სამინისტროს პრესსამსახურის ინფორმაციით, ამ დღესთან დაკავშირებით სამინისტროს შეზღუდული შესაძლებლობების მქონე ახალგაზრდებისთვის იწყებს ახალ პროექტს – “მე ვხედავ მზეს”
პროექტის პრეზენტაცია, სამინისტროში, დღეს 14:00 საათზე გაიმართება.
_ სპორტისა და ახალგაზრდობის საქმეთა სამინისტროს 2013 წლის ერთ ერთი მთავარი პრიორიტეტი შეზღუდული შესაძლებლობების მქონე ახალგაზრდების საზოგადოებაში ინტეგრაციის ხელშეწყობაა სწორედ ამიტომ სამინისტროს ინიციატივითა და მხარდაჭერით კომპანია “ბრავო რექორდსი” მუშაობას იწყებს ახალ მუსიკალურ პროექტზე – “მე ვხედავ მზეს”, _ აღნიშნულია სამინისტროს მიერ გავრცელებულ განცხადებაში.
პროექტი გულისხმობს CD ალბომის გამოცემას, რომელშიც შევა შეზღუდული შესაძლებლობების მქონე პირებისა და ცნობილი მომღერლების მიერ შესრულებული 10 სასიმღერო კოლაბორაცია, როგორც პოპულარული ასევე უცნობი ქართული და უცხოური მუსიკალური ნაწარმოები: 1. ნინი ბადურაშვილი და შაბან მამედოვი; 2. ნინი ქარსელაძე, გიორგი სუხიტაშვილი და ცოტნე და თორნიკე ტურძელაძეები; 3. ჯგუფი “გამოუვალი მდგომარეობა” და მერი პაპუნაიშვილი; 4. ნოდიკო ტატიშვილი მარიამ კაპანაძე და თათია მამუკაშვილი; 5. ნატალიკო ქუთათელაძე და თამარ ცალქალამანიძე; 6. ბორის ბედია, სულხან გველესიანი და რამინ მიქაბერიძე; 7. ლიზა ბაგრატიონი, გიორგი უშიკიშვილი და ნიკა წიკლაური; 8. ანსამბლი “შვიდკაცა”და ნატალია ვეფხვაძე; 9. “ფორტე”, მაიკო ლომიძე და ანი სიხაშვილი; 10. კვინტეტი “Quintessential Five” და ქალთა კვარტეტი.
პროექტის მუსიკალური ხელმძღვანელია ცნობილი კომპოზიტორი და მუსიკალური პროდიუსერი რუსა მორჩილაძე.
_ პროექტის ძირითადი მიზანია მუსიკალური ნიჭით დაჯილდოვებული შეზღუდული შესაძლებლობების მქონე ახალგაზრდების საზოგადოებრივ ცხოვრებაში ინტეგრაციის ხელშეწყობა საზოგადოების მხრიდან და მათი პრობლემების მიმართ მაქსიმალური ყურადღების გამახვილება.
ამ ეტაპზე “ბრავო რექორდს”-ში მიმდინარეობს აქტიური მუშაობა, როგორც სიმღერების ჩაწერებზე, ასევე ალბომის დიზაინზე. დეკემბრის ბოლოს პროექტი დასრულებული იქნება და ნებისმიერ მსურველს შესაძლებლობა მიეცემა შეიძინოს CD ალბომი, რომელიც გაიყიდება “ბრავო რექორდს”-ის სადისტრიბუციო ქსელის მაღაზიებში. CD ალბომების რეალიზაციიდან შემოსული თანხა მთლიანად მოხმარდება შეზღუდული შესაძლებლობების მქონე პირთა პრობლემების მოგვარებას, _ ამბობენ სამინისტროში.
