ზაქარია ქუცნაშვილის ინიცირებული კანონპროექტი, მაღალი თანამდებობის პირებისათვის პრემიების აკრძალვის შესახებ, პარლამენტმა მეორე მოსმენით ჩააგდო.
კანონპროექტის მიხედვით, პრემიის მიღების უფლება 2017 წლის პირველ იანვრამდე, "საჯარო სამსახურის შესახებ" ახალი კანონის ძალაში შესვლამდე, უჩერდებოდათ : საქართველოს პარლამენტის წევრებს, მინისტრებსა და მათ მოადგილეებს, აფხაზეთის და აჭარის ავტონომიური რესპუბლიკების მინისტრებსა და მათ მოადგილეებს, პრეზიდენტის ადმინისტრაციის უფროსს და მის მოადგილეს, მთავრობის ადმინისტარაციის უფროსსა და მის მოადგილეს, ეროვნული უშიშროების საბჭოს მდივანს და მის მოადგილეს, საგადასახადო ობმუნდსმენს და მის მოადგილეს, შემოსავლების სამსახურის უფროსს და მის მოადგილეს, კრიზისების მართვის საბჭოს მდივანს და მის მოადგილეს, ცენტრალური საარჩევნო კომისიის თავმჯდომარეს, მის მოადგილეს და კომისიის მდივანს, ეროვნული ბანკის პრეზიდენტს და საბჭოს წევრებს, იუსტიციის საბჭოს წევრებს, მარეგულირებელი კომისიების წევრებს, პერსონალურ მონაცემთა დაცვის ინსპექტორს, გუბერნატორებს და მათ მოადგილეებს, საკრებულოს თავმჯდომარეებს, მათ მოადგილეებს, გამგებლებს და ქალაქის მერებს.
კანონპროექტს მხარი დაუჭირა 44 დეპუტატმა, 3 წინააღმდეგი წავიდა, ლევან ბერძენიშვილმა, ზვიად ძიძიგურმა და მალხაზ წერეთელმა კანონპროექტს მხარი არ დაუჭირეს. დარბაზში იმყოფებოდნენ, მაგრამ კენჭისყრაში არ მიიღეს მონაწილეობა პარლამენტის წევრებმა ნუკრი ქანთარიამ, თამარ კორძაიამ, ოთარ ჩრდილელმა, ლუკა კურტანიძემ, ვახტანგ ხმალაძემ, გიგა ბუკიამ, პაატა კვიჟინაძემ, გიორგი კახიანმა, გია ვოლსკიმ, ზურაბ ტყემალაძემ, გუგული მაღრაძემ, დემურ ბაშალეიშვილმა, ეკა ბესელიამ, გიორგი გაჩეჩილაძემ და ფრიდონ საყვარელიძემ.
