“გურია ნიუსი” არასამთავრობო ორგანიზაციების განცხადებას უცვლელად გთავაზობთ:
“საქართველოს პრეზიდენტის 2013 წლის 27 ოქტომბრის არჩევნები გახლდათ ერთგვარი ტესტი დემოკრატიაზე, რომელიც საქართველოს სახელმწიფომ და ახალმა ხელისუფლებამ წარმატებით ჩააბარა. საპრეზიდენტო არჩევნები გახლდათ უპრეცენდენტოდ დემოკრატიული, ღია და გამჭვირვალე, რაც ყველა საერთაშორისო და ადგილობრივი დამკვირვებელი ორგანიზაციის ანგარიშმა დაადასტურა, რაც ჩვენი ქვეყნისათვის დემოკრატიული განვითარების გზაზე უდაოდ წინ გადადგმული ნაბიჯი გახლდათ. საარჩევნო ადმინისტრაციამ შეძლო საარჩევნო პროცესების პროფესიულად, ეფექტიანად და გამჭვირვალედ მართვა. წინა საარჩევნო მოსამზადებელმა პერიოდმა და ასევე უშუალოდ კენჭისყრის დღემ ჩაიარა ყოველგვარი გართულებების, ლოჯისტიკური და ტექნიკური პრობლემების გარეშე. საარჩევნო კომისიებმა უზრუნველყვეს ამომრჩეველთა ხმების ზუსტი დათვლა და მოქალა-ქეების არჩევანის სრულად ასახვა შემაჯამებელ ოქმებში. ზემოთ აღნიშნულმა განაპირობა პოლიტიკური სპექტრისა და ამომრჩევლების ნდობა როგორც არჩევნების,ასევე არჩევნების შედეგებისა და საარჩევნო ადმინისტრაციის მიმართ, რაც მნიშვნელოვან მიღწევად უნდა ჩაითვალოს.
საზოგადოებისათვის ცნობილია, რომ საქართველოს პრეზიდენტის 2013 წლის 19 ნოემბრის N19/11/03 განკარგულებით 2013 წლის 20 ნოემბრიდან საქართველოს ცენტრალური საარჩევნო კომისიის წევრის ერთ ვაკანტურ თანამდებობაზე კანდიდატთა შესარჩევად ღია კონკურსი გამოც-ხადდა. ჩვენ საარჩევნო საკითხებზე მომუშავე ადგილობრივი არასამთავრობო ორგანიზაციები ვთვლით, რომ აღნიშნული პროცესი უნდა წარიმართოს კანონის სრული დაცვით, ღიად, გამჭვირ-ვალედ და სამართლიანად, ყოველგვარი პოლიტიკური და პარტიული ინტერესების გათვალის-წინების გარეშე. ცესკოს წევრობის კანდიდატად შერჩეული უნდა იყოს სამოქალაქო სექტორში მომუშავე პროფესიონალი, პრინციპული, მიუკერძოებელი, საარჩევნო საკითხებში ცოდნის და გამოცდილების მქონე ადამიანი. ზემოთ აღნიშნული კრიტერიუმების მიხედვით შერჩეული კანდი-დატის ცესკოს კომისიის წევრად არჩევა ხელს შეუწყობს მომავალი ადგილობრივი თვითმმართვე-ლობის არჩევნების კიდევ უფრო სამართლიანად, გამჭვირვალედ და დემოკრატიულად ჩატარებას, რაც კიდევ უფრო აამაღლებს პოლიტიკური პარტიებისა და ამომრჩევლის ნდობას არჩევნებისა და თავად საარჩევნო ადმინისტრაციის მიმართ.
ჩვენ ქვემოთ ხელის მომწერი ორგანიზაციები საქართველოს ცენტრალური საარჩევნო კომისიის წევრის ვაკანტურ თანამდებობაზე რეკომენდაციას ვუწევთ “კოალიცია სამოქალაქო განვითარებისათვის” გამგეობის წევრის, ა.ა.ი.პ. “სამოქალაქო საზოგადოებისა და დემოკრატიის განვითარების ცენტრის” დირექტორის ვლადიმერ ბოჟაძის კანდიდატურას. იმედს ვიტოვებთ, დღევანდელი ხელისუფლება განსაკუთრებული ყურადღებით მოეკიდება აღნიშნულ საკითხს და არ დაუშვებს საქართველოს ცენტრალური საარჩევნო კომისიის წევრის პოლიტიკური ან/და პარტიული ინტერესების გათვალისწინებით არჩევას”, _ აღნიშნულია განცხადებაში, რომლესაც ხელს 11 არასამთავრობო ორგანიზაცია აწერს, მათ შორის: “საქართველოს ახალგაზრდა იურისტთა ასოციაცია”, “კოალიცია სამოქალაქო განვითარებისათვის”, ფონდი “ღია საზოგადოება – საქართველო”, “კონსტიტუციის 42-ე მუხლი”, “სამოქალაქო კულტურის საერთაშორისო ცენტრი”, “ადამიანის უფლებათა ცენტრი”, “მრავალეროვანი საქართველო”, “პოლიტიკის და სამართლის ცენტრი”, “საარჩევნო გარემოს განვითარების ცენტრი”, “ჯანმრთელი სამყარო”, “საზოგადოებრივი დამცველი”.
