შეწყალების სკანდალური საქმე გრძელდება. შეწყალების კომისიის ყოფილმა თავმჯდომარემ, თბილისის საკრებულოს დეპუტატმა ალეკო ელისაშვილმა ის ადამიანები დაასახელა, რომლებსაც მისი მტკიცებით "არაჯანსაღი, დაჟინებული და კატეგორიული ინტერესი ჰქონდათ მხოლოდ და მხოლოდ კოკაინის საქმეზე მსჯავრდებული პირების შეწყალებასთან დაკავშირებით."
_ ეკა ბესელიას და მანანა კობახიძეს არაჯანსაღი, დაჟინებული და კატეგორიული ინტერესი ჰქონდათ მხოლოდ და მხოლოდ კოკაინის საქმეზე მსჯავრდებული პირების შეწყალებასთან დაკავშირებით. მათ არ აინტერესებდათ სხვა მსჯავრდებულები. მირეკავდნენ, მესიჯებს მიგზავნიდნენ. იყო ინფორმაცია, რომ ამ არაჯანსაღი და დაჟინებული ინტერესების მიმართ სხვა ანგარება და დაინტერესებაც იყო.
22 საათი გავატარე პროკურატურაში, მაგრამ პროკურატურაში მიდის საქმის ჩაფარცხვა. თავის რჯულსა და ტრადიციას არ ღალატობს პროკურატურა.ეკა ბესელიასა და მანანა კობახიძის მხრიდან იყო არნახული ინტერესი მხოლოდდამხოლოდ კოკაინის საქმის მსჯავრდებულებზე და სხვა არც ერთი მსჯავრდებულის საქმე მათ არ ადარდებდათ.
მივიღე რამდენიმე მესიჯი, სადაც პირდაპირ ითხოვდნენ შეწყალებულთა შორის ამ პირების ჩასმას. ბოლოს რაც მოვიდა, მესიჯში პირდაპირ იყო მუქარა, როგორ ვბედავდი მე საქმის უყურადღებობით დატოვებას,“ _ განაცხადა ელისაშვილმა ტელეკომპანია "რუსთავი 2"-ის ეთერში.
კითხვაზე საიდან იცის ბესელია-კობახიძის ამ საქმეში ფულადი დაინტერესების შესახებ, პასუხობს, რომ ეს ინფორმაცია მას წყარომ მიაწოდა და მისი ვინაობის დასახელებას არ აპირებს.
ელისაშვილს სოციალური ქსელის საშუალებით უპასუხა მანანა კობახიძემ. პარლამენტის ვიცე-სპიკერი ამბობს, რომ ელისაშვილი წინა ხელისუფლების დავალებებს ასრულებს:
_ თქვენ ხართ ჩვეულებრივი ცრუპენტელა! თითქოს, მე და ეკა ბესელია სხვა პატიმრების ბედით არ ვინტერესდებოდით. მხოლოდ მე, 100 ზე მეტი მომართვა მაქვს სხვადასხვა მსჯავრდებულის საქმეზე გამოგზავნილი და ადამიანის უფლებათა კომიტეტს ალბათ ასეულობით. ბოჭორიშვილის საქმეზე ერთხელ პრეზიდენტს მივმართე, რაზეც პასუხი დღემდე არ მაქვს და ერთხელ რეკომენდაცია 
გავეცით ადვოკატის მომართვის საფუძველზე, თუ „გაწუხებდით”, თუ „ვაქტიურობდი”, ესეც პატიმრების აქტიური მომართვების და არაერთგზისი საჩივრების გამო.
როგორ ფიქრობთ, მე როგორი დეპუტატი ან ადამიანი ვიქნებოდი, ისინი რომ თაროზე შემომეწყო?!
თქვენ რატომ დაყვებოდით თქვენს ამომრჩევლებს პროკურატურაში?!
რატომ გხვდებოდნენ მინისტრები, მოადგილეები, სხვა დეპუტატები?!
ზეგავლენით ვაჭრობდნენ ან თქვენ იღებდით სარგებელს?!
რამ შეგაშინათ? ჩემმა თხოვნამ რომ საქმე შეგესწავლათ?! და თქვენ იყავით მთავარი „შემწყალებელი”?!
თქვენ პრეზიდენტის სამწუხარო შეცდომა ხართ, ბატონო ალეკო! ჩვეულებრივი ცრუპენტელა პოპულისტი! თქვენ გუშინ იცრუეთ, მსგავსი ტონალობის თუ შინაარსის გზავნილი მე არასოდეს არც თქვენთვის და არც ვინმე სხვისთვის გამიგზავნია, თქვენ პასუხს აგებთ ამ ტყუილისთვის! იქნებ სხვამ მოგწერათ ჩემი სახელის ხსენებით ან გამოყენებით?!
გახსენება მოგიწევთ ამის! თქვენ ან დაეხმარებით გამოძიებას და ბოლომდე იტყვით სიმართლეს, ან პასუხს აგებთ, ნუ ეფარებით ჟურნალისტის პროფესიას უსინდისოდ და დაასახელეთ ადამიანი, ვინც თურმე დღესაც თანამდებობის პირია და დანაშაულს ფარავს.
თურმე იცის, რომ დეპუტატები კორუფციაში ვიხრჩობით და ამის მხილებას თქვენ განდობთ, ნუ აფარებთ ხელს! მე გეტყვით, რომ თუ ასეთი „ძვირფასი” მოწმე, მართლაც არსებობს, ის ჩვეულებრივი ჭორების გამავრცელებელია, ბინძური ჭორების, ყოფილი ხელისუფლების და მათი ნარჩენების დავალებების პირდაპირი შემსრულებელი ან თავად ნარჩენი, რაც არაერთი გვყავს, განსაკუთრებით ძალოვნებში, ჩვენდა საუბედუროდ!
ხოდა, ისე გაქციეს „პარტიული დავალების” შემსრულებლად, ვერც კი ხვდებით. ამის მტკიცებულებაც მაქვს! ჯერ პროკურატურას დაველოდები! _ ასე მიმართავს კობახიძე ელისაშვილს ფეისბუქის საკუთარი გვერდიდან.
