სამიდან ორი “ნაციონალურ მოძრაობას” წარმოადგენდა, მესამე და მოქმედი კი “ქართული ოცნების” შტაბის ყოფილი უფროსი გახლდათ.
რიგითობის მიხედვით თუ მივყვებით, პოლიციამდე საქმემისული გამგებლების ჩამონათვალი ასეთია: გიორგი ტაკიძე (2010-2011 წწ), ილია ვაშაყმაძე (2011-2012 წწ) და კოტე შარაშენიძე (2012 წლის დეკემბრიდან დღემდე…).
პირველ ორს _ ტაკიძეს და ვაშაყმაძეს, საერთო ლობისტი ჰყავდა, სახელად “ნაციონალური მოძრაობა”, კოტე შარაშენიძის პერსონას კი პრემიერ-მინისტრის ძმის, ადიკო ივანიშვილის სახელს უკავშირებენ. ახალ გამგებელსა და მასთან დაკავშირებულ გახმაურებულ კრიმინალურ ამბავსა და გაუხმაურებელ ვერსიებზე, ცოტა ქვემოთ მოგახსენებთ. მანამდე კი იმის შესახებ, რატომ არის ოზურგეთის გამგებლის სკამი არა თბილი, არამედ _ მძიმე…
გია ტაკიძე: “მე მხარს ვუჭერ ნაციონალურ მოძრაობას და რამაზ ნიკოლაიშვილს”
გია ტაკიძეს, რომელიც ოზურგეთს გამგებლის პოსტზე 2010 წლის ივნისიდან 2011 წლის აგვისტომდე იყო, “ნაციონალური მოძრაობის” სამსახურში ყოფნამ და მისმა სიყვარულმა ვერ უშველა _ ის მოქმედი გამგებელი იყო, როცა დააკავეს და საპროცესო შეთანხმების შედეგად, ორწელიწადნახევარი მიესაჯა თბილისის საქალაქო სასამართლოს მიერ. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედებოდა ბრალად. ტაკიძემ ბრალი სრულად აღიარა, მაგრამ “ნაცმოძრაობის” ერთგული დარჩა. მისი საჭიროება პარტიამაც დაინახა წინასაარჩევნოდ და მისჯილი ორწელიწადნახევრის ნაცვლად, 6 თვეში “ჩუსტებით” გამოუშვა ციხიდან.
პირველი ოფიციალური განცხადება, რაც ციხიდან გამოსულმა გიორგი ტაკიძემ “გურია ნიუსთან” გააკეთა, ასეთი იყო: ” მე მხარს ვუჭერ ნაციონალურ მოძრაობას და რამაზ ნიკოლაიშვილს!” მისი პოზიცია მას შემდეგ, რაც ვერც “ნაციონალურმა მოძრაობამ” გაუმართლა იმედები და ვერც რამაზ ნიკოლაიშვილმა, ჩვენთვის უცნობია…
ილია ვაშაყმაძე: “მე ვტოვებ “ნაციონალური მოძრაობის თავმჯდომარის” პოსტს”
ილია ვაშაყმაძე, რომელიც ოზურგეთის გამგებლის პოსტზე 2011 წლის აგვისტოდან 2012 წლის 6 დეკემბრამდე იყო, პარტიულ იერარქიაში უფრო მაღლა იდგა, ვიდრე გიორგი ტაკიძე _ ვაშაყმაძე ოზურგეთის “ნაციონალურ მოძრაობას” თავმჯდომარეობდა, მაგრამ სხვა თანაპარტიელებისგან განსხვავებით, დიდი ქარიზმით არ გამოირჩეოდა. მისი სახელი ფართო აუდიტორიისთვის მას შემდეგ გახდა ცნობილი, რაც ტელეკომპანია “მე-9 არხით” ფარული ჩანაწერები გამოქვეყნდა.
24 მაისს, ტელეკომპანია “მე-9 არხზე” გავიდა სიუჟეტი, რომლის მიხედვითაც, ოზურგეთის გამგებლის მოვალეობის შემსრულებელი ილია ვაშაყმაძე თანამშრომლებს “ერთიანი ნაციონალური მოძრაობის” მხარდამჭერთა სიების შედგენას ავალებს. ამ ჩანაწერმა განსაკუთრებული აქტუალობა მას შემდეგ შეიძინა, რაც ხელისუფლება შეიცვალა. ვაშაყმაძე ჯერ შსს-ში, შემდეგ კი პროკურატურაში დაიბარეს, რასაც მოჰყვა მის მიერ განცხადების დაწერა და თანამდებობიდან წასვლა.
“გურია ნიუსის” ინფორმაციით, ილია ვაშაყმაძეზე არა ერთხელ გახორციელდა ზეწოლა და კატეგორიული მოთხოვნა, რომ დაეტოვებინა გამგებლის პოსტი, წინააღმდეგ შემთხვევაში გიორგი ტაკიძის ბედს გაიზარებდა. მან ჩვენთან ეს ინფორმაცია არ დაადასტურა, აყოლას ჩაყოლა არჩია და “გურია ნიუსთან” შემდეგი შინაარსის განცხადება გააკეთა: “მე ვტოვებ „ნაციონალური მოძრაობის თავმჯდომარის“ პოსტს, თუმცა პარტიაში ვრჩები. ვნახოთ, როგორ განვითარდება მოვლენები…”
ჩვენი ინფორმაციით, მოვლენები განვითარდა ისე, რომ ის დაკითხვაზე აღარ დაუბარებიათ. მისი ადგილი კი დაჩქარებული წესით დაიკავა “ქართული ოცნების” წარმომადგენელმა კოტე შარაშენიძემ.
კოტე შარაშენიძე: “სროლა და იარაღი კი არა, ზოგიერთების ბახა-ბახა ინტერპრეტაციები იყო”
კოტე შარაშენიძის შარაშენიძის მთავარ ლობისტად და მისთვის გზის “გამკვლევად” “ქართულ ოცნებაში” ბიძინა ივანიშვილის ძმა, ადიკო ივანიშვილი სახელდება. ის დღესაც არ უარყოფს ჩვენთან, რომ შარაშენიძის კანდიდატურა “ქართული ოცნების” ოზურგეთის შტაბის უფროსად სწორედ მან წაახალისა.
თუმცა, მას შემდეგ, რაც კოტე შარაშენიძესთან დაკავშირებით დიდი აჟიოტაჟი ატყდა და ის პოლიციაში დაკითხვაზე დაიბარეს, ადიკო ივანიშვილის პოზიცია უფრო სხვაგვარი გახდა. “გურია ნიუსის” ჟურნალისტის მიერ ივანიშვილთან ჩაწერილ ვრცელ ინტერვიუში, რომელსაც ჩვენს ვებგვერდზე იხილავთ, ერთი კითხვა სწორედ კოტე შარაშენიძეს ეხება:
ადიკო ივანიშვილი: _ არც ძალოვნების დანიშვნის ამბავში და საერთოდაც, პოლიტიკაში არ ვერევი.
_ არადა, ერეოდით. სწორედ თქვენი კანდიდატურა იყო კოტე შარაშენიძე…
_ ვინ გითხრათ?
_ ეს ინფორმაცია თქვენ დამიდასტურეთ ერთ-ერთ ინტერვიუში…
_ კოტეს კანდიდატურა ჩემს მიერ წარდგენილი იყო “ქართულ ოცნებაში” შტაბის უფროსად. ეს ასე იყო ნამდვილად.
_ და ახლა გინდათ დაგვარწმუნოთ, რომ არჩევნების შემდეგ თქვენ არ ერევით საკადრო პოლიტიკაში?
_ არჩევნების შემდგე კოტე არც მინახავს…
_ კოტეს ნახვას არ ვგულისხმობ… კადრების შერჩევაში მონაწილეობას ხომ იღებთ?
_ არა, რა თქმა უნდა…
_ ეს მას შემდეგ მოხდა, რაც ჩოხატაურში სტუმრობისას თქვენმა ძმამ საჯაროდ გაგაფრთხილათ, რომ პოლიტიკაში არ უნდა ჩარეულიყავით?
_ ხომ გახსოვთ, ეს რომ მითხრა, არ ჩაერიოო და საერთოდ დაანებე თავი პოლიტიკასო? იმის მერე თავს ვარიდებ მაგ ამბავს _ რად მინდა ახლა მე, ვინმეს თავი ვატკინო მაგისთვის…
კოტე შარაშენიძე სწორედ თავის ტკენის, უფრო სწორად კი თავის გატეხვის სავარაუდო ფაქტზე დაიბარეს პოლიციაში დაკითხვაზე. ბარიკადების მეორე მხარეს შარაშენიძის თანაგუნდელი და თანამებრძოლი ნესტორ რამიშვილი გახლდათ, რომელიც დღემდე არ ადასტურებას იმ ინფორმაციას, რომელიც “გურია ნიუსს” წყარომ მიაწოდა: ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე და კოალიცია “ქართული ოცნების” წევრი ნესტორ რამიშვილი ერთმანეთს ფიზიკურად დაუპირისპირდნენ. ინციდენტი, წყაროს თქმით, ნესტორ რამიშვილის საცხოვრებელი სახლის წინ მოხდა.
_ მითხრეს, რომ ღამით, დაახლოებით 12 საათზე, ოზურგეთის მუნიციპალიტეტის გამგებელი კოტე შარაშენიძე სახლში მიუვარდა ნესტორ რამიშვილს. ჩემი ინფორმაციით, რამიშვილი მას დასაქმებას სთხოვდა. წასულა საქმის გარჩევა, ხმამაღალი საუბარი და ბოლოს, როგორც ვიცი, იარაღიც გამოიყენეს _ კოტემ ნესტორს თავში იარაღის კონდახი ჩაარტყა. ადამიანი ცუდადაა, წევს სახლში და ექიმის მეთვალყურეობის ქვეშაა, _ აცხადებს “გურია ნიუსთან” წყარო.
საინტერესო ინფორმაციას გვაწვდის ნესტორ რამიშვილის შესახებ ერთ-ერთი ყოფილი მაღალჩინოსანი. მისი თქმით, რამიშვილმა წლების წინ, დაახლოებით 1998 წელს, ერთ-ერთ ავტორიტეტს სილამაზის სალონში ესროლა და მძიმედ დაჭრა კიდეც, მაგრამ იმის გამო რომ “ავტორიტეტული” ტრადიციებიდან გამომდინარე, დაზარალებულმა პოლიციას ჩვენება არ მისცა, საქმე თაროზე შემოდეს.
რამიშვილი არანაირ ჩვენებას არ იძლევა და არც ჩვენს სატელეფონო ზარებს პასუხობს, თუმცა, ჩვენი წყაროს ინფორმაციით, მასსა და შარაშენიძეს შორის კონფლიქტი დასაქმების საკითხზე წამოიჭრა _ როგორც ჩვენი წყარო ამბობს, გამგებლისგან ის საფეხბურთო გუნდ “მერცხალის” ხელმძღვანელობას ითხოვდა.
საინტერესოა კიდევ ერთი დეტალი _ გამგებლისა და ოზურგეთის მაჟორიტარი დეპუტატის, ზვიად კვაჭანტირაძის მიერ “გურია ნიუსისთვის” მიცემული განსხვავებული კომენტარები ერთსა და იმავე ფაქტზე. სხვათაშორის, ზვიად კვაჭანტირაძე კოტე შარაშენიძეს ღიად უჭერდა მხარს გამგებლის პოსტზე და ამას ჩვენთან ინტერვიუებშიც ადასტურებდა.
დაკითხვიდან გამოსულმა გამგებელმა, მედიის წარმომადგენლებთან კომენტარის გაკეთებისას განაცხადა, რომ მას არანაირი იარაღი არ აქვს და არც ნესტორ რამიშვილს შეხვედრია საერთოდ, თუმცა, მაჟორიტარი დეპუტატი ჩვენთან შარაშენიძე-რამიშვილის შეხვედრის ფაქტს და მათ შორის წარმოშობილ კონფლიქტსაც ადასტურებდა:
_ ვიცი, რომ იყო შელაპარაკება. საერთოდ, ამ ორ ადამიანს შორის თავიდანვე იყო დაძაბული ურთიერთობა, მაგრამ აბსოლუტურად დარწმუნებული ვარ იმაში, რომ კინკლაობის იქეთ საქმე არ წასულა. ასევე, რატომღაც, დარწმუნებული ვარ, რომ არანაირი იარაღი არ ყოფილა გამოყენებული. მე მქონდა კოტესთან ამაზე საუბარი, ნესტორთან კი არ მქონია _ მას ჩემთვის არ დაურეკავს… _ აცხადებდა ზვიად კვაჭანტირაძე “გურია ნიუსთან”.
სიტუაციაში გასარკვევად და ამ კონკრეტული ფაქტის დასადგენად კოტე შარაშენიძეს დავუკავშირდით.
_ არაფერი არ ყოფილა იქ, არც სროლა და არც იარაღი, ზოგიერთების ბახა-ბახა ინტერპრეტაციები იყო, _ ასეთი ზოგადი შეფასება გაუკეთა შარაშენიძემ მომხდარ ფაქტს.
_ პოლიციიდან გამოსვლის შემდეგ განაცხადეთ, რომ არ შეხვედრიხართ ნესტორ რამიშვილს, ზვიად კვაჭანტირაძე ამბობს, რომ შეხვდით და გარკვეულ კონფლიქტსაც ჰქონდა ადგილი. შეხვდით თუ არა?
_ შეხვედრა კი არა, მე ვამბობ, რომ არანაირი სროლა და იარაღი არ ყოფილა. დაინგრა ქვეყანა, ვითომ ვიღაცა დავჭერი და “პერესტრელკები” იყო.
_ დაჭრაზე არა, კონდახით თავის გატეხვაზე იყო საუბარი. პირდაპირ მიპასუხეთ _ თქვენსა და რამიშვილს შორის კამათი იყო?
_ კამათი შეიძლება არ დავარქვათ, ნუ, არაფერი არ იყო, რა. ვიღაცეებს უნდოდათ გამოყენება. აქ იყო ჯგუფი და ხალხი, რომლებსაც ჩემი აქ ყოფნა არ უნდათ. “ტაშტი გატყდა, ხმა გავარდას“ ამბავი იყო, მოკლედ რომ გითხრათ…
“ტაშტის გატყდომის” მოკლედ ნათქვამ ამბავს ახლა პროკურატურა იძიებს და სავარაუდო დამნაშავეების და დაზარალებულების დადგენას ცდილობს.
სავარაუდო დაზარალებულის, თავგატეხილი (ამის თვითმხილველები არსებობენ) ნესტორ რამიშვილის ვერსია კი ისეთია, საბჭოთა კავშირის დროინდელ მილიციაში რომ იცოდნენ თქმა: ფეხი დაუცდა და თავი გაიტეხა…
ვნახოთ, რას დაადგენს გამოძიება…
