გასულ კვირას, “გურია ნიუსი” “ქართული პარტიის” ოფისების ოზურგეთსა და ჩოხატაურში დაფუძნების შესახებ წერდა. როგორც მოსალოდნელი იყო, შეიმჩნეოდა ზურაბ ნოღაიდელის ყოფილი პარტიის აქტივისტებისა და წევრების სიმრავლე, რომლებმაც “მოძრაობა სამართლიანი საქართველოსთვის” დატოვეს და ახალ პოლიტიკურ პარტიაში ცდიან ბედს. თვითმმართველობის არჩევნების შემდეგ, როდესაც “რესპუბლიკელების” და ალასანიას გზები გაიყარა, მსგავსი რამ მაშინაც ვიხილეთ _ “თავისუფალი დემოკრატების” დაფუძნების დროს, ოზურგეთელი “რესპუბლიკელების” ერთი ნაწილი ალასანიას პარტიაში გადაბარგდა. მოკლედ, საქართველოში ერთი პარტიიდან მეორეში გადასვლა კვლავ “მოდურია”.
ზურაბ ნოღაიდელის ახალშექმნილი პარტიის ერთ-ერთი ლიდერი ლელა ნაცვალაძე ამბობს, რომ ხელისუფლებამ ყველაფერი გააკეთა იმისთვის, ოპოზიცია მარტივ მამრავლებად დაეშალა და საზოგადოების თვალში უავტორიტეტო გაეხადა, ამისთვის მერაბიშვილის კაბინეტში დაიწერა სხვადასხვა სცენარი, რომელიც გამოყენებული იქნა ინდივიდუალურად, ამა თუ იმ პარტიების მისამართით: ზოგი “ვითომ ” ოპოზიციური პოლიტიკური პარტია ხელისუფლებამ შექმნა, რათა მსოფლიოს თვალში საქართველო წარმოჩინებულიყო, როგორც “დემოკრატიული” ქვეყანა. ზოგ პოლიტიკურ პარტიაში მათი აგენტურა ჩაასახლა, რითაც პირად კონტროლზე აიყვანა ქმედებები, ზოგ ლიდერს გაურიგდა, შემდგომ კი საზოგადოებას მიანიშნა _ “ესეც თქვენი ოპოზიციაო”.
_ კარგადაც გამოუვიდა, საზოგადოება ქართულ ოპოზიციას აღარ ენდობა. ერთ-ერთი მერაბიშვილისეული სცენარის მსხვერპლი “მოძრაობა სამართლიანი საქართველოსთვისაც” გახდა; მოძრაობაში თავიდანვე გაწევრიანდა მის მიერ დაკვალიანებული რამდენიმე აგენტი, რომელთა მეშვეობითაც მოგეხსენებათ თუ როგორ განვითარდა მოვლენები. ხელისუფლება შეეცადა პარტიის სრულ განადგურებას, მაგრამ ვერ მოახერხა. დავალიანება მართლაც არსებობს, მაგრამ ეს პოლიტიკური პარტიის შიდა სამზარეულოა. ის, ვინც ამ პრობლემის პრესკონფერენციებითა და ტელევიზიებით მოგვარებას შეეცადა, სწორედ ისინი არიან ვანოს მიერ ხელდასმულები. მაგრამ მალე ყველაფერს თავისი სახელი დაერქმევა. ახლა “ქვების შეგროვების დროა…” _ ამბობს ნაცვალაძე, _ პარტია ცოცხალი ორგანიზმია და ადამიანები მიდიან და მოდიან. კონკრეტულად გოჩა გორდელაძის “ქართულ პარტიაში “გადასვლას რაც შეეხება, გოჩა ჩვენი მოძრაობის გამგეობის წევრი გახლდათ, ამ გადაწყვეტილების შესახებ თავიდანვე ვიცოდი, მან მიიღო შემოთავაზება და დათანხმდა, ამაში ცუდი არაფერია: როცა გონიერი ადამიანი რაიმე გადაწყვეტილებას იღებს, ჯერ კარგად გაიაზრებს ხოლმე. გოჩას შემთხვევაშიც ასე იქნება. მას საკმაო გამოცდილება აქვს პოლიტიკაში ყოფნის, იგი ხელმძღვანელობდა ოქრუაშვილის პარტიის საინიციატივო ჯგუფს, იყო ლევან გაჩეჩილაძის საარჩევნო შტაბის წევრიც; ამიტომ, კარგად იცნობს ამ ლიდერების საქმიანობას. მინდა მჯეროდეს, რომ “ქართული პარტიის” წინააღმდეგ აგორებული ჭორიც ხელისუფლების შეთხზულია. მე პატივს ვცემ ყველა პოლიტიკურ ძალას, რომელსაც უყვარს თავისი სამშობლო და ნამდვილად მზად არის ამ ხელისუფლების პოლიტიკურ მოუსავლეთში გასასტუმრებლად. ოზურგეთის მოსახლეობას ალბათ უკვირს ჩემი პასიურობა, მაგრამ მძიმე დღეები მაქვს მამის გარდაცვალების გამო და მხოლოდ მისი სულის სასუფეველში დასამკვიდრებლად ვლოცულობ. “სამართლიანი საქართველო” ლელა ნაცვალაძესთან ერთად ძალიან მალე ჩვეული შემართებით წარსდგება ქართული საზოგადოების წინაშე, _ თქვა ჩვენთან საუბრისას ლელა ნაცვალაძემ.
“ქართული პარტიის” ოზურგეთის საინიციატივო ჯგუფის ხელმძღვანელი გოჩა გორდელაძე “გურია ნიუსთან” საუბარში ამბობს, რომ “მოძრაობა სამართლიანი საქართველოსთვის” რიგებიდან ამ ეტაპზე ხუთი ადამიანი გადმოვიდა “ქართულ პარტიაში”:
_ ჯერჯერობით, ასეა; სხვებს ამ ეტაპზე არ ვაწუხებთ, რადგან არ ვიცით მათი პოზიცია. ჩვენი გადაწყვეტილების ერთ-ერთი მიზეზი ზურაბ ნოღაიდელის განცხადებაც იყო იმის შესახებ, რომ მან პარტია დატოვა ანუ პარტია აღარ არსებობს; შესაბამიდან ჩვენ დავრჩით უპარტიოდ. მივიღეთ შემოთავაზება “ქართულ პარტიიდან” და დავთანხმდით. ლელა ნაცვალაძე რჩება ზურაბ ნოღაიდელთან, მას აქვს თავისი პრინციპები და არ ღალატობს.
პოლიტიკური ექსპერტი ხათუნა ლაგაზიძე: _ ჩვენთან ამა თუ იმ პოლიტიკურ პარტიაში გაწევრიანება ხდება არა საერთო იდეის, ხედვის ან პროგრამის საფუძველზე, არამედ, ძირითადად, ვიწრო მერკანტილური ინტერესის დასაკმაყოფილებლად: გამარჯვების შემთხვევაში, პარტიის წევრობა სამსახურებრივი წინსვლის თუ არა, სამსახურით დაკმაყოფილების ერთგვარ გარანტიად აღიქმება. პოლიტიკურ ლიდერებსაც მსგავსი მოტივაციები ამოძრავებთ, ოღონდ სხვა მასშტაბებისა. საქართველოში მოღვაწე პარტიების უმრავლესობის გამარჯვების რესურსი კი, მოგეხსენებათ, ნულს ქვემოთაა. აქედან გამომდინარე, ვიღებთ იმედგაცრუების მაღალ ხარისხს და ახალი იმედის ძიებაში, პარტიიდან პარტიაში გადაბარგების გრძელ ჯაჭვს.
მეორე საკითხია, რაში სჭირდებათ თავად პოლიტიკურ პარტიებს ათასპარტიაგამოცვლილი ახალი “ძველი” სახეები. ეს სერიოზული პრობლემაა _ მთელი ქართული პოლიტიკური სპექტრის წარუმატებლობის თავიდათავი: ეს გახლავთ პროფესიონალი კადრების კატასტროფული დეფიციტი. ამიტომ, ქართული პოლიტიკური პარტიების დიდი ნაწილი მოდელირებულია და არა _ რეალურ შედეგზე ორიენტირებული, _ ამბობს ლაგაზიძე. მისივე თქმით, გარდა ამისა, პარტიები წევრების არჩევის დროს, განსაკუთრებით ითვალისწინებენ მათ გამოცდილებას არჩევნების გაყალბების ტექნოლოგიების ცოდნის ან პირიქით, საარჩევნო ხმების მობილიზებისა და დაცვის, სხვა წარმატებული საარჩევნო ტექნოლოგიების ცოდნის კუთხით. ასეთები კი, ძირითადად, სხვა პარტიებში გამოცდილებამიღებული ხალხია.
