მათი განცხადებით, ამ უბანში მცხოვრებ 60 ოჯახს წყალი საერთოდ არ მიეწოდება. როგორც ისინი ამბობენ, კომუნისტების პერიოდში გაკეთებული მილები დასკდა და პატრონი არავინაა.
_ 21-ე საუკუნეში, შეიძლება, წყალი არ მიეწოდებოდეს სოფელს? გადაკიდებული ვართ ერთმანეთს უბანში მცხოვრებლები. საიდან არ ვეზიდებით წყალს. საკუთარი ჭა ძალიან ცოტას აქვს ეზოში. ჩვენს უამრავ პრობლემას და გაჭირვებას, უწყლობაც ემატება. ამდენი წელია, პირველყოფილი ადამიანებივით ვართ. ახალმა მთავრობამ, იქნებ, მოგვაქციოს ყურადღება. თქვენც ჟურნალისტებს შეგიძლიათ, რომ მიაწვდინოთ მათ ხმა _ რაც შეიძლება, მალე მოგვხედონ, _ ამბობენ ისინი “გურია ნიუსთან”.
“კოხის” უბნელების აზრით, ხელისუფლება მათ იმის გამო “გადაეკიდა”, რომ არჩევნებში აქაურების მხარდაჭერის იმედი არ ჰქონდა, რადგან უმეტესობა ოპოზიციის მხარდამჭერი იყო: _ არჩევნების შემდეგ, სოფლის მაჟორიტარს, შალვა თავდიშვილს დავურეკეთ და ვთხოვეთ, ყურადღება მოექცია და დაწყებული საქმე ბოლომდე მიეყვანა, მაგრამ ასეთი პასუხი მივიღეთ: _ ხომ არ მომეცით ხმა არჩევნებში, აწი ვინც გინდათ, იმან გაგიკეთოთო, _ ამბობენ ძიმითელები.
ოთარ მორჩილაძე: _ ჩვენი უმთავრესი და უპირველესი პრობლემა უწყლობაა. სადაც ჩვენ ვცხოვრობთ, “კოხის” უბანს, წყალი საერთოდ არ აქვს, ჭაც მხოლოდ რამდენიმე ოჯახშია. წყალს ხელით ვეზიდებით, ზაფხულში “ბასეინზე” მანქანებით დავდივართ. 35 წლის წინანდელი, კომუნისტების დროს გაკეთებული მილები დასკდა, 37 ოჯახს წყალი საერთოდ არ მიეწოდება. 15 წელია, უწყლოდ ვართ.
_ ამდენი წლის განმავლობაში რატომ არ მიმართეთ გამგეობას ან თქვენი სოფლის ხელმძღვანელობას დახმარებისთვის?
_ “ჭურს რასაც ჩასძახებ, იგივეს ამოგძახებსო”. აზრი ჰქონდა?! თუ არ უნდოდათ, არაფერს არ გაგიკეთებდნენ, რაც უნდა გეთხოვათ.
_ სოფელში გასახორციელებელი პროექტების შესახებ არ არის თქვენთვის ცნობილი? არ მოითხოვეთ, რომ ამ უბნისთვის წყლის პრობლემა მოეგვარებინათ?
_ არაფერი არ ვიცით ჩვენ, სად და რას აკეთებდნენ ამ სოფელში. ვინ გეტყოდა, ვინ ჩაგვახედებდა საბუთებში? ან რა ვიცით, რამდენი ლარი იყო გამოყოფილი?
დავით დეკანოიძე: _ ჩვენ წელს, მილების საყიდლად გამოგვიყვეს 5 600 ლარი. ხალხს ფული არ აქვს და ვერ აკეთებს საკუთარი შესაძლებლობებით. ამიტომ ვთხოვეთ ხელისუფლებას, რომ მოეცათ უფლება, ამოგვეღო ეს დაჟანგული მილები, რომელსაც გავყიდდით ჯართის სახით. გვინდოდა, შემდეგ ჩვენ თვითონ უზრუნველგვეყო წყლის შეყვანა. ამის უფლებას არ გვაძლევენ _ ვიყავით საკრებულოშიც, გამგეობაშიც, მაგრამ პასუხი არ აქვთ. ადგილობრივი მთავრობა აზრზე არაა ჩვენი პრობლემის შესახებ. ამბობენ, რომ ეკონომიკის სამინისტროს აწერია ეს მილებიო, სინამდვილეში ეს ხალხის ფულით არის შეძენილი, კოლმეურნეობის დროს.
რაში ჩაიდო ეს 5 600 ლარი? არ არსებობს პროექტი, არ არსებობს ხარჯთაღრიცხვა, არ იციან, შესყიდვები ვინ განახორციელა, ტენდერი არ გამოცხადებულა. მთავრობამ გასცა ფული იმის გამო, რომ წინასაარჩევნოდ გაეხარჯა საკუთარი მიზნების გასახორციელებლად. სად და რაში ხარჯავენ ამდენ ფულს? ჩვენი მოთხოვნაა, მილის ამოღების უფლება მოგვცენ და ათასი მეტრი მილი დაამატონ. ჩვენ მოგვაკლეს მათ ათასი მეტრი მილის ღირებულება და ეს თანხა წინასაარჩვენოდ მოახმარეს “ნაციონალებს”.
_ რითი ამტკიცებთ ამ ბრალდებას?
_ ვინც არ იყო მათი მომხრე, იმათ არაფერი არ გაუკეთეს. ანუ მილები არ შეხვდათ იმ ოჯახებს, საკმარისი არ აღმოჩნდა მათთვის, ვინც არ იყო მათი მხარდამჭერი. ჩვენ ვერ ჩამოვთვლით ოჯახებს, არ იქნება ლამაზი, მაგრამ პროკურატურა უნდა დაინტერესდეს ამ საქმით და ყველაფერს აეხდება ფარდა.
ვარლამ ცინცაძე: _ ჩვენ ასევე დიდი პრობლემა გვაქვს ამ უბნის საყანე ფართობების სახით _ იგი წყალს მიაქვს, მდინარემ იცვალა კალაპოტი, წაიღო ფართობების ძალიან დიდი ნაწილი. ჩვენი ლუკმაპური ეგ არის და დახმარება გვჭირდება. სოფელს წყალი არ აქვს და მისი მიწა წყალს მიაქვს. პარადოქსია, მაგრამ რა უნდა ქნა? ამ ათი წლის მანძილზე, ერთხელ დაგვიყარეს 5 მანქანა ხრეში, ამოიღეს ყანების გასწვრივ 150 მეტრი სიგრძის კვალი და ეგაა მათი დახმარება სოფლის პროექტებით.
ოზურგეთის მუნიციპალიტეტის სოფელ ძიმითის მაჟორიტარი დეპუტატი, შალვა თავდიშვილი “გურია ნიუსთან” ამბობს, რომ მოსახლეობისთვის ნამდვილად არ უთქვამს, რადგან ხმა “ნაციონალებს” მიეცით, მე არ დაგეხმარებითო:
_ არანაირად არ ვეტყოდი მე “კოხის” უბნის მცხოვრებლებს იმას, რომ არჩევნებზე ხმა რადგან არ მომეცით, აღარ დაგეხმარებითო. იცით, რატომ? იმიტომ, რომ ყველაზე მეტი მხარდამჭერი “ნაციონალებს” მაგ უბანში ჰყავდა და ყველაზე მეტი ხმა “კოხის” უბნის მცხოვრებლებმა მოგვცეს. რაც შეეხება პრობლემას, ამ უბანში წყალი მოსახლეობის ნაწილს აქვს, ნაწილს დაზიანებული აქვს მილები. მათ მილების შეძენის მიზნით მოგვმართეს წელს და გვითხრეს, რომ თუ შეგვიძენთ მილებს, მათ ჩაწყობაზე აღარ შეგაწუხებთ, ჩვენ თავად უზრუნველვყოფთ სახლში მიყვანასო. ისინი ითხოვდნენ 3 000 მეტრ მილს. მივედით, დავზომეთ, თანაშემწეებთან და ადგილობრივ მცხოვრებლებთან ერთად, ესაჭიროებოდათ 2 300 მეტრი მილი. შევუძინეთ 2500 მეტრი მილი და მივიტანეთ ადგილზე.
_ რამდენიმე წელია, მიმდინარეობს სოფლის დახმარების პროექტი. ერთხელაც თუ დადგა ამ უბნის მცხოვრებთა პრობლემების გადაჭრის საკითხი?
_ ყველა კრებაზე ვეძახით მოსახლეობას. “კოხის” უბნიდან დააყენეს საკითხი საყანე ფართობების მოწესრიგებაზე და ის პრობლემა გადავუჭერით, _ გვითხრა თავდიშვილმა.
