ნამდვილად არასწორი ინტერპრეტაცია იყო. სინამდვილეში, ყველაფერი პირიქით იყო, მე ვისაუბრე სასამართლების თემის პოლიტიზირებაზე “ნაციონალური მოძრაობის” მხრიდან, რომელმაც სააკაშვილის მეშვეობით ვეტო დაადო საერთო სასამართლოების შესახებ კანონს. ისინი, აუცილებლად სააკაშვილისვე სასამართლოში გაასაჩივრებენ იმ პროცესს, რასაც ჩვენ სასამართლოსთან მიმართებაში ვაკეთებთ.
პოლიტიკური მოტივი ზოგადად ამ პროცესის ის არის, რომ არ იყოს სასამართლო პოლიტიზირებული. ჩემი კომენტარი იმაში მდგომარეობდა, რომ ეს სამართლებრივი დავა ამ საკითხის მხოლოდ იმისთვის ჭირდებათ, რომ მოხდეს ამ პროცესის გაჯანჯლება, მეტი არაფერი”, _ ასეთ კომენტარს აკეთებს “გურია ნიუსთან” საპარლამენტო უმრავლესობის წევრი, გედევან ფოფხაძე.
მისი პოზიციით მას შემდეგ დავინტერესდით, რაც საპარლამენტო უმცირესობის წევრის, მარიამ საჯაიას “ფეისბუქზე” ასეთი სტატუსი გაჩნდა:
დიდი მადლობა გედევან ფოფხაძეს!
კომიტეტზე იხილება პრეზიდენტის ვეტოს დაძლევის საკითხი საერთო სასამართლოების შესახებ კანონზე. ბატონი გედი ამ დროს გულახდილად აცხადებს და ახმოვანებს “ქართული ოცნების” მოტივაციას, რაც არის ჩვენი პოზიციის დადასტურება _ რომ კანონში ცვლილებები პოლიტიკური მიზნებით არის მოტივირებული.
დიდი მადლობა მას გულახდილობისთვის
ასეთი გახლდათ მარიამ საჯაიას სტატუსის შინაარსი, რომელიც მან ძალიან მალევე აიღო თავისი სოციალური ქსელიდან.
