თენგიზ ძველაია (გარდაცვლილის მამა):
_ არ შემიშვეს ქუთაისის ციხეში, არ მაჩვენეს ის საკანი, სადაც ჩემმა შვილმა ვითომდა თავი ჩამოიხრჩო. გოგა ადრეც იყო ნასამართლევი. მაშინ ციხეში პატიმრებთან ჰქონდა პრობლემები და მეორედ რომ დააკავეს, არ უნდოდა ქუთაისის ციხეშე წასვლა, სულ მეუბნებოდა, ბიჭებთან პრობლემები მაქვსო, მეგონა იგონებდა რაღაცას…
იქ ყოფილა ერთი ბიჭი, რომელიც ქურდობას აპირებს თურმე, სწორედ მასთან მოსვლია ადრე ჩხუბი, იმ ბიჭს ყბა აქვს გატეხილი, გოგას ხელში რკინა ჰქონდა ჩასმული, ისეთი სიძლიერის დარტყმა ყოფილა… მე არ მჯერა, რომ ჩემმა შვილმა თავი მოიკლა. ის მოკლულია, მოკლეს და მერე ჩამოკიდეს... თუ ასე არ არის, მაშინ რატომ ჩაატარეს უჩვენოდ ექსპერტიზა?! თავი რომ ჩამოეხრჩო, მიცვალებული შავი უნდა იყოს, თეთრია ჩემი შვილი. მე ვთხოვ სოზარ სუბარს ჩამოვიდეს და მოიყვანოს თავისი ექსპერტი, დამიმტკიცონ ის, რაც ოფიციალური ვერსიით გაავრცელეს. მე არც პოლიციას ვაბრალებ მკვლელობას და არც ციხის თანამშრომლებს, ნამდვილად ვიცი ეს პატიმრების გაკეთებულია, დარწმუნებული ვარ ამაში. მე ციხის ადმინისტრაციას იმაში ვადანაშაულებ, რომ არ მიაქციეს ჩემი შვილის განცხადებას ყურადღება.
_ რა განცხადებაზეა საუბარი?
_ჩემმა შვილმა ციხეში შესვლამდე ადმინისტრაციას განცხადებით მიმართა და უსაფრთხოების უზრუნველყოფა სთხოვა. თუმცა, ადმინისტრაციამ მისი ეს მოთხოვნა არ დააკმაყოფილა.
გარდა ამისა, ვითხოვ პასუხს კითხვაზე_რატომ ჩაატარეს უჩვენოდ ექსპერტიზა. მე ვითხოვ გამოძიების სწორი მიმართულებით წასვლას და დამნაშავის ვინაობის დადგენას. ამ ამბის გაგების წუთიდან ვამბობ და კიდევ ვიმეორებ, არ მჯერა თვითმკვლელობის ვერსიის. მოვითხოვ საქმეში ჩაერთოს სახალხო დამცველი. ჩემი ოჯახის პირადი თხოვნაა უჩა ნანუაშვილისადმი, რომ დაგვეხმაროს.
ეკა ბესელიას ვთხოვე, ის საკანი ნახოს, სადაც ჩემი გოგა იყო იმ საშინელ წუთებში, პრეზიდენტიც იყო, გუბერნატორიც, ყველა დამპირდა სიმართლის დადგენაში დახმარებას და ვნახოთ. გოგა პატიმრების მიერაა მოკლული და ამ ფაქტს სასჯელაღსრულების დეპარტამენტი მალავს. სწორედ ამიტომ ველოდები სუბარის მოსვლას.
ასევე ვთხოვთ პრემიერმინისტრს, რომ პირად კონტროლზე აიღოს ეს საქმე და ოჯახს სიმართლე გაგვაგებინონ!
“16 წლის იყო ჩემი გოგა. როგორც კი ქუთაისის ციხეში გადაიყვანეს, სულ გვეუბნებოდა, აქ ცუდი პირობებია და გლდანის ციხეში გადამიყვანეთო. მოვითხოვ მოვიდეს სოზარ სუბარი და დაგველაპარაკოს, ისიც ხომ მამაა, ისიც ხომ ოჯახის პატრონია. ჩემი გოგა თავს არ მოიკლავდა, ვერავინ დამაჯერებს იმაში, რომ თავი ზეწარით ჩამოიკიდა, ტყუილია ეს! ჩვენ მხოლოდ სიმართლის გარკვევას ვითხოვთ, ჩაატარონ ხელახალი ექსპერტიზა და სახალხო დამცველიც ჩაერთოს ამ საქმეში. ჩემი პირველი შვილიშვილია და არ ვაპირებ ასე ბრმად ვენდო ჩატარებული ექსპერტიზის დასკვნას, ან რატომ ჩაატარეს ოჯახის წერების გარეშე, ან როგორც კი მოხდა ეს ამბავი,მაშინვე რატომ არ გვაჩვენეს ბავშვი… არ გავჩერდებით და ბოლომდე ვიბრძოლებთ სიმართლის დასადგენად,“ _ უთხრა „გურია ნიუსს“ გარდაცვლილის ბებიამ, ლუიზა ძველაიამ.
ქუთაისის #2 საპყრობილეში გარდაცვლილი მოზარდის ოჯახის წევრებს უკვე ესაუბრნენ საქართველოს პრეზიდენტი მიხეილ სააკაშვილი, პარლამენტის ადამიანის უფლებათა დაცვის კომიტეტის თავმჯდომარე ეკა ბესელია და სამეგრელო ზემო-სვანეთის გუბერნატორი თენგიზ გუნავა.
შეგახსენებთ, რომ ქურდობის ბრალდებით დაკავებული 16 წლის გოგა ძველაია 8 ოქტომბერს დილით საკანში გარდაცვლილი იპოვეს. სასჯელაღსრულების სამინისტროს მიერ გავრცელებული წინასწარი ინფორმაციით, პატიმარმა საკანში თავი ზეწრით ჩამოიხრჩო.
