“მოქალაქეთა პოლიტიკური გაერთიანებების შესახებ” საქართველოს ორგანულ კანონსა და სისხლის სამართლის კოდექსში 2011 წელის დეკემბერში გახორციელებული ცვლილებები საფრთხეს უქმნის გამოხატვისა და საკუთრების უფლებებს და აქვს სამოქალაქო-პოლიტიკური აქტივობების შემზღუდველი ეფექტი, ასევე ქმნის არათანასწორ საარჩევნო გარემოს.
ამ საკითხზე “გურია ნიუსი” ოზურგეთში რამდენიმე პოლიტიკური პარტიის წარმომადგენელს ესაუბრა.
“ქრისტიან-დემოკრატების” ოზურგეთის მუნიციპალიტეტის ორგანიზაციის თავმჯდომარის, კახა ღლონტის თქმით, ეს არის ცუდი პრეცედენტი, რაც გამოიწვია პოლიტიკურ თამაშში ახალი, ფინანსურად ძლიერი მოთამაშის, კერძოდ, ბიძინა ივანიშვილის შემოსვლამ და რითაც დაფინანსების კუთხით დაზარალდა მთლიანად ოპოზიციური სპექტრი.
მისი თქმით, აღნიშნული კანონპროექტით, ხელისუფლება ცდილობს ბოლომდე გააკონტროლოს იურიდიული პირებისა და ბიზნესმენების შემოწირულობები: _ მიუხედავად იმისა, რომ ოპოზიციური პარტიები განებივრებული არ ვიყავით შემოწირულობებით, დიდი ალბათობაა იმისა, რომ ოპოზიციურ პარტიებს დაფინანსების ეს წყაროც შეუწყდეს.
“გურიის თავისუფალი დემოკრატების” თავმჯდომარე, თემურ სალუქვაძე ჩვენთან საუბრისას ამბობს, რომ ბოლო პერიოდში არადემოკრატიული ცვლილება გახორციელდა საარჩევნო კანონმდებლობაში და არა მხოლოდ ამ კანონში. მისივე თქმით, ეს ყველაფერი მიმართულია ბიძინა ივანიშვილის და მისი გუნდის საწინააღმდეგოდ, რომ არ გაძლიერდეს პოლიტიკური პარტია და შეუმცირდეს დაფინანსება.
“რესპუბლიკური პარტიის” ერთ-ერთ ლიდერს, ტიფო მიქატაძეს ამ საკითხთან დაკავშირებით ასეთი მოსაზრება აქვს: _ ამ საკანონმდებლო ცვლილებების შეფასებისას აშკარად უარყოფითი დამოკიდებულებები ჭარბობს. მე მინდა, ყურადღება მივაქციო მხოლოდ ერთ მომენტს _ აქამდე ხელისუფლება ცდილობდა ნებისმიერი ცვლილება განეხორციელებინა მაქსიმალურად მიზანმიმართულად და მეტ-ნაკლებად გონივრულად თავისი ინტერესებიდან, უპირველეს ყოვლისა, ძალაუფლების შენარჩუნებიდან გამომდინარე. ანუ, აქამდე ცვლილებებისას, ხელისუფლებისთვის სასიკეთოდ, შედეგები მათი მხრიდან პროგნოზირებადი იყო. ამჟამად კი იმდენად აბსურდული ხასიათის ცვლილებებთან გვაქვს საქმე, რომ ძნელია, ვილაპარაკოთ მათ მიზანმიმართულობაზე, თუნდაც მხოლოდ ხელისუფლების სასარგებლოდ ან ოპოზიციის (მაგალითად, ივანიშვილის) წინააღმდეგ. იგი უფრო მიუთითებს ხელისუფლების ისეთ მდგომარეობაზე, რომელსაც თამამად შეგვიძლია ვუწოდოთ დაბნეულობა, დეზორიენტაცია და შოკიც კი. ეს საყურადღებო და საინტერესო სიგნალია საზოგადოებისა და ოპოზიციისთვის. იმედი მაქვს, ჯანსაღი ოპოზიციური ჯგუფები ამ მომენტს რაციონალურად და ეფექტურად გამოიყენებენ. მათი ზეწოლით უახლოეს თვეებში საკანონმდებლო ცვლილებები დაიხვეწება, არაორაზროვანი და გასაგები გახდება და კონკურენციის მეტი შესაძლებლობები გაჩნდება, ვიდრე ამჟამად არის.
ავთანდილ სურგულაძე, “ახალი მემარჯვენეების” ოზურგეთის მუნიციპალიტეტის ორგანიზაციის თავმჯდომარე: _ ბოლომდე არ გავცნობივარ კანონს. ძირითადში ვეთანხმები, რადგან ის დაფინანსება, რომელიც მიდის პარტიებში, აუცილებლად უნდა გაკონტროლდეს.
გოჩა გორდელაძე, “ქართული პარტიის” ოზურგეთის მუნიციპალიტეტის ორგანიზაციის თავმჯდომარე: _ ეს ყველაფერი აწყობილია ერთი რამისთვის _ როგორმე ის პოლიტიკური ძალა, რომელიც ახლოს იქნება ბატონ ბიძინა ივანიშვილთან, იქნას დაბლოკილი და შესაბამისად, დაბლოკვის ერთ-ერთი ხერხია ფინანსური წყაროების გადაკეტვა.
ოპოზიციონერმა ლელა ნაცვალაძემ “გურია ნიუსთან” თქვა, რომ ეს საარჩევნო კამპანია იქნება ყველა არჩევნებისგან განსხვავებული, რადგანაც პოლიტიკურ არენაზე შემოვიდა საკმაოდ დიდი ფინანსების მქონე პოლიტიკოსი, ბიძინა ივანიშვილის სახით: _ სწორედ ამან ჩააგდო ეს ხელისუფლება აგონიაში და კიდევ ერთი თამაში წამოიწყო _ ვგულისხმობ კანონში ცვლილებას, რომელიც ეხება პოლიტიკური პარტიების დაფინანსებას. ეს არის მათი მხრიდან კიდევ ერთი აღვირახსნილი ქმედება, მაგრამ ვიმედოვნებ, ქართველი ხალხის არჩევანი იქნება ერთსულოვანი და ამჯერად სახელისუფლებო პარტია ვერ მიიღებს იმ რაოდენობის ხმებს, რაც მათ სჭირდება პარლამენტში მოსახვედრად, _ გვითხრა ნაცვალაძემ.
ჩვენ ამ საკითხთან დაკავშირებით კომენტარი “ერთიანი ნაციონალური მოძრაობის” ოზურგეთის რაიონული ორგანიზაციის წარმომადგენლებს ვთხოვეთ, თუმცა, მათ კომენტარისგან თავი შეიკავეს.
