“გურია ნიუსთან” ინტერვიუში მან პირველად დაასახელა იმ ადამიანების ვინაობა, რომლებიც მის გუნდში მოიაზრებიან. უფრო კონკრეტულად რომ ვთქვათ, ჩოხატაურის გამგებლის მოადგილეებად ირაკლი ახობაძე და მაია კუტუბიძე დაინიშნებიან.
_ ეკონომიკურ ბლოკს ჩავაბარებ მაია კუტუბიძეს, მის პროფესიონალიზმთან დაკავშირებით ჩოხატაურის საზოგადოებას, მე მგონი, კითხვები არ უნდა ჰქონდეს. რაც შეეხება სოციალურ სფეროს, მას ჩაიბარებს ირაკლი ახობაძე.
_ სამსახურის უფროსების შესახებ რას გვეტყვით?
_ შევხვდით მე და ბატონი თემურ ჭკუასელი და გვქონდა საუბარი. ცვლილებები რომ იქნება, ეს გარდაუვალია და ხალხის მოთხოვნაა. მოხდება ჩანაცვლებებიც, გამოვიყენებთ ყველას პროფესიონალიზმსაც. იმის თქმა მინდა, რომ, ჯერჯერობით, არავის საერთოდ სახლში გაშვებას არ ვაპირებ.
_ ანუ ყველა სამსახურის უფროსი დარჩება და ცვლილებები მხოლოდ მოადგილეებს შეეხებათ?
_ არა, რა თქმა უნდა, ცვლილებები სამსახურის უფროსებსაც შეეხებათ, ყოველ შემთხვევაში, უმრავლესობას, მაგრამ მათ თუ სურვილი ექნებათ, მუშაობას გააგრძელებენ, ოღონდ არა სამსახურის უფროსის რანგში.
_ რომელი სამსახურის უფროსის შეცვლა გაქვთ დაგეგმილი და თუ გყავთ მათი შემცვლელები მოძებნილი?
_ საერთოდ, არ მახასიათებს ადვილად გადაწყვეტილებების მიღება. მით უმეტეს, როცა საქმე სამსახურს, ჩემს რაიონს და ქვეყანას ეხება. როცა რაიმე გადაწყვეტილება იქნება საბოლოოდ მიღებული, ექსკლუზივს თქვენ მოგცემთ, ისევე როგორც დღეს დავადასტურე პირველად, რომ ერთ-ერთი მოადგილე იქნება მაია კუტუბიძე.
_ როგორც გამგეობის თანამშრომლებმა გვითხრეს, დღეს (საუბარი ჩაწერილია 15 იანვარს) დეპუტატმა მათ განცხადებების დაწერა მოსთხოვა. როგორ ფიქრობთ, მაჟორიტარის ამ ფორმით ჩარევა და განცხადებების იძულებით დაწერის მოთხოვნა მისაღები ფორმაა და ზეწოლას არ ნიშნავს?
_ ეგ არის აბსოლუტური ტყუილი _ ასეთი რამ არ მომხდარა. ეს იყო გაცნობითი ხასიათის შეხვედრა. განცხადებების დაწერის სურვილი თვითონვე გამოთქვეს. ყოველ შემთხვევაში, რამდენიმემ. სხვათაშორის, არც კითხვები არ გასჩენია არავის. ბატონმა თემურ ჭკუასელმა აღნიშნა მხოლოდ, რომ ის იყო ამ რაიონის რჩეული და ჩემთან ერთად საქმის კეთების საშუალება უნდა მისცემოდა. ვინ როგორ მიიღო ეს ნათქვამი, უკვე მისი პრობლემაა.
_ ვინ გამოთქვა განცხადების დაწერის სურვილი?
_ ეს მათ შეეკითხეთ. შეხვედრაზე იყვნენ მხოლოდ სამსახურის უფროსები და მოადგილეები.
_ “ნაციონალური მოძრაობის” ოზურგეთის ორგანიზაციამ ასეთი განცხადება გაავრცელა: “მთელი კატეგორიულობით მოვითხოვთ, შეწყდეს “ნაციონალური მოძრაობის” წევრების პოლიტიკური დევნა და სასწრაფოდ აღიკვეთოს “ქართული ოცნების” ჩოხატაურის მაჟორიტარის თემურ ჭკუასელის აღვირახსნილი ქმედება!” ისინი ამტკიცებენ, რომ ჭკუასელი გამგეობის თანამშრომლებს განცხადებების დაწერას აიძულებს. რადგან დეპუტატი ჩვენს სატელეფონო ზარებს არ პასუხობს, თქვენ რას გვეტყვით ამის შესახებ?
_ ჩემთვის ამ განცხადების თაობაზე ცნობილი არ არის. ასეთი პოპულისტური განცხადებების სანაცვლოდ, ეს ცხრა წელი საქმე რომ ეკეთებინათ, ის ჯობდა. ღამეები აღარ მძინავს ამდენი გაჭირვებულის შემყურეს. სასაცილოა ეს ყველაფერი, სატირელი რომ არ იყოს. ვისაც კიდევ მაგათი განცხადებების სჯერა, ნაციონალური ორგანიზაციების კარი ღიაა _ შევიდეს, არავინ უშლის!
_ გინდათ დაგვარწმუნოთ, რომ არანაირ ზეწოლას ადგილი არ ჰქონია და ადამიანებს, რომელთა ხელფასები 700 ლარია, რომელთა უმეტესობას ბანკის ვალი აქვს და ზოგისთვის ეს ხელფასი შემოსავლის ერთადერთი წყაროა, საკუთარი ნებით უჩნდებათ სახლში წასვლის სურვილი?
_ არავის დარწმუნებას მე არ ვაპირებ _ რაც იყო, იმას გეუბნებით. რაც შეეხება შემოსავლის წყაროს, ძალიან რთულ თემას შეეხეთ. ზოგს ბანკის ვალი აქვს, ზოგს _ 700 ლარი ხელფასი, ზოგს კი _ არაფერი. გამახსენდა ერთი ცნობილი ფეხბურთელის ფრაზა: “მთელი ბავშვობა ვოცნებობდი, რომ მქონოდა კედები, მაგრამ ერთხელ ქუჩაში დავინახე თანატოლი, რომელსაც არ ჰქონდა ფეხები!”
_ ეს იმას ნიშნავს, რომ ის ადამიანები, რომლებიც ნაციონალური ხელისუფლების დროს მუშაობდნენ სახლში უნდა წავიდნენ?
_ მე ეს არც ერთ პასუხში არ მიგულისხმია. ვაკონკრეტებ ერთ რამეს: მიუხედავად იმისა, რომ ზოგს, თურმე, ბანკის ვალი ჰქონია, არავის სახლში გაშვებას არ ვაპირებ. მიბიძგებთ იქითკენ, რომ გავიხსენო წარსული, რაც ძალიან არ მინდა. ეს არის შეთავაზება, რომელსაც “ნაციონალური მოძრაობის” არც ერთი წევრი არ აკეთებდა ხელისუფლებაში ყოფნის დროს და არც გააკეთებს, ალბათ, მომავალში. ისინი გვიჭერდნენ, ტყუილუბრალოდ გვაპატიმრებდნენ, ოჯახები დააწიოკეს, მოსახლეობა საშიმშილოდ გაწირეს, რომელ ზეწოლაზე ვსაუბრობთ?! მოდით, აქ შევჩერდეთ, იმიტომ, რომ ასე ჯობია ჩოხატაურისთვის. მე, პირადად, ოჯახების კეთილდღეობაზე ვფიქრობ და არა ვინმეს უბედურებაზე, თუნდაც, პარტიულად ვერ ვეწყობოდე მას. სიკეთეს სიკეთით მინდა ვუპასუხო, ბოროტებას _ სიმართლით!
_ აიპი-ების ხელმძღვანელებზე რას გვეტყვით? როგორც ამბობენ, მათ შეცვლას “ქართული ოცნების” აქტივისტებით გეგმავთ…
_ სამწუხაროდ, ათასი ჭორ-მართალი ტრიალებს ხალხში. აიპი-ებს რაც შეეხება, იქაც იქნება ცვლილებები. პირველ რიგში, იმის გამო, რომ შტატები ძალიან გაბერილია. სამწუხაროდ, ასეთი მემკვიდრეობა დატოვა “ნაციონალურმა მოძრაობამ” ყველგან. მოატყუეს უამრავი ადამიანი და აიყვანეს ერთწლიანი ხელშეკრულებით მხოლოდ წინსაარჩევნოდ, რომლის თანხა წლევანდელ ბიუჯეტში არ დევს, ან თუ დევს, არასაკმარისია. იმაზე აღარ ვსაუბრობ, რომ მუშაობენ ადამიანები, რომლებსაც 79, ან სულაც 45 ლარი აქვთ ხელფასი. არის სამსახურები, სადაც 15 ლარს იღებენ, მაგრამ ეს ჩემი სფერო აღარ არის. იმის თქმა მინდა, რომ ჯერ იმდენი პრობლემაა დაგროვილი, აიპი-ებზე არ ჩამოვყალიბებულვარ, _ გვითხრა ჯინჭარაძემ და დასძინა: _ შობა-კალანდას კიდევ ერთხელ მივულოცავ ჩოხატაურელებს, ჯანმრთელობას სიხარულს, სიყვარულს, წარმატებებს, ხვავს, ბარაქას ვუსურვებ ყველა ჩოხატაურელს და თქვენს გაზეთს! ყველაფერი კარგად იქნება!
