“გურია ნიუსი” საჩივრის ტექსტს, რომელსაც 140 ექიმი აწერს ხელს, უცვლელად გთავაზობთ. ექიმები “გურია ნიუსთან” აცხადებენ, რომ ხელმოწერა ხვალაც გაგრძელდება
“მოგახსენებთ, რომ 2012 წლის მაისში, ყოველგვარი კონტრაქტის გარეშე შპს “უნიმედი აჭარა ქობულეთის სამედიცინო ცენტრში” შემოვიდა “ალდაგი ბისიაი”, ჩვენთვის უცნობია, რა მიზნით შემოვიდა აღნიშნული კომპანია ჩვენს სამედიცინო ცენტრში, რადგანაც თანამშრომლებს არ შეხვედრია და არანაირი გასაუბრება არ შემდგარა “ალდაგი ბისიაის” წარმომადგენლებთან. 31 მაისს, ქალთა კონსულტაციის და სამშობიაროს ორსართულიანი შენობა, სადაც განთავსებულები ვიყავით, დაგვაცლევინეს სასწრაფო წესით და შრომითი კოლექტივი პაციენტებთან ერთად გადაგვიყვანეს სხვა შენობაში.
გადაგვიყვანეს ქობულეთის სამედიცინო ცენტრში, სადაც არ არის არანაირი პირობები, არის ანტისანიტარია, სივიწროვე, სამშობიარო ბლოკის გვერდით კარდიოლოგიური პალატებია, 10-საწოლიან მელოგინეთა და ორსულთა განყოფილებას (ამას ზედ ემატება მედპერსონალიც) ერთი საერთო სველი წერტილი აქვს, ონკანიც აქვეა განთავსებული და ჭურჭელიც აქ ირეცხება. ბავშვთა განყოფილებას კი ონკანი საერთოდ არ გააჩნია. მიუხედავად იმისა, რომ ამ ყველაფრის შესახებ პირველი დღიდანვე იცოდა “ალდაგის” წარმომადგენელმა, “ჩემი ოჯახის კლინიკის” საოპერაციო დეპარტამენტის დირექტორმა გიგა ნემსაძემ, მდგომარეობა უცვლელი რჩება. მიუხედავად ჩვენი არაერთგზის თხოვნისა, რომ მოეწესრიგებინათ ელემენტარული ჰიგიენური პირობები, კომპანიამ ყურადღებაც არ მოგვაქცია. მათ არ გაითვალისწინეს არც ის, რომ ჩვენ პასუხისმგებლები ვართ თითოეული პაციენტის ჯანმრთელობაზე, რაც არსებულ პირობებში რისკის ქვეშ იდგა.
მიმდინარე წლის ივნისში, სამედიცინო ცენტრის მოსანახულებლად ჩამოვიდა ზურაბ ჭიაბერაშვილი “ალდაგი ბისიაის” წარმომადგენელთან გიგა ნემსაძესთან ერთად, რომლებიც შეგვპირდნენ, რომ ჩვენს სამედიცინო ცენტრში მაქსიმალურად გააუმჯობესებდნენ პირობებს, მაგრამ დღესაც გვიწევს ამგვარ პირობებში მუშაობა და პაციენტების მიღება.
წინასაარჩევნო პერიოდში “ალდაგი ბისიაიმ” გადაწყვიტა შეემცირებინა ტარიფები და სექტემბრის თვეში კონსულტაცია გახდა 10 ლარი, ამჟამად კი ეს მომსახურება 25 ლარს შეადგენს, 400-ლარიანი მშობიარობა გახდა 600 ლარი; 290-ლარიანი რეანიმაცია _ 450 ლარი. ერთი ღამის საფასური სამკურნალოდ შემოსული პაციენტებისთვის, თანაც ყოველგვარი პირობების გარეშე, 100-ლარი ღირს. კლინიკაში არსებულმა ფასების შეცვლამ მოსახლეობაში გამოიწვია უკმაყოფილება და მათი რაოდენობა მნიშვნელოვნად შემცირდა. გარდა ამისა, გაზრდილი ფასების გამო, პაციენტების მხრიდან არაერთხელ ჰქონია ადგილი ექიმების სიტყვიერ შეურაცხყოფას.
მომატებულ ფასებთან შედარებით, კატასტროფულად გამოიყურება ექიმების ხელფასები, რადგანაც ქობულეთელი ექიმების საშუალო ხელფასი საარსებო მინიმუმზე დაბალია (100-იდან 120 ლარამდე მერყეობს).
სიტუაციის შესასწავლად, დაახლობით ერთი კვირის წინ ჩამოსული იყო ვინმე ვანო ბოკერია, რომელიც წარსდგა, როგორც “ალდაგი ბისიაის” წარმომადგენელი, მან კლინიკის დათვალიერების შემდეგ გამოხატა აღშფოთება არსებული პირობების გამო და განგვიცხადა, რომ ექიმებს ანაზღაურება ექნებათ გამომუშავების შესაბამისად. აღნიშნულ განცხადებას ექიმებში მოჰყვა აღშფოთება, რადგან საკურორტო სეზონის შემდე, ბუნებრივია, პაციენტთა ნაკლები რაოდენობა ფიქსირდებოდა, რასაც ემატებოდა ისიც, რომ შეუსაბამო პირობების გამო, პაციენტებს აღნიშნულ დაწესებულებაში მკურნალობა არ უნდოდათ. ამ ყველაფერს ზედ ერთვოდა არჩევნების შემდეგ გაორმაგებული ფასები. როდესაც მედპერსონალმა აღნიშნულ საკითხებზე დაიწყო საუბარი, “ალდაგი ბისიაში” დაიბარეს მთავარი მენეჯერი ნანა ვერულიძე, რომელსაც უთხრეს, რომ რადგან ის ვერ იმორჩილებდა კოლექტივს და რადგან ექიმებმა ჟურნალისტებთან კომენტარები გააკეთეს, რის აღკვეთაც მთავარმა მენეჯერმა ვერ მოახერხა, ის უნდა წასულიყო ქობულეთის კლინიკიდან და სამაგიეროდ, შესთავაზეს ჩაქვის საავადმყოფოში გადაყვანა, რაზედაც ამ უკანასკნელმა, ჩვენი ინფორმაციით, უარი განაცხადა.
ამის შემდეგ, თბილისში იბარებენ მენეჯერს სამედიცინო დარგში ზაალ მიქელაძეს, რომელმაც გუშინ, 30 ოქტომბერს, ჩამოსვლისთანავე განაცხადა, რომ იმ საუბრების შემდეგ, რაც მას ქონდა “ჩემი ოჯახის კლინიკის” ხელმძღვანელობასთან, ის უარს ამბობდა ამ კომპანიასთან თანამშრომლობაზე. ზაალ მიქელაძის ამ განცხადებას წინ უძღვოდა ექიმთა მასობრივი პროტესტი საავადმყოფოს ეზოში, რომელსაც ესწრებოდა საავადმყოფოს მენეჯერობის ახალი კანდიდატი ეკა გორაძე და “ჩემი ოჯახის კლინიკის” წარმომადგენელი ცინცაძე.
ექიმებმა აქციაზე კიდევ ერთხელ დააფიქსირეს გაუსაძლისი პირობები და მონური შრომა და მხარდაჭერა გამოუცხადეს ზაალ მიქელაძეს, რომელმაც იძულების შედეგად დატოვა თანამდებობა.
გუშინვე, მედიის თანდასწრებით, ეკა გორაძემ ზაალ მიქელაძე დაადანაშაულა აქციის მოწყობაში და დაემუქრა, რომ ამას არ შეარჩენდა.
გუშინვე, 30 ოქტომბერს, ქობულეთის სამედიცინო ცენტრის ადმინისტრაციის გადაწყვეტილებით, კლინიკაში დასაქმებული 316 თანამშრომლიდან 34 თანამშრომელს (მათ შორის მედპერსონალი 23, დანარჩენი ტექნიკური სამსახური და ადმინისტრაცია), რომელსაც 1 ნოემბრამდე ქონდა კონტრაქტი, აღარ გაუგრძელდა შრომითი ხელშეკრულება. რამდენიმე საათით ადრე კი, “ჩემი ოჯახის კლინიკის” წარმოამდგენლები მედიისთვის მიცემულ ოფიციალურ კომენტარში აცხადებდნენ, რომ მხოლოდ 15 ადამიანის გათავისუფლებაზე იყო საუბარი, რაც ასევე მიუღებელია ჩვენთვის.
დღეს, 01 ნოემბერს ცნობილი გახდა, რომ ეკა გორაძე ჩავიდა ქობულეთის სამედიცინო ცენტრში და განყოფილების გამგეებს უკავშირდებოდა, რათა ისინი მას წაყოლოდნენ “ალდაგი ბისიაის” ოფისში მოლაპარაკების მიზნით, რაზედაც განყოფილების გამგეებმა განაცხადეს უარი და საპასუხოდ მიიღეს მუქარა, რომ ამ პროტესტის გამო ისინი დატოვებდნენ თანამდებობებს.
დღეს ასევე გახდა ცნობილი, რომ ხელმძღვანელობამ სიტყვიერად განუცხადა თანამშრომლებს, რომ პირველი ნოემბრიდან ყველა გათავისუფლებულია სამსახურიდან.
ყოველივე ზემოაღნიშნულიდან გამომდინარე, როგორც საქართველოს მთავარ პროკურორს, გთხოვთ, დაიწყოთ აღნიშნულ ფაქტთან დაკავშირებით გამოძიება, მიმართოთ კანონით გათვალისწინებულ ყველა ზომას, რათა გამოავლინოთ სისხლის სამართლებრივ პასუხისგებაში მისაცემი პირები, რომ მათ კანონის მთელი სიმკაცრით აგონ პასუხი.
მე-2, მე-3 და მე-4 ადრესატებს კი, ყოველივე ზემოაღნიშნულთან დაკავშირებით გთხოვთ, რეაგირებას თქვენი უფლებამოსილების ფარგლებში, – ნათქვამია საჩივარში.
