ორი თვის წინ, როცა “კოალიცია ქართული ოცნების” პრემიერ-მინისტრობის კანდიდატმა ბიძინა ივანიშვილმა მომავალი მთავრობის წევრობის კანდიდატები წარადგინა, აღნიშნა, რომ რეგიონული განვითარებისა და ინფრასტრუქტურის სამინისტრი გაუქმდებოდა. მაშინდელი გეგმით, ინფრასტრუქტურულ ნაწილს ეკონომიკისა და მდგრადი განვითარების სამინისტრო შეითავსებდა, რეგიონული განვითარების ნაწილს – სპეციალურად ჩამოყალიბებული სამსახური. ეს უკანასკნელი კი, პრემიერ-მინისტრს დაექვემდებარებოდა. ახალმა მთავრობამ რეგიონული განვითარებისა და ინფრასტრუქტურის სამინისტროს გაუქმების პროცესი, მინიმუმ, ერთი წლით გადაიდო.
“თავდაპირველად, სამინისტროს რეორგანიზაცია და ცალკეული მიმართულებების სხვა უწყებებისთვის გადაცემა იყო დაგეგმილი. მას შემდეგ, რაც ჩვენი პროექტები, ასევე ეკონომიკისა და მდგრადი განვითარების სამინისტროს მიმდინარე საქმიანობა და პროექტები დეტალურად გაანალიზდა, აღმოჩნდა, რომ ამ ორი უწყების გაერთიანებას, ცალკეული პროექტების გახორციელებისათვის შესაძლოა ხელი შეეშალა. გარკვეული ოპტიმიზაცია ნამდვილად არის დაგეგმილი. მარაბდა-კარწახის რკინიგზა ჩვენი სამინისტროსგან “საპარტნიორო ფონდს” გადაეცემა. ასევე შიდა სტრუქტურული ოპტიმიზაციის საკითხებზე ვიმუშავებთ, მაგრამ ჯერჯერობით, 2013 წლისთვის სამინისტრო, როგორც ცალკე დაწესებულება, რჩება… რა იქნება 2014 წელს, ამას გვაჩვენებს პროექტები, ის აქტივობა, რომელიც ჩვენს მიერ 2013 წლის განმავლობაში გახორციელდება,” _ ამბობს საქართველოს რეგიონული განვითარებისა და ინფრასტრუქტურის მინისტრი დავით ნარმანია.
პარლამენტში წარდგენილი 2013 წლის სახელმწიფო ბიუჯეტის პროექტში, რეგიონული განვითარებისა და ინფრასტრუქტურის სამინისტროსთვის 901 მილიონი ლარია განსაზღვრული.
