_ სოფლის დიდ ნაწილში ხელმისაწვდომია კაბელური ინტერნეტი, სილქტივი, ქალაქის ტელეფონი და ა.შ. მაგრამ ინფრასტრუქტურული პრობლემები აქაც უხვადაა. სოფლის მოსახლეობის აბსოლუტური უმრავლესობის აზრით, მთავარ მოუგვარებელ პრობლემად წყალმომარაგება და მოუწესრიგებელი შიდა გზები რჩება.
“სოფლის მხარდაჭერის პროგრამის” ფარგლებში, 2011 წელს, გვიმბალაურს 33 ათასი ლარი გამოეყო. გვიმბალაურის თემში შედის სოფელი ჯუნეწერი, სადაც შარშან პროგრამის ფარგლებში, კლუბის გაკეთება გადაწყდა. გვიმბალაურის ტერიტორიული ორგანოს რწმუნებულის მოვალეობის შემსრულებელი ნიკო იმნაძე ამბობს, რომ “თანხების გადანაწილება სხვადასხვა თემებზე მოსახლეობის რაოდენობის მიხედვით ხდება. რადგან ჯუნეწერი უფრო მცირემოსახლეობიანი სოფელია, მას ამ თანხიდან 14 000 ლარი გამოეყო. მაგრამ ეს თანხა კლუბის გადახურვასაც ვერ უზრუნველყოფდა, ამიტომ გადაწყდა, გადმორიცხული ფულით ჯუნეწრის კლუბი გარემონტებულიყო. კლუბი, სადაც ახალგაზრდული ცენტრის ამუშავება იგეგმება მომავალში, გადაიხურა, გამოიცვალა კარ-ფანჯრები, შეილესა, დაიგო ბეტონის იატაკი, შენობის ვრცელ აივანს გაუკეთდა რკინის მოაჯირები და მოპირკეთდა ცემენტის ფილებით. ეს სამუშაოები 27 000 ლარი დაჯდა. სამუშაოები აწარმოა ინდმეწარმე ზაზა ჩხაიძემ.
გვიმბალაურში რკინიგზის გასწვრივ შეიღობა 600 გრძივი მეტრი მონაკვეთი ეკლიანი მავთულითა და აკაციის სარებით. რკინიგზის ლიანდაგების იქით სოფლის საძოვრები და საყანე ფართობები იწყება და ხშირ შემთხვევაში, ლიანდაგიდან გადმოსულ ძროხებს მატარებელი კლავდა. შარშან ხოფერიების უბანში გაკეთდა სანიაღვრე არხი. ამ სამუშაოების ღირებულებამ ჯამში 6 000 ლარი შეადგინა.
ორ სოფელს, გვიმბალაურსა და ჯუნეწერს ორაგვისღელის სათავესთან აგებული აუზი უზრუნველყოფს წყლით.
ძველი, ავარიული სისტემის და ზაფხულის გვალვების გამო, წყალი სოფლებში მუდმივად პრობლემაა. უწყლობას გამუდმებით უჩივის მოსახლეობა და ხშირად ადგილობრივი ხელისუფლებისგან ითხოვს დახმარებას. მაგრამ წლების განმავლობაში ლანჩხუთის გამგეობამ წყალგაყვანილობის სისტემის რეაბილიტაცია ვერ მოახერხა”, _ გვითხრა იმნაძემ.
ნიკო იმნაძე ამბობს, რომ არსებული ხელისუფლების მომავალ გეგმებში ლანჩხუთის რაიონის სამი სოფლის _ გვიმბალაურის, აკეთისა და მამათის წყლით უზრუნველყოფა შედის: _ აქედან ყველაზე რეალური გვიმბალაურია, რადგან სისტემა რაღაც სახით არსებობს და მას განახლება ესაჭიროება, _ ირწმუნება ხელისუფლების წარმომადგენელი.
2012 წელს სოფლის პროგრამის ფარგლებში გვიმბალაურმა მნიშვნელოვანი თანხა, 40 105 ლარი მიიღო. აქედან, ჯუნეწერს 14 283 ლარი გამოეყო. გადაწყდა, ამ ფულის ნაწილი ახალგაზრდული ცენტრის ინტერიერის კეთილმოწყობისთის დაეხარჯათ. 8 499 ლარით შეილესა, მობათქაშდა და შეიღება კედლები, შენობის ერთი ფრთა გადაიხურა თუნუქით, გამოიცვალა შიდა კარები, სამუშაოები კვლავაც ინდმეწარმე ზაზა ჩხაიძემ შეასრულა.
_ ძველისძველი, ჩამონგრეული კლუბის შენობის აღდგენაზე, ჯამში, 35 500 ლარი დაიხარჯა, მაგრამ ჯერაც ვერ გადაწყდა, რა დაწესებულება განთავსდება შენობაში. თუ შენობა არ დაიტვირთა, გამუდმებით არ მოხდა მისი განიავება, მაშინ ამდენი ფული წყალში აღმოჩნდება გადაყრილი. რადგან მეტალოპლასტმასის ფანჯრები ჰერმეტულია, არ ხდება შენობის განიავება და ნესტი მას სწრაფად გააფუჭებს, _ ამბობს ჩვენთან საუბარში, ზაზა ჩხაიძე.
ჯუნეწრის გარე განათებაზე გამოიყო 5 784 ლარი. განათდა დავით ბოლქვაძის, წმინდა ლაზარეს და სერგო ბარამიძის ქუჩები. გვიმბალაურში გარე განათება მოეწყო ალექსანდრე გუგუნავას, ბათუმის, არჩილ ჩხაიძის და ჯანმრთელობის ქუჩებზე. ამ შემთხვევაში არ იგულისხმება გარე განათების მთლიანი სისტემის გამოცვლა. ზოგან დაემატა რკინის ბოძი, განათდა რამოდენიმე მოკლე ქუჩა, ზოგან კი გადამწვარი ლამპიონები გამოიცვალა. სამუშაოებზე 2 000 ლარი დაიხარჯა. სამუშაოები შეასრულა ინდმეწარმე კახაბერ იმნაძემ. ამით ჯუნეწერ-გვიმბალაურის გარე განათების სისტემის მოწყობა დამთავრებულია.
2012 წლის პროგრამით გვიმბალაურის ადმინისტრაციას 25 822 ლარის დახარჯვა შეუძლია. ამ პროგრამის ფარგლებში შეიღობა რკინიგზის ლიანდაგიდან საძოვრებამდე მისასვლელი გზის ორივე მხარე. მასში შედის საყანე ფართობებიც. სამუშაოების ღირებულება 20 261 ლარია. სამუშაოები ჩაატარა ინდმეწარმე დურმიშხან ხოფერიამ. ნიკო იმნაძე გვარწმუნებს, რომ ამით სოფელს საბოლოოდ მოუგვარდა უმნიშვნელოვანესი პრობლემა _ მათ ყანებს ამიერიდან საქონელი ვეღარ გაანადგურებს.
გვიმბალაურში, ფაცურიების უბანში არტეზიულ ჭაზე გამოიცვალა წყლის ელექტრო ტუმბო. ტუმბოს შეძენასა და დამონტაჟებაში დაიხარჯა 1011 ლარი. ამ ჭიდან ალექსანდრე გუგუნავას ქუჩამდე, დაახლოებით 600 მეტრ მანძილზე შეიყვანეს სასმელი წყლის მილები. პროექტი 2 550 ლარი დაჯდა.
გვიმბალაურში ფუნქციონირებს საექიმო უბანიც, რომელიც ადმინისტრაციული შენობის მეორე სართულზე მდებარეობს, მაგრამ მისი გაკეთება ინფრასტრუქტურული პროგრამების ფარგლებში მოხდა.
