორემ დაიცალა სოფელი, ახალგაზრდობა მიდის და უკან არავინ ბრუნდება. რაში იხარჯება ფინანსები, მიზნობრიობა ხომ უნდა გააჩნდეს?! ბახმაროში დოღისთვის სოფელში ზრდიდნენ ცხენს. ახლა ამდენი ამბავი სჭირდება. ჩამოჰყავთ მომღერლები, თან ძვირადღირებული. რა მოხდება, ჩვენმა კულტურის ცენტრმა რომ ჩაატაროს ეს კონცერტი, ცუდი მომღერლები და მუსიკოსები გვყავს? აბა, რატომ ვამზადებთ? სოფელში რომ სპორტს და კულტურას მივხედო, ჩემი დაფინანსება უნდა მქონდეს, ვიღაცას სად ვდიო? ასე თუ გაგრძელდა, დეპუტატიც აღარ გეყოლებათ საკრებულოში. მე საშუალო ასაკს გადავცდი და იქ ჩემზე უფროსია უფრო მეტი. ახალგაზრდები კი მიდიან და მიდიან…
უფრო მკაცრი იყო დეპუტატ ბიძინა გობრონიძის გამოსვლა, რომელიც სოფლებში სპორტული წრეების გახსნას არა იანვრიდან, არამედ სექტემბრიდან ითხოვდა: _ სოფლებში სპორტი უნდა განვითარდეს. რატომ არ შეიძლება სოფლის სპორტის განვითარების ა(ა)იპ ორგანიზაცია შეიქმნას? თუ სოფელ ლიხაურში არის ჭიდაობის კლუბი, სხვაგანაც შეიძლება გაიხსნას. კარგი, იანვრამდე იყოს დღემდე არსებული ა(ა)ი პ ორგანიზაციები, მაგრამ მერე თუ გაკეთდება სოფლის ახალგაზრდობის სასიკეთო საქმე? პრობლემები თავსაყრელადაა სოფლებში და იქ სპორტის განვითარება სოფელს სამომავლოდ საგრძნობლად გააძლიერებს. ყველამ ხომ კარგად იცით, რომ ოზურგეთის სპორტსკოლის ბაზა სოფლების ბავშვებია. იქნებ, სულ არ დაგჭირდეთ ქალაქში ასეთი ა(ა)იპ-ები ან უფრო ნაკლები რესურსი იქნეს საჭირო და სოფლებს უფრო მივხედოთ ამ კუთხით, სიმართლეს არ ვამბობ? _ იკითხა გობრონიძემ.
აღნიშნული იდეა კარგია. გელა ჩავლეშვილს არ უარუყვია, თუმცა, განმარტა, რომ არანაირი იურიდიული პირი არ არსებობს, თუ არ არსებობს ქონება: _ არსებული ქონების დამტკიცების შემდეგ, იურიდიული პირიც იარსებებს და პრობლემაც არ იქნება, _ თქვა მან, თუმცა, დეპუტატების ნაწილი მაინც უკმაყოფილებას გამოთქვამდა.
საფინანსო-საბიუჯეტო სამსახურის უფროსმა, გია მამაკაიშვილმა თავადაც ვერ დამალა უკმაყოფილება და დეპუტატებს მიმართა, თუ ამ თემაზე ამდენი საუბარი დამჭირდებოდა, არ მეგონა. თუ ქონება არ იქნა, რა ვქნათ და როცა დარეგისტირდება ეს ქონება, გპირდებით, ყველაფერი დადებითად გადაწყდება, როგორც გსურთო.
თავის მხრივ, საკრებულოს თავმჯდომარე დავით დარჩიამაც განმარტა, რომ ამ საკითხზე სერიოზულად იზრუნებს საკრებულო, ახალი ბიუჯეტის პირობებში.
მიუხედავად არაერთი წინააღმდეგობისა, დარჩიას გამოსვლის შემდეგ საკითხს კენჭი უყარეს და დეპუტატთა უმრავლესობის თანხმობით, აღნიშნული განკარგულება დაამტკიცეს.
