“ის ყველაზე ეფექტური მინისტრი იყო. აქ რომ მოვდიოდი ვნახე ვიღაც ჭკუანაკლულის დაწერილი, რომ არ არის ეს კაცი გურულიო, გვარად ნიკოლიშვილიაო, სადღაც მარტყოფს დაამთავრა სკოლაო, მეათე კლასში უკვე იცოდა მთავრობაში რომ უნდა მოხვედრილიყოო და გვარი გადაიკეთაო, მინდა გითხრათ, რომ რაც არ უნდა გვარი ჰქონდეს ამ კაცს, რომ შეხედავ და დაელაპარაკები, ამაზე მეტი გურული არ დაიარება დედამიწის ზურგზე. გურული შემთხვევითობა, გურული გონებაგახნილობა, გურული გულიანობა _ აი, რა არის საჭირო, რომ გაკეთდეს საქმე და მიიყვანოს ბოლომდე, არ დანებდეს, რამდენჯერ დაურეკავს დილის 5 საათზე, 6 საათზე, რომ ახალი ანძა დავაყენეთ, ეს გავაკეთეთ, ის გავაკეთეთ, 5 სართული დავადგით, ოთხი კილომეტრი დავამატეთ, ასეთი ხალხი საძებარია… აი, ეგ არის, რა დროს ტყუილად დროის ფუჭად ხარჯვაა, რა დროს ხელების ჩამოშვებაა, ახლა არის საქართველოს წინსვლის დრო. რაც ორდენები არსებობს ყველა მიცემული მაქვს მისთვის, აღარ ვიცი ახლა კიდე რა შეიძლება მივცე… ამიტომ, ერთი რამე გვინდა, მიეცით საშუალება მასაც და ჩვენ გუნდსაც გააგრძელოს ის, რაც დავიწყეთ და ყველა ოჯახს მივუტანოთ მეტი სარგებელი, აბა თქვენ იცით!” _ განაცხადა პრეზიდენტმა სოფელ შემოქმედში.
“ყველაზე მეტად მე დავდივარ გურიაში, თქვენ იცით, რომ როგორ გავაკეთეთ ბახმარო, ბახმაროზე არანაკლები კურორტი არ არის გომი; რამაზმა იცის, რომ გზის ნაწილი გააკთდა, მომავალ წელს მთლიანად უნდა დავასრულოთ გომის გზა და როგორც ბახმარო განვავითარეთ, მასზე არანაკლები და მნიშვნელოვანი კურორტია გომი; ხალხი უნდა დავასაქმოთ, მარტო ჩვენ კი არ უნდა დავტკბეთ, ჩამოვიდნენ თბილისელები, ბათუმელები, უცხოეთში წასული ქართველები, უცხოელები, ვინც კი ფულს გადაიხდის და გაგვაძლიერებს… ჩვენი ამოცანაა საქართველოს წინსვლა და აღორძინება. ამიტომაც შეიძლება ვიღაცამ თქვას, რომ კი, ამ მთავრობამ გააკეთა ყველაფერი, მაგრამ ვინც უფრო კარგად მოგვხედავს, ის მოვიდეს, მაგრამ მე მინდა ყველას გითხრათ, ეგ ყველაფერი რაც გაგვიკეთებია, კორუფციასთან ბრძოლა და კრიმინალის დამარცხება, წინსვლა უმაღლეს სასწავლებელში ქრთამს რომ არ გვართმევენ, ის რომ ტრასაზე ინსპექტორები არ დგანან ხელგამოწვდილი, ის რომ ოზურგეთის ცენტრში ამდენი რამ გაკეთდა და ასეთი აღმშენებლობა არის, ეს ყველაფერი მოვიდა დიდი ოფლით და შრომით; ამიტომ, ყველაფერს აქვს პოლიტიკური ფასი. თუ საქართველო დღეს უკეთესი ქვეყანაა, ვიდრე 8 წლის წინ, -გინდათ უკან დაბრუნება? გინდათ თუ არა უკან დაბრუნება ძველ ფინანსთა მინისტრთან? გინდათ თუ არა უკან დაბრუნება, გზა რომ არ გქონდათ? ეს გზა რამაზმა გააკეთა; თქვენ კარგად იცით გზების დაგების მაგივრად, რაც კეთდებოდა, გვინდა წინსვლა, იცით აჭარაში ასლან აბაშიძის მთელი შემადგენლობა იყრის კენჭს, ეს ის ხალხი არ არის გურიასთან შემაერთებელი ხიდები რომ ააფეთქა? ყველანი ერთად ასლანი აკლიათ მარტო და აი, ასეთი ხალხია და უკან მოდის ეს მთავრობა… არა, მოდის კი არა, მოსვლა უნდათ, მაგრამ მანამდე როგორც იტყოდა ერთი გურული – არა, არაფერიც არ გამოუვათ, იმიტომ, რომ რეალურად არის საქართველო მომავალი! ეშმაკსაც წაუღია პრეზიდენტი, მაგრამ საქართველო, რაც აგვიშენებია, არ უნდა გავაყოლოთ წყალს… ამიტომ, ეს კაცი რამაზ ნიკოლაიშვილი, რომელმაც 4 გულის ოპერაცია გაიკეთა უკვე _ მესამე გულის ოპერაცია რომ გაიკეთა, ამის გარეშე წავედი რიკოთის გვირაბის გასახსნელად და მარტომ გავიარე რიკოთის გვირაბი, გავიხედე, უკან მოვიხედე და ვიღაცა უკან მომდევს, კრეისერული სიჩქარით, გავიხედე ვინ არის და საწოლიდან ამდგარი გადაბინტული რამაზი, გულის ოპერაციიდან მოვიდა მშენებლობაზე! აი, ესეთი ხალხი ბევრი არა გვყავს. ეს არის ყველაზე საუკეთესო, მიბაძეთ, მეც ვბაძავ და ვსწავლობ რამაზისგან ყველაფერს… ახლა კი მივცეთ მას უფლებამოსილება, რომ წარმოგიდგინოთ თქვენ. და ჩვენ ყველაფერს გავაკეთებთ თითოეული თქვენგანის ოჯახების წინსვლისათვის!”, _ უთხრა სააკაშვილმა მოსახლეობას.
