„საარჩევნო სუბიექტი, მოპასუხე „ერთიანი ნაციონალური მოძრაობა“ სისტემატურად ახორციელებს ამომრჩეველთა მოსყიდვას სხვადასხვა ფორმითა და საშუალებით, კერძოდ: 2012 წლის 6-11 ივნისს „რუსთავის საკრებულოს თავმჯდომარის მოადგილემ, „ერთიანი ნაციონალური მოძრაობიდან“ კახა ბარათაშვილმა ქ. რუსთავის ამომრჩევლებს მოსყიდვის მიზნით 20-20 ლიტრი ღვინო და თითო-თითო სული ცხვარი დაურიგა, რაც გახმაურდა კიდეც საინფორმაციო საშუალებებით, რაც სახელმწიფო აუდიტის სამსახურის გადამოწმებით დადასტურებულ იქნა და კახა ბარათაშვილს სასამართლოს მიერ დაედო ადმინისტრაციული სახდელი.
2012 წლის ივნისის თვის დასაწყისში ქ. ფოთში, ბარათაშვილის ქ. #99 კორპუსის ეზოში ამომრჩევლებთან შეხვედრისას „ერთიანი ნაციონალური მოძრაობიდან“ ფოთის საკრებულოს წევრმა თენგიზ სარიშვილმა ერთ-ერთ ამომრჩეველ პენსიონერს დაპირდა და მომდევნო დღეებში საჩუქრად გადასცა სატელიტური თეფში, რომელიც ასევე უსასყიდლოდ დაუმონტაჟა.
2012 წლის იანვრიდან ამავე წლის აგვისტომდე „ერთიანი ნაციონალური მოძრაობა“ სხვადასხვა რესტორნებში ხვდებოდა და უფასოდ უმასპინძლდებოდა პედაგოგებს, რომლებიც ამავდროულად არიან ამომრჩევლები.
სახელმწიფო აუდიტის მონაცემებით ზემოაღნიშნულ შეხვედრებზე საარჩევნო სუბიექტს დახარჯული აქვს 5500 (ხუთიათას ხუთასი) ლარი, რაც ბუნებრივია, თუ გავითვალისწინებთ შეხვედრების სიხშირესა და მაშტაბურობას, სიმართლეს არ შეესაბამება და ჩნდება დასაბუთებული ვარაუდი (ეჭვი), რომ გაცილებით მეტი თანხებია გახარჯული.
2012 წლის 12 აგვისტოს სახალხო ზეიმი „დიდგორობა“ „ერთიანი ნაციონალური მოძრაობის“ მიერ გამოცხადებულ იქნა პარტიულ ღონისძიებად და დიდგორის მიდამოებთან მიახლოების შესაძლებლობა მხოლოდ ამ მოძრაობის სიმბოლიკიან ტანსაცმელში გამოწყობილი მოქალაქეებისთვის იყო ნებადართული. საარჩევნო სუბიექტის მაისურებში ჩაცმული ამომრჩევლები ავტობუსებითა და სამარშრუტო ტაქსებით რეგიონებიდან უფასოდ გადაყვანილები იყვნენ ადგილობრივი მმართველობის წარმომადგენლების მიერ. შეხვედრაზე პრეზიდენტის მიმართვის შემდეგ ამომრჩევლებს მოპასუხე უფასოდ გაუმასპინძლდა მრავალფეროვანი საკვებითა და სასმელებით. ტელეკომპანია „მაესტროს“ ჟურნალისტს კარლო (კახა) ჩხაიძემ განუცხადა, რომ ამომრჩევლებს პროდუქტს აბსოლუტურად კანონიერად ურიგებდნენ.ვ
სარჩელში კიდევ რამდენიმე ფაქტია ჩამოთვლილი, სადაც ადგილი აქვს ამომრჩევლის მოსყიდვის მცდელობას.
რაც შეეხება „ნაციონალური მოძრაობის“ საარჩევნო რეგისტრაციიდან გაუქმების მოთხოვნას, „ქართული ოცნება“ თავის სასარჩელო მოთხოვნაში განმარტავს:
„საქართველოს ორგანული კანონის საარჩევნო კოდექსის 47-ე მუხლის პირველი ნაწილის „ა“ ქვეპუნქტის შესაბამისად, აკრძალულია: საარჩევნო სუბიექტების, კანდიდატებისა და მათი წარმომადგენლების მიერ პირადად ან ვინმეს მეშვეობით საქართველოს მოქალაქეებისათვის ფულადი სახსრების, საჩუქრებისა და სხვა მატერიალურ ფასეულობათა გადაცემა (მიუხედავად მათი ღირებულისა), შეღავათიან ფასად საქონლის მიყიდვა, უფასოდ ნებისმიერი საქონლის მიწოდება ან გავრცელება, აგრეთვე საქართველოს მოქალაქეების დაინტერესება ფულადი სახსრების, ფასიანი ქაღალდებისა და სხვა მატერიალურ ფასეულობათა გადაცემის დაპირებით. ამავე მუხლის მე-2 ნაწილის შესაბამისად საარჩევნო სუბიექტს, რომელიც უშვალოდ ან თავისი წარმომადგენლის ან მის სასარგებლოდ მოქმედი ნებისმიერი სხვა ფიზიკური თუ იურიდიული პირის მეშვეობით ეწეოდა ამ მუხლით გათვალისწინებულ აკრძალულ საქმიანობას, სასამართლოს გადაწყვეტილებით უუქმდება რეგისტრაცია ასეთი ფაქტების დადასტურების შემთხვევაში. ამავე კოდექსის 78-ე მუხლის მე-15 ნაწილის „ა“ ქვეპუნქტის შესაბამისად აღნიშნული კანონის 47-ე მუხლის პირველი პუნქტით განსაზღვრული ქმედების გამო სარჩელის სასამართლოში შეტანის უფლება აქვს საარჩევნო ბლოკს.“