“პირში წყალი გამოივლონ “ნაციონალებმა, “ოცნების” საკადრო პოლიტიკის გაკრიტიკებამდე”

_ 2012 წლის საპარლამენტო არჩევნების შემდეგ, საჯარო სამსახურებში კადრების შეცვლა მიმდინარეობს. პარლამენტის წევრის, ირმა ნადირაშვილის თქმით, ტენდეცია ჩამოყალიბდა საქართველოში, რომ “ნაციონალური მოძრაობის” კადრების განდევნა ხდება და მათი უფლებები ირღვევა.

_  ჯერ კიდევ არჩევნების წინა პერიოდში “ნაციონალების” ხელისუფლებამ ორი პარალელური პროცესი განავითარა. ერთის მხრივ, დაიწყეს არასაიმედო საჯარო მოსამსახურეების შევიწროება და მათი სამსახურებიდან დათხოვნა და მეორეს მხრივ, დაიწყეს კადრების უზომოდ გაბერვა ყველგან, სადაც ამის საშუალება მიეცათ.  ამ სამსახურებში ყოველგვარი დასაბუთების, საჭიროების და ფიანანსური მიზანშეწონილობის გარეშე უპრეცენდენტოდ დიდი რაოდენობის ადამიანების მიღება ხდებოდა, ერთგულების და საარჩევნო ხმების სანაცვლოდ. ასე ხდებოდა მთელს საქართველოში, დაწყებული თბილისიდან, დამთავრებული ოზურგეთით. მარტო თბილისში იმდენი კანონდარღვევითი დანიშვნა განახორციელა უგულავამ, რომ ამის მეათედის გამო, სალონიკის მერს პირდაპირ ციხეში ამოაყოფინეს თავი. ოზურგეთშიც იგივე ხდებოდა და ჩვენ ეს ყველამ კარგად ვიცით. ასე რომ, თუ ასე წინასაარჩევნოდ დასაქმებულების გათავისუფლებაზეა საუბარი, ეს სპეციფიური საკითხია და პირდაპირ კავშირშია ამ სამსახურების რეორგანიზაციის აუცილებლობასთან. თუ საუბარია იმაზე, რომ სოფლის რწმუნებულები იცვლებიან, ესეც სრულიად მისაღებია ჩემთვის, რადგან სოფლად ჩვენი ხელისუფლების უმნიშვნელოვანესი პოლიტიკის გატარებაში აბსოლუტურად სანდო ადამიანები გვესაჭიროებიან.

კვაჭანტირაძის თქმით, თუ რომელიმე კანდიდატზე  ინფორმაცია გაააჩნია და მისი დანიშვნის საწინააღმდეგო არგუმენტები ექნება, ამას აუცილებლად ეტყვის ადგილობრივ ხელისუფლებას, მაგრამ გადაწყვეტილების მიღება და შესაბამისად პასუხისმგებლობაც სრულად მათი საქმეა.

_ ხომ არ ფიქრობთ, რომ საუკეთესო გამოსავალი კონკურსის წესით დანიშვნა იქნება ამ შემთხვევაში?

_ მინდა მხარი დავუჭირო იმ აზრს, რომ საჭიროა სხვადასხვა მიზეზით გამოთავისუფლებულ თანამდებობებზე კონკურსის წესით დანიშვნები განხორციელდეს.

ამით ყველას მიეცემა საშუალება თავისი ადგილისთვის იბრძოლოს საჯარო სამსახურებში, ნებისმიერი პოლიტიკური ძალის მხარდამჭერს და რა თქმა უნდა, ქართული ოცნების მხარდამჭერებს. გამგეობის საკვანძო თანამდებობებზე დასანიშნად კანდიდატთა თანაბარი საკვალიფიკაციო მონაცემების შემთხვევაში, ახალი ხელისუფლების აქტიურ მომხრეთა სასარგებლოდ გადაწყვეტილებებს მხარს დავუჭერ და ამაში ვერავინ გამამტყუნებს. ჩვენ გვჭირდება ადამიანები, რომელთაც ახალი ხელისუფლების წარმატება გულით სწადიათ და სამსახურში მხოლოდ ხელფასის მისაღებად არ ივლიან.

მითუმეტეს არ გვჭირდება ისეთი თანამშრომლები, რომელთა საქმიანობაში ხელისუფლების პოლიტიკის ბოიკოტირება შეიმჩნევა.

_ ანუ, ვინც წინასაარჩევნო კამპანიაში იყო ჩართული “ნაცმოძრაობის” მხარდასაჭერად, ისინი საჯარო სამსახურებში აღარ უნდა მუშაობდნენ?

_ საჯარო სამსახურს აუცილებლად უნდა გამოემშვიდობონ ის პირები, ვინც აქტიურად და უხეშად იყვნენ ჩართულები საარჩევნო კამპანიაში, ვინც პირდაპირი გაგებით მართლსაწინააღგმდეგო ქმედებებს ჩადიოდნენ და ხელს გვიშლიდნენ საარჩევნო კამპანიის წარმართვაში. მათ ყველა კარგად იცნობს. სამწუხაროდ, ისინი ჯერ კიდევ ისევ რჩებიან ხელისუფლების სტრუქტურებში, კონკრეტულად ოზურგეთშიც. წარმოდგენილი გაქვთ, სასწაული რომ მომხდარიყო და ნაციონალებს მოეხერხებინათ არჩევნების თავის სასარგებლოდ გაყალბება რა დღე გველოდა ჩვენ, ოცნების მხარდამჭერებს. ბევრი ჩვენთაგანის გზა და კვალი საძებნელი გახდებოდა. ეს რომ ასე იქნებოდა და არა სხვაგვარად, ყველამ კარგად ვიცით. ასე რომ, პირში წყალი გამოივლონ ნაციონალებმა, როდესაც საკადრო პოლიტიკაში აკრიტიკებენ ქართული ოცნების ხელისუფლებას. მე ვარ კოჰაბიტაციის მომხრე და ეს ყველამ იცის და მიმაჩნია, რომ ყველა კარგი და გამოცდილი კადრი, რომელიც ნაციონალების დროსაც მუშაობდა თანამდებობებზე დღესაც გამოსაყენებელია საჯარო სამსახურში, თუ ისინი, რა თქმა უნდა, დანაშაულებებს არ ჩადიოდნენ. ნაციონალები ახლა ხავსს ეჭიდებიან, მათი დაშლის პროცესი აქტიურ ფაზაში შედის და სრულიად უიმედო მომავალს რომ ხედავენ, გასაგებია მათი მღელვარება.