რეგიონული განვითარების და ინფრასტრუქტურის მინისტრის მოადგილემ, თენგიზ შერგელაშვილმა გურიის გუბერნატორთან, ვალერი ჩიტაიშვილთან და სამივე მუნიციპალიტეტის პირველ პირებთან ერთად, სამუშაო შეხვედრაზე 2013 წლის გასახორციელებელ პროექტებზე ისაუბრეს. შეხვედრაზე მინისტრის მოადგილემ განაცხადა, რომ ის პროექტები, რომელიც ამ ეტაპზე შეჩერებულია, აუცილებლად გაგრძელდება.
ოზურგეთის მუნიციპალიტეტის გამგებლის მოვალეობის შემსრულებელმა კოტე შარაშენიძემ იკითხა, როდის დაიწყება ლაითურის-მერიას დამაკავშირებელი ხიდი.
_ ამ ხიდის ამბავი პრემიერ-მინისტრთანაც არის შეთახმებული, მაგრამ, იქნებ, დაგვიზუსტოთ, როდის დაიწყება სარემონტო სამუშაოები. გუშინ ლაითურში ქარსაფარ ზოლს გაუჩნდა ცეცხლი და სხვა გზით წავიდნენ სახანძრო სამსახურის თანამშრომლები. ამიტომ ადგილზე დაგვიანებით მივიდნენ. აუცილებელია ამ ხიდის გაკეთება. ხუთი თვეა, ეს ხიდი დაშლილია, _ თქვა კოტე შარაშენიძემ.
თენგიზ შერგელაშვილის თქმით, ამ ხიდის საქმე ადგილობრივ თვითმმართველობას ეკუთვნის და ამის შესახებ წერილიც არის შემოსული სამინისტროში. აუცილებლად მიექცევა ყურადღება.
ვალერი ჩიტაიშვილის განცხადებით, ხიდის მშენებლობა დიდ თანხებთან არის დაკავშირებული და ეს ადგილობრივი ბიუჯეტით ვერ მოგვარდება.
კოტე შარაშენიძემ „გურია ნიუსთან“ საუბრის დროს დააკონკრეტა, რომ ლაითურის ხიდის პრობლემის მოგვარების შესახებ პრემიერ-მინისტრიც არის ინფორმირებული და ეს ამბავი საქართველოს პარლამენტის წევრისგან, ზვიად კვაჭანტირაძისგან გაიგო.
ლაითურის ხიდის შესახებ, “გურია ნიუსი” უკვე წერდა. საქართველოს პარლამენტის დეპუტატის, ზვიად კვაჭანტირაძის თქმით, ბიძინა ივანიშვილის უმრავლესობასთან შეხვედრის დროს, ოზურგეთისთვის ორი გადაწყვეტილება იქნა მიღებული: _ უპირველეს ყოვლისა, დაჩქარებული წესით აღსდგება ლაითურისა და მერიის დამაკავშირებელი საავტომობილო ხიდი. ამის შესახებ დავალებები უკვე გაცემულია. მეორე _ მთავრობა დახმარებას გაუწევს ოზურგეთელ მეციტრუსეებს პროდუქციის ადგილზე ჩაბარებასა და ლარსის გამშვები პუნქტის გავლით, რუსეთში გატანაში. ამისთვის საჭიროა ადგილობრივი ინიციატივების მხარდაჭერა, რასაც გავაკეთებთ. საჭიროა მოხდეს ამ საქმის სასწრაფო კოორდინაცია სოფლის მეურნეობის სამინისტროსთან ერთად. აქაც დავალებები უკვე გაცემულია, _ განაცხადა ზვიად კვაჭანტირაძემ 2012 წლის 10 დეკემბერს.
მინისტრის მოადგილის შეხვედრაზე დღის წესრიგით გათვალისწინებული იყო რიგი საკითხების განხილვა, რომელიც უკავშირდება, როგორც მიმდინარე ინფრასტრუქტურულ პროექტებს, ისე საქართველოს მთვარობასა და ევროპის კავშირს შორის 2011 წლის 14 ნოემბრის დაფინანსების ხელშეკრულებით, (საქართველოში რეგიონული განვითარების რეფორმის მხარდაჭერა) ქართული მხარის მიერ ნაკისრი ვალდებულებების შესრულებას.
შეხვედრას ასევე UNDP-სა და GIZ-ის ადგილობრივი ექსპერტები დაესწრნენ.
