ოზურგეთში მოსახლეობის მხოლოდ 8 % არის დასაქმებული. უმუშევრობის ასეთი მაღალი მაჩვენებლის პირობებში მუნიციპალური სტრუქტურები – საკრებულოს აპარატი, საკრებულოს მიერ შექმნილი არაკომერციული ორგანიზაციები, გამგეობის სამსახურები და ტერიტორიული ერთეულები – მოქალაქეებისთვის დასაქმების ერთადერთ საშუალებად აღიქმება.
არჩევნების შემდეგ, აქტუალური გახდა ამ სტრუქტრებში დასაქმებული ადამიანების თანამდებობიდან გათავისუფლების საკითხი. საზოგადოების ერთი ნაწილის აზრით, ადამიანები მუნიციპალურ სამსახურებში არჩევნებამდე პოლიტიკური ნიშნით და პოლიტიკური ამოცანების შესასრულებლად ინიშნებოდნენ და ამიტომ ისინი მუნიციპალიტეტის ხელმძღვანელობისგან ძველი კადრების გათავისუფლებასა და მათ ნაცვლად ახლის დანიშვნას ითხოვენ.
სწორედ ამ მიზნით, პარასკევს, 8 თებერვალს, ოზურგეთის დემოკრატიული ჩართულობის ცენტრის ორგანიზებით ოზურგეთის მუნიციპალიტეტში საკადრო ცვლილებების შესახებ, საჯარო დისკუსია გაიმართა.
დისკუსიაში მონაწილეობა მიიღეს ოზურგეთის მუნიციპალიტეტის გამგებლის მოვალეობის შემსრულებელმა კოტე შარაშენიძემ, გურიის მხარის გუბერნატორის მოადგილემ პაატა მანჯგალაძემ და საქართველოს დემოკრატიული განვითარების კავშირის იურისტმა ირაკლი პაპავამ.
ოზურგეთის მუნიციპალიტეტის გამგებლის მოვალეობის შემსრულებელმა კოტე შარაშენიძემ მუნიციპალიტეტში გახორციელებულ და გასახორციელებელ საკადრო ცვლილებებზე ვრცლად ისაუბრა საზოგადოებასთან. მისი განცხადებით, ამ პროცესებს დღეს სარჩულად პოლიტიკურ ნიშანს უდებენ, რაც სავსებით არასწორია.
_ საკადრო ცვლილებები აუცილებლად უნდა გახორციელდეს, რადგან ამას საჭიროება მოითხოვს, ეს ბუნებრივი პროცესია, მაგრამ არასწორად მიმდინარეობს საზოგადოებაში ამის ინტერპრეტაცია. ჩვენ რომ პოლიტიკური და პირადი ნიშნით ადამიანებს ვარჩევდეთ, მაშინ ავდგებოდით და ამას უფრო მასიური ხასიათს მივცემდით. 28 თემიდან, სულ 8 სოფელში მოხდა რწმუნებულების გათავისუფლება. მე ვაკვირდებოდი ამ ადამიანების მუშაობას, იცით, რომ პირდაპირ გამგებლის პრეროგატივაა, სოფლის რწმუნებულის დანიშვნა – გათავისუფლება.
მე მინდა შეიქმნას და საკრებულომ უნდა გააკეთოს კიდეც საკონკურსო- საატესტაციო კომისია. მე პირადად ვარ დროებით მოვალეობის შემსრულებელი, მაგრამ მზად ვარ, მივიღო ამ კონკურსში მონაწილეობა. ისე კი ამ კომისიის შექმნას ვერ დაველოდები, რადგან ცვლილებების პროცესი ჩასატარებელია სოფლებში. სოფლის რწმუნებულები დროებით, სამთვიანი საგამოცდო ვადით ინიშნებიან.
რაც შეეხება ა.ა.ი.პ. ორგანიზაციებს, ეს არის ძალიან სერიოზული თემა. პირდაპირ მინდა გითხრათ, რომ მთელი რაიონის ბიუჯეტი, რომელიც 10 მილიონიანია, იხარჯება აიპიებში, აბსურდულ შტატებში, სადაც საქმე არ კეთდება. მე ვნახე მაყურებელთა მეკავშირე, ასეთი შტატი იყო, “მედია ოფიცერი”, ზედამხედველის მოადგილე და ასე შემდეგ. ასეთ დღეში იყო ჩვენი ბიუჯეტი. კი, ბატონო, ხალხი დასაქმებულია, მაგრამ არ არის ეს სწორი დასაქმება. ეს არის დათვური სამსახური. მიზნობრიობა ამ თანხის დახარჯვისა, არ ჩანს. მე მზად ვარ, ნებისმიერ სიტუაციაში, საზოგადოებასთან ერთად ჩავერთო ამ პროცესებში და მივიღო რეკომენდაციები. ახლა არ არის იმის დრო, ვარჩიოთ ეს კარგი იყო თუ ცუდი იყო, ახლა უნდა დავიწყოთ ახლის შენება და კეთება. ბიუჯეტი არ იყო საქველმოქმედო ფონდი. არ შეიძლება ჩასაფრებულის პოზიციიდან ისაუბრო ამ თემაზე, რომ ვინმეს პოლტიკური ნიშნით გავათავისუფლებ. მე რომ ვინმეს პოლიტიკური ნიშნით მდევარი კაცი ვიყო, ეს დეკემბრის თვეშიც აისახებოდა. მე ყველას ვთავაზობ ალტერნატივას, რადგან ვიცი დღევანდელი ცხოვრების პირობები. ყველას ოჯახი ჰყავს და მე ვითვალისწინებ მათ ოჯახურ მდგომარეობას, რა თქმა უნდა.” _ განაცხადა შარაშენიძემ.
ვიცე-გუბერნატორმა პაატა მანჯგალაძემ ისაუბრა რა არის გუბერნატორის, რიგორც სახელმწიფო რწმუნებულის ინსტიტუტი და რა ზედამხედველობის ფუნქცია გააჩნია მას თვითმმართველობაზე.
_საკადრო ცვლილებები არის ისეთი საკითხი, რომელიც რეგულირდება კანონით თვითმმართველობის შესახებ. გამგებელს აქვს უფლება, დანიშნოს და გაათავისუფლოს თანამდებობის პირები, მათ შორის, სოფლის რწმუნებულები, მაგრამ აქ მითითებულია, რომ გამგებელს აქვს უფლება, გაათავისუფლოს საჯარო სამსახურის შესახებ კანონის მიხედვით. ეს იმას ნიშნავს, რომ გათავისუფლებსი სამი საფუძველი არსებობს: ეს არის, როცა პირი საკუთარი ინიციატივით ტოვებს სამსახურს, მეორე _ თანამდებობასთან შეუფერებლობით, მესამე _ დისციპლინარული გადაცდომის საფუძველზე. მე რაც მომისმენია, ეს არის ის, რომ ადამიანების გათავისუფლება ხდება უკანონოდ, რას ნიშნავს, სოფლის აქტივთან შეხვედრით გადაწყვიტოთ რწმუნებულის დანიშვნა? ასეთი რამ კანონში არ დევს, ეს არის უკანონობა ზუსტად, _ მიმართა მანჯგალაძემ შარაშენიძეს.
ჩვენ მივესალმებით იმას, რომ თქვენ განაცხადეთ, აუცილებელია საკონკურსო-საატესტაციო კომისიის შექმნა. ამის საწინააღმდეგო ჩვენ არაფერი გვაქვს, ეს აუცილებელია. ჩვენ გვაქვს რწმუნებულებთან შეხვედრა, რომელთა აზრიც ვიცით, რომ ისინი საკუთარი ინიციატივით თანამდებობას არ დატოვებენ. ადამიანი რომ სამსახურიდან თავისი ნებით წავიდეს, ამას სჭირდება მოტივაცია, მას აქვს იმის იმედი, რომ ის უკეთეს სამსახურს იწყებს, ეს ამ შემთხვევაში ასე არ ხდება, რადგან არის იმ დონეზე საუბარი, რომ თუ გაათავისუფლებენ, თაგვის წამალს დალევს და ეს იძლევა ზუსტად ეჭვებს. (?)
კოტე შარაშენიძე: ნუ შეგყავთ საზოგადოება შეცდომაში, რომ თითქოს პოლიტიკური ნიშნით ხდება ადამიანების გათავისუფლება. მე ჩემს რამდენიმე თანამშრომელთან ერთად ვიყავი სოფელ ოზურგეთის ადმინისტრაციულ შენობაში და რწმუნებულს, რომელსაც გააჩნია რაღაც პრეტენზიები ჩემთან მიმართებში და მიცხადებს ომს, როგორც თვითონ გაზეთთან ინტერვიუში ღიად თქვა, ასეთი კაცი საერთოდ არ დადის სამსახურში და განმარტებისთვის არც განცხადება აქვს წარმოდგენილი. მაქვს ფოტო და ვიდეო მასალა, რას გავს იქაურობა. სოფელ ოზურგეთის ტერიტორიული ერთეულის სპეცილისტები აწერენ ხელს, 31 იანვრიდან 8 თებერვლის ჩათვლით, რწმუნებული გრიგოლ ჩხაიძე სამსახურში არ გამოცხადებულა. ეს კაცი სოფლისთვის არაფერს აკეთებს და არც გააკეთებს, ისეთი პიროვნებაა და გამოდის ვიღაც აცხადებს, რომ პოლიტიკური ნიშნით გავათავისუფლე? მე ასეთ შემთხვევებს ვაკვირდები, ორი თვეა. კიდევ ერთხელ გაგიმეორებთ, რომ მე რომ ვინმეს პოლიტიკური ნიშნით ვათავისუფლებდე, ავდგებოდი და 28 თემის რწმუნებულს ერთ დღეს დავითხოვდი, ეს ასე არ არის. მე რომ ვინმეს განადგურება მინდოდეს, გავანადგურებდი, მაგრამ თავხედობას და უპასუხისმგებლობას არავის ვაპატიებ, რწმუნებულს, რომელსაც თავისი ვალდებულება არაფრად მიაჩნია და ხელფასი მხოლოდ სესხის დასაფარად სჭირდება, მე ამას არ დავუშვებ, მე მინდა საქმე და ვარ საქმის კეთებისთვის მოსული, კეთილი ინებონ და გვერდით დამიდგნენ, მე ტყუილად ყოფნას არავის ვაპატიებ, ვინც საქმეს არ აკეთებს, წავა ყველა სახლში. ნახეთ, სოფელ ოზურგეთში რაა გაკეთებული, რას გავს იქაურობა, თხებით არის სავსე ადმინისტრაციული შენობა და ეზო. რა თანხაც არის დახარჯული ბიუჯეტიდან, ეს არ იცით? მე თუ ვინმეს გავუშვებ სამსახურიდან, ამაზე პასუხს მე ვაგებ, მე არა არგუმენტირებულად არ გავაკეთებ ამას.
შეხვედრაზე მწვავედ დაისვა საკითხი ოზურგეთის მუნიციპალიტეტის სოფლებში სოფლის მხარდამჭერი პროგრამით გახორციელებული სამუშაოების არამიზნობრივად შესრულების შესახებ, რომელზეც საკრებულოს წევრმა კახა ღლონტმა ისაუბრა. მისი განცხადებით არცერთ სოფელში არ შესრულებულა სამუშაო, რომელიც სოფლისთვის იქნებოდა მისაღები, გაკეთებულია სტადიონები, მოსაცდელები, რომელიც ფაქტიურად უფუნქციოა. ამაში იხატება რწმუნებულების უყურადღებობა და საქმისადმი გულგრილი დამოკიდებულება.
ოზურგეთის მუნიციპალიტეტის სოფელ ბოხვაურის ყოფილმა რწმუნებულმა ნანა ბერიშვილმა კითხვებით გუბერნატორის მოადგილეს პაატა მანჯგალაძეს მიმართა:
_ ძალიან კარგია, ბატონო პაატა მანჯგალაძე, რომ უკანონობა გაღელვებთ და გაშფოთებთ, მაგრამ მე მაინტერესებს, მაშინ თუ გაღელვებდათ, მე რომ ნაციონალებმა ზუსტად პოლიტიკური ნიშნით გამაძევეს სამსახურიდან? თქვენ როგორ უყურებდით და რამდენად სამართლიანად აფასებდით იმ რწმუნებულების გათავისუფლებას, რომლებიც თქვენგან პოლიტიკური მრწამსით იყვნენ განსხვავებული? ეს ხდებოდა ყოველთვის ნაციონალური მმართველობის დროს. მე ვარ ბოხვაურის ყოფილი რწმუნებული, ჩემთან ერთად გაათავისუფლეს კიდევ ოთხი რწმუნებული, არა ჩვენი ნებით, ეს იყო ძალდატანების და იძულების შედეგად. დილის ათი საათიდან ხდებოდა ჩვენზე ზეწოლა, ღამის 12 -ის ნახევარზე ჩამიყვანეს ქალი ოზურგეთის გამგეობის შენობაში, იძულებით და მუქარით დამაწერინა ბატონმა ილია ვაშაყმაძემ განცხადება. ეს მოხდა ყევლაფერი პოლიტიკური ნიშნით, იმიტომ, რომ ჩვენს სოფლებში ყველაზე მეტი ივანიშვილის მხარდამჭერი გამოიკვეთა ხელმოწერების სახით. მე დავწერე პირადი განცხადება იძულების შედეგად. ამას თქვენ აკეთებინებდით თქვენს ხელქვეითებს, ახლა კი არც კი გრცხვენიათ, ეს იყო თქვენს მიერ შემოღებული და დანერგილი წესი, თუ არ დავწერდი, როგორც თვითონ განმიცხადა ვაშაყმაძემ, მიმიჩენდა ადგილსაც, რაზეც პირდაპირ მიმანიშნა. მე ამის შედეგად, ჯანმრთელობა დავკარგე. ღამის 12 ის ნახევრზე, ქალის დაშანტაჟება, ბატონო პაატა, თქვენი ხელისუფლების წარმომადგენლის მიერ მოხდა. ახლა რატომ უყურებთ გათავისუფლებას, როგორც უსამართლობას, გამეცით პასუხი ამაზე.
პაატა მანჯგალაძე: მე ვიცნობ ამ ქალბატონს, შევხვედრივარ მას. რაც შეეხება უკანონო გათავისუფლებას, არ აქვს მნიშვნელობა მას, ამ მთავრობის დროს ხდება თუ იმ მთავრობის დროს ხდებოდა, ნებისმიერ დროს ჩვენ რეაქციას გამოვხატავთ, რომელიც მაშინაც უნდა გაკეთებულიყო და ახლაც უნდა გაკეთდეს. თუ იმ მთავრობის დროს რაღაც არ კეთდებოდა, ეს არ არის ალიბი იმისა, რომ ჩვენც იგივე უნდა გავაკეთოთ. (?) თქვენ თუ თვლით, რომ იყავით პოლიტიკური დევნილი, შეგიძლიათ, მიმართოთ სასამართლოს.
მანჯგალაძის პასუხს მწვავე დისკუსია მოჰყვა და ამას დარბაზში მსხდომთაგან ბევრმა, სრული დემაგოგია უწოდა.
ჩვენ დავუკავშირდით ოზურგეთის მუნიციპალიტეტის ყოფილ გამგებელს ილია ვაშაყმაძეს, რომელმაც ან ფაქტთან დაკავშირებით ასეთი კომენტარი გააკეთა:
_არავისთვის, არასოდეს ზეწოლა არ გამიხორციელებია, – გვითხრა ვაშაყმაძემ.
