“ჩვენი ამოცანაა, შევქმნათ ახალი უმრავლესობა”

ჯერ დავით ჯინჭარაძე და გიორგი ქველაძე, დღეს კი გელა ომანაძე გამოაკლდა “ნაციონალური ფრაქციის” რიგებს. ისინი დამოუკიდებელი დეპუტატის მანდატს ინარჩუნებენ, თუმცა, როგორც ამბობენ, ახალი ფრაქციის ფორმირების შესახებ კონსულტაციები მიმდინარეობს.

“გურია ნიუსი” დაინტერესდა, შესთავაზებენ თუ არა სხვა ფრაქციები ყოფილ ნაციონალებს მათთან გაწევრიანებას და საკრებულოს ფრაქცია “ქართული ოცნება _ დემოკრატიული საქართველოს” თავმჯდომარეს ზაზა გაბუნიას ესაუბრა.

_ როგორ ფიქრობთ, რატომ ტოვებენ ბოლო ხანებში დეპუტატები ასე ხშირად ნაციონალურ ფრაქციას და თქვენს ფრაქციას ხომ არ შეუთავაზებია მათთვის თქვენთან გაწევრიანება?

_ ჩვენი ამოცანაა, შევქმნათ ახალი უმრავლესობა იმისთვის, რომ “ნაციონალური მოძრაობა” თბილისის მერიაშიც ჩამოვაშოროთ ძალაუფლებას. ჩამოვაშოროთ იმისთვის, რომ ბიუჯეტი პარტიული ამოცანებისთვის არ იხარჯებოდეს, იმისთვის, რომ თბილისელებისთვის არსებობდეს მყარი სოციალური და ეკონომიკური გარანტიები. ამ პროცესში კი ჩვენ გვიერთდებიან ის ადამიანები, რომელთაც დიდი ხანია ჰქონდათ სურვილი, გამიჯნოდნენ ფრაქცია “ნაციონალურ მოძრაობას”, ანუ იმ ძალას, რომელმაც უამრავი შეცდომა დაუშვა თბილისის მართვისას.

_ ხომ არ მოგვევლინება ამ დამოუკიდებელი დეპუტატებისგან შექმნილი ახალი ფრაქცია?

_ შეიქმნება თუ არა ცალკე ფრაქცია, ეს ტექნიკური საკითხია. მთავარია, რომ ჩვენ გვაქვს თანხმობა მჭიდრო კომუნიკაციისა და პარტნიორობისა ნაცმოძრაობის ოპოზიციაში გადაყვანის პროცესსა და საქმეში.

_ არ შემიძლია არ გკითხოთ _ რატომ გაგექცათ სევდია უგრეხელიძე პირდაპირი ეთერიდან?

_ ტელეკომპანია “მაესტროს” ეთერში, ნინო ჟიჟილაშვილის გადაცემაში მომხდარმა ფაქტმა, კერძოდ, იმან, რომ ქალბატონი სევდია უგრეხელიძე უბრალოდ გამექცა დებატებიდან, კიდევ ერთხელ დაადასტურა “ნაციონალური მოძრაობის” უსუსურობა, ის, რომ არ აქვთ არავითარი არგუმენტი მათ მიმართ არსებული ლეგიტიმური კითხვების და ეჭვების წინააღმდეგ. იმის მიუხედავად, რომ მე თავაზიანობის და კორექტულობის ფარგლებში ვუწევდი ოპონირებას, ქალბატონი სევდია უგრეხელიძე გაიქცა დებატებიდან, რადგან მისთვის მტკივნეული იყო ჩემს მიერ წამოჭრილი საკითხები და ასე შეეცადა სიტუაციის დრამატიზირებას, რაც მორიგი ფანდია “ნაციონალური მოძრაობის” იაფფასიანი ხრიკებიდან. მე ვრჩები ერთგული დებატების პატივისცემით პირობებში წარმოებისა, თუმცა, ვერაფრით ავიტან უტიფარ ტონს და “ნაციონალური მოძრაობის” მხრიდან შეცდომების მიღწევებად წარმოჩენის მცდელობას.

_ თუმცა, ქალბატონმა სევდიამ თქვენი საქციელი არაკორექტულად შეაფასა იქიდან გამომდინარე, რომ ის თქვენზე უფროსია და ქალია.

_ რაში გამოიხატა ჩემი არაკორექტულობა?! თუ ასაკში სხვაობის გამო პოლიტიკოსებმა დებატები არ უნდა გამართონ? აშკარაა, რომ ქალბატონ სევდიას, უბრალოდ, თავიდანვე ჰქონდა გადაწყვეტილი შოუს დადგმა და სტუდიის დატოვება. კამათი ჩემი მხრიდან კორექტულად, თუმცა, მისთვის მწვავე და არასასიამოვნო საკითხების ირგვლივ მიმდინარეობდა და ამის გამო მოიქცა ისე, როგორც მოიქცა, მისთვის სამწუხაროდ…

გაბუნიას აზრით, სულ მალე “ნაციონალურ მოძრაობას” საკრებულოში უმრავლესობა აღარ ეყოლება. დღეის მდგომარეობით, ფრაქცია “ნაციონალური მოძრაობაში” 26 დეპუტატი რჩება.