პარლამენტის შუალედური არჩევნების საჩივრები და საბოლოო შედეგი

საქართველოს პარლამენტის შუალედური არჩევნების საბოლოო შედეგები, საგარეჯოს საარჩევნო ოლქში 19 ნოემბრისთვის გამოქვეყნდება.

როგორც "გურია ნიუსთან" საუბრისას ცესკოს სპიკერი ანა მიქელაძე ამბობს, უკვე დასრულებულია განცხადება-საჩივრების განხილვა.

მისი თქმით, საბოლოო ჯამში, 31 ოქტომბრიდან 2 ნოემბრის ჩათვლით, საოლქო საარჩევნო კომისიებში 42 განცხადება-საჩივარი დაიწერა, რომელთაგან 28 დაკმაყოფილდა.

"31 ოქტომბერს, გაიმართა საქართველოს პარლამენტის შუალედური არჩევნები, საგარეჯოსა და მარტვილის საარჩევნო ოლქებში. რაც შეეხება საკრებულოს შუალედურ არჩევნებს, ის ჩატარდა დმანისის,  ვანის, ხობის და ასევე, საგარეჯოს ადგილობრივ საარჩევნო ოლქებში.

არჩევნების დღემ საარჩევნო უბნებზე მშვიდ ვითარებაში ჩაიარა, თუმცა, იყო გარკვეული ტიპის ექსცესები.  მაგალითად, საგარეჯოს საარჩევნო ოლქის მე-13 უბანზე საუბნო საარჩევნო კომისიას არ მიეცა საშუალება მშვიდ გარემოში ემუშავა და დროულად მიეწოდებინა შემაჯამებელი ოქმი საოლქო საარჩევნო კომისიისთვის.
რაც უბნებთან პოლიტიკური პარტიების წარმომადგენლებისა და მათი მომხრეები შეკრებამ გამოიწვია", _ აღნიშნავს მიქელაძე.

მისივე თქმით, არჩევნების დღეს საჩივრები მხოლოდ საგარეჯოსა და მარტვილის საარჩევნო კომისიებში დაიწერა. დანარჩენ ოლქებში საჩივრები არ დაწერილა.

"სულ 31 ოქტომბრიდან2 ნოემბრის ჩათვლით, აღნიშნულ კომისიებში 42 განცხადება-საჩივარი შევიდა. არჩევნების დღეს, დილის 07:00 საათიდან საარჩევნო უბნის დახურვამდე, საღამოს 20:00 საათამდე დაწერილი საჩივრები ძირითადად შეეხებოდა მცირე პროცედურულ ხარვეზებს. მაგალითად, მარტვილის ერთ-ერთ საარჩევნო უბანზე ხმა მისცა ამომრჩეველმა, რომელმაც საარჩევნო ყუთში საკონტროლო ფურცლის მოთავსებამდე ჩააგდო ბიულეტენი; ასევე, გვქონდა შემთხვევა, როდესაც საკონტროლო ფურცელზე არ იყო მითითებული პირველი ამომრჩევლის რეგისტრაციის მისამართი, ასევე, მარტვილის 37-ე უბანზე ერთ-ერთმა ამომრჩეველმა მარკირების პროცედურის გავლაზე უარი განაცხადა რელიგიური მოსაზრების გამო და რეგისტრატორმა გაითვალისწინა მისი თხოვნა და მარკირება არ გაუკეთა. თუმცა ეს არ არის ისეთი ტიპის ხარვეზებია, რომლებიც ზეგავლენას ვერ მოახდენდნენ არჩევნების შედეგებზე", _ ამბობს მიქელაძე.

როგორც ცესკოს სპიკერი "გურია ნიუსთან" საუბრისას განმარტავს, საჩივრები უბნების დახურვის შემდეგაც დაიწერა.

"ძირითადად, ეს საჩივრები შემაჯამებელი ოქმის შევსების პროცედურებს შეეხებოდა. მაგალითად, ერთ-ერთი საჩივარი, რომელიც დაიწერა ეხებოდა საგარეჯოს მე–2, მე5- 43-ე და 47-ე საარჩევნო უბნებში გაცემული ბიულეტენების რაოდენობა ერთით აღემატებოდა ამომრჩეველთა ხელმოწერების რაოდენობას. ასევე, დაიწერა რამდენიმე საჩივარი უბნის შემაჯამებელი ოქმების არასრულად შევსების გამო. საერთო ჯამში, სულ ორივე საარჩევნო ოლქში დიწერა 42 საჩივარი, აქედან 28 მათგანი დაკმაყოფილდა.

ეს 28 საჩივარი დაწერილი იყო "საქართველოს ახალგაზრდა იურისტთა ასოციაციის", "მრავალეროვანი საქართველოს", "სამართლიანი არჩევნებისა და დემოკრატიის საერთაშორისო საზოგადოების" და "განვითარების და დემოკრატიის ცენტრის" მიერ.

არ დაკმაყოფილდა 7 საჩივარი, რომელთაგან 5 ს"აქართველოს პატრიოტთა ალიანსის" მიერ იყო წარდგენილი, ხოლო დანარჩენი ორი, საიასა და "სამართლიანი არჩევნებისა და დემოკრატიის საერთაშორისო საზოგადოების" მიერ.

ნაწილობრივ დაკმაყოფილდა ზოგიერთი საჩივარი, მათ შორის ერთი საიას და სამი "სამართლიანი არჩევნების" მიერ დაწერილი", _ ამბობს ცესკოს სპიკერი.

რაც შეეხება საჩივრების განუხილველად დატოვებას, როგორც მიქელაძე აცხადებს, საქართველოს პატრიოტთა ალიანსის" ორი საჩივარი არ დაკმაყოფილდა.

"საჩივრის განუხილველობას თავისი საკანონმდებლო წინაპირობები აქვს. ამ შემთხვევაში, უსაფუძვლობის გამო არ იქნა განხილული", _ აღნიშნავს მიქელაძე.

მისივე თქმით, უკვე დასრულებულია სასამართლო პროცესებიც, რომელიც საარჩევნო დავებს განიხილავდა.

"ცესკოს მონაწილეობით ორი სასამართლო პროცესი გაიმართა სიღნაღის რაიონულ სასამართლოში. მოსარჩელეები იყვნენ როგორც "საქართველოს პატრიოტთა ალიანსი", ასევე საიაც.

პირველ შემთხვევაში მოსარჩელის დავის საგანი იყო საგარეჯოს საარჩევნო ოლქის 41-ე საარჩევნო უბნის  2015 წლის 31 ოქტომბრის კენჭისყრის შედეგების შემაჯამებელი ოქმის და საგარეჯოს საოლქო საარჩევნო კომისიის 2 ნოემბრის განკარგულების ბათილად ცნობა; ასევე, მე-13,  29-ე, 39-ე, 45-ე, 47-ე და 48-ე საარჩევნო უბნების კენჭისყრის შედეგების შემაჯამებელი ოქმების და შესაბამისი განკარგულებების ბათილად ცნობა. აღნიშნული სარჩელი სასამართლომ განიხილა და ის არ დააკმაყოფილა.

რაც შეეხება საიას სარჩელს, რომლის დავის საგანი საგარეჯოს საოლქო საარჩევნო კომისიის 2015 წლის 3 ნოემბრის განკარგულებისა და ამავე დღის სხდომის ოქმის  ნაწილობრივ ბათილად ცნობა იყო, სასამართლომ არდააკმაყოფილა. საჩივრები შეეხებოდა მე-2, 45-ე და 47-ე უბნებიდან შესული ბიულეტენების ხელახლა გადათვლას.

გარდა ამისა, საჩივრები შემოვიდა ცენტრალურ საარჩევნო კომისიაშიც. აქედან ერთი "პატრიოტთა ალიანსის" საჩივარი იყო, რომელიც განუხილველად დარჩა, რადგან არაუფლებამოსილი პირის მიერ იყო შემოტანილი, ხოლო მეორე საჩივარი დაიწერა "საქართველოს პროფესიული განათლებისა და კვალიფიციური კადრების მომზადების მუშაკთა და სტუდენტთა პროფესიული კავშირის" მიერ, რომელიც ასევე განუხილველად დარჩა გასაჩივრების ვადის გასვლის გამო", _ აღნიშნავს მიქელაძე და დასძენს, რომ გასაჩივრების ყველა ვადა გასულია.

შეგახსენებთ, რომ გუშინ, 14 ნოემბერს, ბოლო სასამართლო პროცესი გაიმართა. სასამართლომ  "პატრიოტთა ალიანსის" მიერ შეტანილ სარჩელზე იმსჯელა. დავის საგანს ცესკოს განკარგულების ბათილად ცნობა წარმოადგენდა, თუმცა, სასამართლომ სარჩელი არ დააკმაყოფილა.

რაც შეეხება "პატრიოტთა ალიანსის" ლიდერის, ირმა ინაშვილის განცხადებას, რომელიც მან ორი დღის წინ, "იმედზე" გადაცემა "პოლიტიკაში" გაკეთა, ცესკოს სპიკერი ამბობს, რომ მსგავსი შინაარსის საჩივარი საოლქო საარჩევნო კომისიაში არ შესულა.

ცნობისთვის, ინაშვილმა, გადაცემაში სტუმრობისას აღნიშნა, იორმუღანლოში სოფლის გამგებლები ამომრჩევლებს ხელზე აწერდნენ 41-ს, რომ ხმა "ქართული ოცნებისთვის" მიეცათ.

"იორმუღანლოს 39-ე, 47-ე, 49-ე უბნებზე იყო დარღვევები, რაც არის იმის საფუძველი რომ უბნის შედეგები გაუქმდეს", _ აღნიშნა ინაშვილმა.

თუმცა, ცესკოს სპიკერი განმარტავს, რომ ამ უბნებთან დაკავშირებით საჩივრები უბნის შედეგების გაბათილების მოტხოვნით დაიწერა და არა სხვა რაიმე დარღვევის გამო.

რაც შეეხება არჩევნების საბოლოო შედეგებს, მარტვილში, 39-ვე უბნის შედეგები ცნობილია და ამ შედეგით "ქართული ოცნების" კანდიდატი სოსო დანელია ლიდერობს. მან ხმების 72.54% მიიღო, ხოლო "პატრიოტთა ალიანსის" წარმომადგენელმა ეთერ მეძველიამ – 27.45%.

საგარეჯოში, არჩევნების საბოლოო შედეგი 19 ნოემბრისთვის გახდება ცნობილი. თუმცა, წინასწარი მონაცემებით, აქაც კოალიცია "ქართული ოცნების" კანდიდატი თამარ ხიდაშელი ლიდერობს. მან ხმების 49.5% მიიღო, ხოლო "პატრიოტთა ალიანსის" ლიდერმა, ირმა ინაშვილმა – 45.83%.