მან კომენტარი გააკეთა ასევე ბრიუსელში, ქართული დელეგაციის ვიზიტზეც.
_ ბატონო მიხეილ, ქართული დელეგაციის ბრიუსელში გამართულ შეხვედრაზე პრეზიდენტმა განაცხადა, პირველად მოხდა ისტორიაში ისე, რომ ევროკავშირისა და საქართველოს ერთობლივი დოკუმენტი ჩავარდა საქართველოს დელეგაციის წინააღმდეგობის გამო. დელეგაციის ხელმძღვანელი თინა ხიდაშელი კი აცხადებს, რომ ყველაფერმა ძალიან კარგად ჩაიარა. რითია უმცირესობა უკმაყოფილო?
_ ამ რეზოლუციაში საუბარი იყო არა მხოლოდ შიდაპოლიტიკურ საკითხებზე, არამედ ისეთ პრობლემებზე, რომელიც ჩვენს ქვეყანას აქვს იგივე ოკუპაციასთან, რეფორმებთან დაკავშირებით. მე ვფიქრობ, კარგი იქნებოდა, რომ ეს რეზოლუცია მიეღო ევრო პარლამენტს. ვინაიდან ჩვენი დელეგაციის წევრები ითხოვდნენ, რომ დაფიქსირებულიყო ის, რაც ჩვენ მიგვაჩნია რომ რეალურად პრობლემაა ამ ქვეყანაში და უმრავლესობამ ამას მხარი არ დაუჭირა, რეზოლუცია არ გავიდა. მე როგორც მოვუსმინე გიორგი კანდელაკს, საბოლოო ჯამში, ძალიან დაბალანსებული რეზოლუცია იყო, მაგრამ ვინაიდან არც ასეთი რეზოლუციის მიღება უნდოდათ უმრავლესობის წევრებს, ასე მოხდა.
_ ამ შეხვედრაზე, დელეგაციის ხელმძღვანელმა, თინა ხიდაშელმა ძალიან სერიოზული განცხადება გააკეთა. მისი თქმით, 2004 წლიდან – 2012 წლის ჩათვლით, 10 ათასამდე შემთხვევაა დაფიქსირებული, როცა ბიზნესმენებმა მათი საკუთრება, უძრავ-მოძრავი ქონება სახელმწიფოს “აჩუქეს”. ქალბატონი თინას განცხადებით, გამოსაძიებელია თითოეული ეს საქმე. “ნაციონალური მოძრაობის” ხელისუფლებაში ყოფნის პერიოდზეა საუბარი…
_ მერე, გამოიძიონ, გამოიძიონ… ჩვენ საერთოდ ვერ ვხედავთ პრობლემას, როდესაც ჩვენი ოპონენტები ამბობენ, რომ საქმე გამოსაძიებელია. ჩვენი მთავარი პრობლემაა, რომ ეს არ იყოს პოლიტიკურად მოტივირებული. თუ გამოსაძიებელია, გამოიძიონ, მაგრამ ნუ ექნება ადგილი პოლიტიკურ ანგარიშსწორებას. თუ არიან ისეთი ადამიანები, რომლებიც თავიანთი ქონების გასხვისების საკითხს ეჭვქვეშ აყენებენ, კი ბატონო, გამოიძიონ. თუ მიაჩნიათ, რომ რამე არასწორად იყო, შესაბამისი ღონისძიებებიც გაატარონ.
_ პრეზიდენტმა განაცხადა, “ბევრჯერ იმიტომ უშვებენ გარეთ, რომ ბევრჯერ იჭერენო.” “ნაციონალური მოძრაობის” ხელისუფლებაში მოსვლის პერიოდშიც არ იჭერდნენ ცოტას, მაგრამ ცოტას უშვებდნენ. როგორც თქვენ თვლით ახლა, რომ ეს საქმეები პოლიტიკურად არის მოტივირებული, ისე თვლიდნენ თქვენს დროსაც. რა გამოდის, რითია განსხვავებული ეს დაჭერები?
_ ჩვენ აქ ვსაუბრობთ არა მხოლოდ თანამდებობის პირებზე და არც მოგვითხოვია ამ საკითხებთან დაკავშირებით რაიმე ლმობიერი პოზიციის გამოჩენა. სხვა რამეზეა საუბარი. წინა კვირას მე ვიყავი გურიაში და იქ მე მელაპარაკებოდნენ ჩვენი რიგითი კოორდინატორები, რომლებიც მეუბნებოდნენ, რომ დაკითხეს მხოლოდ იმიტომ, რომ იყვნენ “ნაციონალურ მოძრაობაში”. კიდევ ერთხელ გიმეორებთ, საუბარია პოლიტიკური ნიშნით დაკავებებზე.
რაც შეეხება უგულავას საქმეს, რატომ თხოვდნენ მას გირაოს? იმიტომ, რომ არ დამალვოდა გამოძიებას, ხო? გიგი უგულავა არ ემალება გამოძიებას, ემალება? ამიტომაც ჩათვალა მოსამართლემ, რომ უგულავას მიმართ არ იყო საჭირო არანაირი აღმკვეთი ღონისძიება.
თან, ამ მილიონიანი გირაოს მოთხოვნის მიზანი რა იყო? იცოდნენ, რომ უგულავა ვერ გადაიხდიდა და როცა გირაოს ვერ იხდი, უნდა წახვიდე ციხეში, ხო?
_ უგულავასთან ერთად კეზერაშვილზეც მიიღო სასამართლომ გადაწყვეტილება და მას პატიმრობა შეუფარდეს. თქვენი გუნდის საკმაოდ მნიშვნელოვანი წევრის დასაცავად, რატომღაც, ხმა არავის ამოგიღიათ…
_ კეზერაშვილს დაიცავს ადვოკატი. დათო კეზერაშვილი რომ გამოცხადებულიყო სასამართლოზე და გამოძიებისთვის მიეცა ჩვენება, დარწმუნებული ვარ, მის მიმართ ასეთი მკაცრი ღონისძიება არ გატარდებოდა.
_ გამოდის, რომ ადეიშვილს და კეზერაშვილს გასაქცევად ჰქონიათ საქმე. თქვენ როგორ ფიქრობთ?
_ მე მათ ადგილას, ზურას ადგილას, ასე არ ვიზამდი…
