_ სადაც პავლონია მაქვს დარგული, იქვე ახლოს თხილის ბაღიც მაქვს და ყოველდღე მოვდივარ აქ. დღეს მინდოდა თხილის ბაღის გასუფთავება და ასევე ვაპირებდი რამდენიმე ადამიანის დახმარებას და კი ხედავთ, რა ხდება ახლა ჩემს მიწის ნაკვეთზე. ამაზრზენი ფაქტი არის ეს, რაც მოხდა. ეს იყო საჩვენებელი ნაკვეთი, აქედან ეკონომიკურ შედეგს რომ მივიღებდი, მინდოდა შემდეგ სოფლის მცხოვრებლებსაც გაეშენებინათ პავლონია, რომ გამოსულიყვნენ დუხჭირი ცხოვრებიდან. _ გვითხრა ნუგზარ გიორგაძემ.
მისივე თქმით, ეს ყველაფერი პოლიტიკას უკავშირდება:
_ მე, არც ვმალავ და ყველგან ვამბობ, რომ ვარ “ქართული ოცნების” მხარდამჭერი. სოფელში იმყოფებოდა ზვიად კვაჭანტირაძე, რომელიც დეპუტატობის კანდიდატია და იქ ვთქვი, სოფლის განვითარების პროგრამების შესახებ, რა სრულდებოდა და რა არ სრულდებოდა. საქართველოში, კონსტიტუციით, ნებისმიერ ადამიანს აქვს აზრის, სიტყვის და თავისუფლების გამოხატვის უფლება და მეც ვამბობ იმას, რაც არის სიმართლე.
შევცდი, 2003 წელს, როდესაც მოვიდა ეს ხელისუფლება მე აქტიური მხარდამჭერი ვიყავი მათი, იმიტომ, რომ ედუარდ შევარდნაძემ ეკონომიურად დაანგრია ეს ქვეყანა. შევარდნაძის დროს ორი სოფლის გამგებელი ვიყავი და ასევე საკრებულოშიც ვიყავი, რამდენჯერ მქონდა საკითხი დაყენებული, რომ სოფლისთვის მიეხედა, მაგრამ არაფერი გამოდიოდა. პრობაციონერიც გამხადეს, რადგან ოპოზიციონერი ვიყავი, მე შევცდი, იმ ავბედით დღეებში მიხეილ სააკაშვილს დავუჭირეთ მხარი ჩემს მეგობრებთან ერთად. მეგონა, რომ უკეთესი მდგომარეობა იქნებოდა და აი, შედეგი, რაც მოხდა, ორღობეში დასდევენ ხალხს დასაშინებლად _ ნუ შევშინდებით. _ თქვა ჩვენთან საუბრის დროს ნუგზარ გიორგაძემ.
“ქართული ოცნების” ოზურგეთის რაიონული ორგანიზაციის ერთ-ერთი ლიდერის თემურ სალუქვაძის თქმით, ნუგზარ გიორგაძე ეროვნული მოძრაობიდან მოდის და მას კარგად იცნობენ ოზურგეთში.
_ რამდენიმე დღის წინ, როდესაც “ქართული ოცნების” ოზურგეთის მაჟორიტარი დეპუტატობის კანდიდატმა ზვიად კვანჭატირაძემ შეხვედრა ჩაატარა სოფელ ცხემლისხიდში, ნუგზარმა სოფლის საჭირბოროტო საკითხები დააყენა, რაც ცხადია, ხელისუფლებას არ მოსწონს. წინასწარ, სანამ არ 
ჩატარდება გამოძიება, რაიმე შეფასების გაკეთება ძალიან რთულია, მაგრამ მე მაქვს ჩემი მოსაზრება. ეს ვინც ჩაიდინა, ის სახელმწიფოს სიკეთეს ვერ მოუტონს, _ გვითხრა თემურ სალუქვაძემ.
რუსუდან მემარნიშვილის (ნუგზარ გიორგაძის მეუღლე): _ ეს არის ვანდალიზმი, ეს არის სიბოროტე. ეს ღამე არის გაკეთებული, გუშინ საღამოს ჩემი მეუღლე იყო ნაკვეთში, ყოველ დილით და საღამოს ათვალიერებს ნაკვეთს. ჩვენი ხელით დარგული იყო ეს პავლონიის ნერგები. ეს ხომ ადამიანის გაკეთებული არ არის, მხეცები. როგორმა ადამიანმა უნდა გააკეთოს ეს ვერ გეტყვით.
როგორც “გურია ნიუსისთვის” არის ცნობილი ნუგზარ გიორგაძეს 3500 ლარზე მეტი დაუჯდა პავლონიის ნერგების ყიდვა. როგორც მან გვითხრა, არც ისე ადვილად იშოვნება პავლონიის ნერგები.
