მთავრობის აპარატის ანგარიშზე ყველაზე ძვირადღირებული მანქანა 2011 წელს გამოშვებული “Mersedes Benc s 500”– ია. მანქანის შეძენა ბიუჯეტს 229 800 ლარი დაუჯდა. ეს ციფრი თითქოს არაფრის მომცემია, მაგრამ თუ გავითვალისწინებთ, რომ ბათუმის მერია 110 სოციალურად დაუცველის კვებას და ერთი ბენეციფიარის გამოკვებისათვის დღიურად 1,95 ლარია გამოყოფილი, რამდენი ბენეფიციარის გამოკვებას დავაფინანსებთ მთავრობის ერთი ავტომანქანის ღირებულებით?
500 გრამი მაკარონი ძვლის ნახარშით, 1 ცალი კოტლეტი 125 გრამი კარტოფილის პიურეთი, 200 გრამი კომპოტი და 250 გრამი პური. ეს არის სამშაბათი დღის მენიუ სოციალურად დაუცველი მოქალაქეებისთვის “უფასო სასადილოში”. ამ მენიუდან ნათლად ჩანს, როგორ და რითი იკვებებიან სოციალურად დაუცველები. თუ დღიურ ხარჯად ვიანგარიშებთ 2 ლარს 300 სოციალურად დაუცველისათვის, დღეში 600 ლარი დაიხარჯება. წლიურად კი 219 ათასი ლარი დაიხარჯება. 10 ათასი ლარით ნაკლები, რაც ” Mersedes Benc s 500″ შეძენა დაუჯდა რეგიონის ბიუჯეტს.
აჭარის მთავრობას 12 ავტომანქანა ემსახურება. მათი შეძენის ფასი ჯამში 670 ათასი ლარია. აჭარის წინა ხელისუფლება თვეში საშუალოდ 6 ტონამდე საწვავს მოიხმარდა. ახალ ხელისუფლებამ კი ნოემბერსა და დეკემბერში 5 ტონა ბენზინი გახარჯა. 2012 წლის განმავლობაში მთავრობის აპარატის თანამშრომელთა საწვავისათვის ბიუჯეტიდან 150 ათასი ლარი დაიხარჯა. ყველაზე დიდი ხარჯი მთავრობას წინასაარჩევნოდ, სექტემბრის თვეში ჰქონდა (8 ტონა. 18 ათასი ლარის ღირებულების).
“ყოველ თვე 6 ტონა ბენზინი იხარჯებოდა მთავრობის აპარატის ბალანსზე რიცხული ავტომანქანების მომსახურეობაში. ჩვენი მოსვლის შემდეგ, ანუ 1 ნოემბრის შემდეგ, ნოემბერში 2400 ლიტრი, დეკემბერში 2700 ლიტრი დაიხარჯა. ყოველთვიურად, 3 ტონამდეც არ აღწევს დანახარჯი და ვზოგავთ თვიურად 7 ათას ლარამდე. ახლა ვაპირებთ ჯიპიესების დამონტაჟებას, რომ მაქსიმალურად გავაკონტროლოთ სად დადის ჩვენი ავტომანქანა, რა მანძილს გაივლის და სამსახუროებრივ საქმეზე არის თუ არა გასული. ვეცდები, რომ 2000 ლიტრზე ჩამოვიყვანო ეს ხარჯი. ვცდილობ, რომ ეს ზედმეტი ხარჯები და ფუფუნება მოვიკლოთ” – ამბობს აჭარის მთავრობის აპარატის უფროსი ირაკლი ჭეიშვილი.
ირაკლი ჭეიშვილი ერთგვარ შურისძიებას უწოდებს ხელისუფლების გადაბარებამდე ვარშალომიძის მთავრობის გადაწყვეტილებებს. მაგალითად ყოფილ ხელისუფლებამ ოქტომბრის თვეში, არჩევნების შემდეგ მთავრობის აპარატის ბალანსზე რიცხული მანქანების ნაწილი მერიას, ნაწილი კი სხვა ადგილობრივ თვითმმართველობებს გადასცა.
15 ოქტომბერს მთავრობის აპარატის უფროსის ბრძანებით “Toyota Hilux” ფირმის 3 ავტომანქანა აჭარის ფინანსთა და ეკონომიკის სამინისტროს გადასცა. ავტომანანების საცალო ღირებულება 44 ათას ლარზე მეტია და 2012 წელსაა გამოშვებული. ეკონომიკის სამინისტრომ კი მანქანები ქობულეთისა და ხელვაჩაურის გამგეობებს უბოძა.
წინა ხელისუფლებამ “ტოიოტას” ფირმის, 35 ათას ლარის ღირებულების მიკროავტობუსი გადასცა სახელმწიფო ვოკალურ ანსამბლ “ბათუმისათვის”. (ხელოვნების უნივერსიტეტს კი მთავრობისთვის რეაბილიტირებული შენობა აჩუქა).
წინა ხელისუფლების უფლებამოსილების ბოლოს, ერთი დღით ადრე, ბათუმის მერიას მთავრობისგან უსასყიდლოდ და არსებობის ვადით გადაეცა 45 ათას ლარიანი “ტოიოტა სონატა”, მაგრამ ახალი ხელისუფლების მოთხოვნით ეს ავტომანქანა კვლავ აჭარის მთავრობას დაუბრუნდა.
ავტომანქანები გადაეცა სხვა ადგილობრივ თვითმმართველობებსაც. მაგალითად შუახევის მუნიციპალიტეტს გადაეცა “ტოიოტა პრადო”, რომლითაც დღეს შუახევის გამგებელი სარგებლობს.
ვარშალომიძის ხელისუფლების უფლებამოსილების ბოლო დღეებში, ქონების სხვადასხვა უწყებების გადაცემისა და ნივთების მთავრობის აპარატიდან მოხსნა ამითი არ დასრულებულა. ყოფილ მთავრობამ ჩამოწერა 100 ათას ლარიანი გენერატორი “კომაცუ” და სხვა აპარატურა.
“ჩვენ ვთვლით, რომ ეს არის გარკვეულწილად შურისძიება ახალი ხელისუფლების მიმართ. როგორც კი არჩევნებში წააგეს, მთავრობის აპარატის ბალანსზე რიცხული ერთი ავტომანქანა “ჰიუნდაი სონატა” სარგებლობის უფლებით გადაეცა ბათუმის მერიას, რომელიც საჭიროებიდან გამომდინარე დავიბრუნეთ. ხოლო ამ ეტაპზე სამი ავტომანქანა “ტოიოტა ჯაილუქსი” და ერთი მიკროავტობუსი ჯერ კიდევ რჩება ანსამბლ “ბათუმის” , ბათუმის მერიის, ხელვაჩაურისა და ქობულეთის მუნიციპალიტეტების საკუთრებაში. არ გამოვრიცხავთ საჭიროების შემთხვევაში მათ დაბრუნებას” – ამბობს აჭარის მთავრობის იურიდიული დეპარტამენტის ხელმძღვანელი პარმენ ჯალაღონია.
ახალ მთავრობას წინამორბედისაგან მემკვიდრეობით რესტორნებისა და სასტუმროების ვალებიც ერგოთ, თუმცა ამის შესახებ “გურია ნიუსი” სხვა მასალებში შემოგთავაზებთ.
