აქციის ერთ-ერთმა ორგანიზატორმა ანი წითლიძემ კიდევ ერთხელ გაავრცელა მიმართვა სამეგრელო-ზემო სვანეთის სამხარეო პოლიციისა და მისი უფროსის ლევან შონიას მიმართ. მიმართვაში ნათქვამია: “გამოვთქვამთ იმედს, რომ ხვალინდელი კონცერტი განმუხურში ჩაივლის ექსცესების გარეშე! თითოეული ადამიანის ტრანსპორტირების შეფერხებას განმუხურამდე, აღვიქვამთ, როგორც მიზანმიმართულ ხელის შეშლას (იმედს გამოვთქვამთ, არ იქნება). იმედი გვაქვს, კონცერტის მსვლელობისას არ ჩაგვიქრება შუქი; იმედი გვაქვს, არ “მოგვისევთ” გაწვრთნილ ზონდერბრიგადებს! ჩვენ მაინც ვერ შეგვაშინებთ და თითოეულ ამ ქმედებას აღვიქვამთ, როგორც მიზანმიმართულ პროვოკაციას და შესაბამისად ჩავაყენებთ ყველა საერთაშორისო ორგანიზაციას საქმის კურსში. გთავაზობთ დადგეთ ჩვენთან ერთად ანაკლიისთვის”.
“გურია ნიუსი” აპრილში დაანონსებულ აქციებზე პარტია “თავისუფალი საქართველოს” წევრს, ოთარ ბექაურს ესაუბრა.
_ ანაკლიაში აქცია-კონცერტი რომ იმართება, თუ იცით?
_ არ ვიცოდი, თქვენგან გავიგე ახლა.
_ რომ გცოდნოდათ, წახვიდოდით?
_ მაგათ აქციასა თუ კონცერტზე, ჯანსაღად მოაზროვნე ადამიანი ფეხს არ დაადგამს, თან დღევანდელი ესტრადის დონე არ მიმაჩნია იმდენად მაღლად, რომ მათ ნამღერზე გავერთო. გააჩნია, რომელი მომღერლები მონაწილეობენ. ლელა წურწუმიებისა და სტეფანეების “ნაბლატავებ” კონცერტზე ჩემი ფეხი არ იქნება.
_ 19 აპრილის აქციაზე რას ფიქრობ?
_ შეიკრიბებიან, ცოტას იყვირებენ და დაიშლებიან. თუ ძალიან ბევრი მოუვიდათ, ხალხი ან სპეც-რაზმი დაშლის. მე ვფიქრობ, 2-3 000 ზე მეტ კაცს ვერ გამოიყვანენ და 3 000 კაცი საფრთხედ არ მიმაჩნია.
_ ვრცელდება ინფორმაცია, რომ აქციაზე წასასვლელად ხალხს ფულს სთავაზობენ, იმასაც ამბობენ პროვოკაციები იგეგმებაო. როგორ ფიქრობ, რა მოყვება ამ პროვოკაციებს და როგორ უნდა ავიცილოთ თავიდან?
_ დიდი იმედი მაქვს, რომ ეს ყველაფერი, უბრალოდ, ზღაპარია. ბევრს სურს დაძაბულობა და შოუს ყურება. მე რევანშისტების კატეგორიას არ მივეკუთვნები და ძალადობრივ მეთოდებს არ მივესალმები. დიდი იმედი მაქვს, რომ ეს პროვოკაციები, მხოლოდ დაბოღმილი ადამიანებისა და ნაციონალების სურვილია. ხომ ხედავთ, ისე გაუხდათ საქმე, რომ 19 აპრილის აქციისათვის მოქალაქეებს ფულს ურიგებენ!
_ 21 აპრილის აქციაზე _ “რეჟიმი უნდა გასამართლდეს”, აპირებთ მისვლას?
_ რა თქმა უნდა.
_ თქვენ “თავისუფალი საქართველოს” წევრი ხართ, რას იტყვით შუალედურ არჩევნებზე, კანდიდატებზე და როგორია თქვენი პროგნოზი?
_ ჩემგან სხვა კანდიდატების შანსებზე საუბარი არაკორექტული იქნება. უბრალოდ ერთს ვიტყვი: 100% დარწმუნებული ვარ კახა კუკავას გამარჯვებაში, რადგან მტკიცედ მჯერა, რომ ნაძალადევის მოსახლეობას არ სურს ქვეყანაში გაგრძელდეს ამერიკანიზაცია, სექტებისა და ერთსქესიანთა ქორწინების დაკანონება. ასევე, არ სურს კამფეტებივით რიგდებოდეს ქართული მიწები და პასპორტები გაურკვეველი ჯიშის წარმონაქმნებზე.
