არჩილ კბილაშვილი ამბობს, რომ ფორმალურად მისი გადაწყვეტილება სწორია, რადგან სისხლის სამართლის საპროცესო კოდექსის 218- მუხლი მთავარ პროკურორს უფლებას აძლევს, ნებისმიერ დანაშაულში ბრალდებულ პირს ააცილოს სისხლის სამართლის პასუხისმგებლობა.
“მეორე ასპექტი არის შინაარსობრივი მხარე, სარგებელი, რომელიც საზოგადოებამ, სამართალდამცავმა ორგანოებმა და სასჯელაღსრულებამ მიიღო ამ ვიდეო კადრების გავრცელების შედეგად. სასჯელაღსრულებაში შეწყდა პატიმართა ცემა-წამება, სწორედ ამ კადრების გავრცელების შემდეგ დავიწყეთ სისტემური დანაშაულის შესწავლა, დაიკითხა 2300 პატიმარი და დადგინდა წამების ის მეთოდები, რაც ციხეებში წლების განმავლობაში გამოიყენებოდა.”
არჩილ კბილაშვილის თქმით, აღნიშნული ვიდეოები ბედუკაძემ გასავრცელებლად გადასცა 2011 წლის ოქტომბერში, მაშინ როდესაც არანაირი პერსპექტივა პოლიტიკური სიტუაციის შეცვლისა არ არსებობდა და შესაბამისად, მას არ შეიძლებოდა ჰქონოდა რაიმე შეღავათის იმედი. კბილაშვილის თქმით, ბედუკაძემ შაჰიდის ქამარი შემოიჭირა, როდესაც საკუთარი დანაშაულის შეასხებ თავადვე განაცხადა და საკუთარ თავის მხილების გზით ამხილა სისტემა.
იმ ადამიანების საპასუხოდ, რომლებიც ამბობენ, რომ ბედუკაძე დამნაშავეა და დაუსჯელად არ უნდა დადიოდეს, კბილაშვილი აცხადებს: “დღეს უამრავი დამნაშავე დადის დაუსჯელი და მაღალ თანამდებობებზეც მოხვდნენ. მათ იმაზე მძიმე დანაშაულიც აქვთ ჩადენილი, ვიდრე ბედუკაძეს”.
კიდევ ერთი არგუმენტი, რომელსაც მთავარი პროკურორი შეეხო, არის არაანგარებითობა. კბილაშვილის თქმით, ბედუკაძის აღნიშნული ქმედება მატერიალური სარგებლის მიღებით არ იყო განპირობებული.
