უფლებადამცველი აცხადებს, რომ ციხეებში სიტუაცია შეიცვალა გარკვეული კუთხით, თუმცა, ჯერ კიდევ ბევრი პრობლემა რჩება, რაც დროულ რეაგირებას მოითხოვს.
“ვიყავი აქციაზე, სადაც პატიმართა მშობლები იყვნენ შეკრებილები. მათი განცხადებით, საშინელი სიტუაციაა #7 სასჯელაღსრულების დაწესებულებაში, აქციის მონაწილეების განცხადებით, თუ რომელიმე პატიმარი ხმას ამოიღებს, მის მიმართ წესდება 3 თვიანი შეზღუდვები, როგორიცაა მაგალითად, შეზღუდვები სატელეფონო საუბრებზე, ადვოკატებთან შეხვედრები და ფიზიკურ ზეწოლასაც აქვს ადგილი. სამწუხაროდ, არ არის საშუალება მონიტორინგის ჯგუფები შევიდნენ და ინფორმაცია გადაამოწმონ. ვფიქრობ, თუ დროულად არ მოხდება რეაგირება, ეს ქმედებები შეიძლება სასჯელაღსრულების სხვა დაწესებულებებშიც გავრცელდეს. თუმცა, უკვე მოდის ასეთი სიგნალები. მე-17 დაწესებულებიდან, რომელიც არის ღია, პატიმრები გადაიყვანეს დახურულ დაწესებულებაში, რათა მათ ინფორმაციები არ გადაეცათ უფლებადამცველებისთვის, ადვოკატებისთვის და ჟურნალისტებისთვის”.
კაკაბაძე შექმნილი სიტუაციიდან გამოსავალს ხარვეზების დამდგენი კომისიის დროულად შექმნაში ხედავს და აცხადებს, რომ ამ კომისიის შექმნა წინასაარჩევნოდ თავად შესთავაზა ხელისუფლებამ საზოგადოებას, რითაც სამართლიანობის აღდგენის კუთხით იმედი ჩაუსახა და ელექტორატის გული მოიგო.
“წინასაარჩევნოდ თავად ხელისუფლების წარმომადგენლებმა განაცხადეს, რომ შეიქმნებოდა ხარვეზების დამდგენი კომისია, რითაც მოხდებოდა სამართლიანობის აღდგენა, მერე განაცხადეს, რომ კომისია დაწუნებული იქნა და თან არც სახსრები იყო ბიუჯეტში. ისმის კითხვა – როდის გაერკვნენ, რომ ამ კომისიის შექმნა არასწორი იყო და როდის აღმოაჩინეს, რომ თანხა არ არის ბიუჯეტში? ვინ უნდა აგოს შეცდომაზე პასუხი – ხელისუფლებამ თუ პატიმრებმა? აი, ამ კითხვებს უნდა გაეცეს პასუხი, მაგრამ არსებული მდგომარეობის გათვალისწინებით, რჩება შთაბეჭდილება, რომ ხელისუფლებას ამ კომისიის შექმნა არ უნდა მხოლოდ იმიტომ, რომ არ არის მზად წინა ხელისუფლების დანაშაული აღიაროს და დამნაშავეებს პასუხი მოსთხოვოს. ხელისუფლებას არ უნდა, რომ დადოს მტკიცებულებები კონკრეტული დამნაშავეების წინააღმდეგ. იმიტომ, რომ დასავლეთიდან აქვს სერიოზული ზეწოლა. როგორც კი დაიდება დასკვნა, რომ სამართლიანი სასამართლო ამ ქვეყანაში არ არსებობდა და ეს იყო სისტემური დანაშუალი, იქვე დადგება საკითხი, მაშინ რას აფინანსებდა და რას დაუჭირა მხარი დასავლეთმა? ანუ პასუხსმგებლობა მხოლოდ “ნაციონალური მოძრაობის” მიმართ კი არ არის, იმ ადამიანების მიმართაც დადგება, ვინც ამბობდა, რომ საქართველო არის დემოკრატიის შუქურა”.
კაკაბაძე აცხადებს, რომ დიპლომატიურ კორპუსთან შეხვედრები აღარ ხდება, რადგან იციან, ეს კითხვები აუცილებლად დაისმება. მისი განცხადებით, მხოლოდ ციხიდან გამოშვება არ ნიშნავს სამართლიანობის აღდგენას. უფლებადამცველი ამნისტიას ხელისუფლების მხრიდან ჰუმანურ აქტად აფასებს და აცხადებს, რომ ათობით უდანაშაულო ადამიანი მოითხოვს სამართლიანი სასამართლოს მიერ განაჩენის გამართლებას.
პატიმრების პროტესტი გასაგებია “პატრიოტთა ალიანსის” ლიდერისთვისაც. სოსო მანჯავიძე აცხადებს, რომ ციხეებში რთული სიტუაციაა და გაკვირვებას იწვევს ხელისუფლების პოზიცია.
“დღეისათვის 1500 პატიმარი შიმშილობს, გასაკვირია ის პოზიცია, რომელიც ხელისუფლებას უკავია”.
მანჯავიძის განცხადებით კომისიის არშექმნით მთავრობა თავს იკატუნებს და თვალს ხუჭავს დარღვევების არსებობაზე. მისი აზრითაც, გათავისუფლება არ ნიშნავს სამართლიანობის აღდგენას და არ უნდა მოითხოვო უკანონოდ დაკავებული ადამიანისგან ამით ბედნიერი იყოს.
“იმით, რომ მართლმსაჯულების ხარვეზების დამდგენი კომისია არ იქმნება, ხელისუფლება ამბობს, რომ არავითარი დარღვევა არ ყოფილა. ის, რომ ადამიანები ამნისტირებულნი არიან, ეს კარგია, მაგრამ ეს ყველაფერი არ ნიშნავს იმას, რომ სრულიად უდანაშაულო ადამიანი, რომელიც ციხეში იჯდა და გაათავისუფლეს, ან ახლაც პატიმარია, კმაყოფილი უნდა იყოს იმით, რომ მას თავისუფლება უკანონოდ აღუკვეთეს”.
კაკაბაძის განცხადებას, რომ ხარვეზების დამდგენი კომისიის შექმნით ბევრ საქმეს აეხდება ფარდა და უკანონოდ გამოტანილი გადაწყვეტილებები წინა ხელისუფლების დანაშაულს ამხელს, რისთვისაც მზად არ არის ხელისუფლება და არა ფინანსების გამო, არამედ ხელოვნურად არ იქმნება კომისია, უმრავლესობის წარმომადგენელი ზაქარია ქუცნაშვილი ნაწილობრივ ეთანხმება და აცხადებს:
“მოვერიდებოდი ამ საკითხზე კომენტარს. ამ განცხადებას ნაწილობრივ ვიზიარებ. ვეთანხმები იმას, რომ ბევრი საქმე მიგვიყვანს წინა ხელისუფლების დანაშაულთან, მაგრამ გასათვალისწინებელია ის გარემოება, რომ ხშირ შემთხვევაში დანაშაულის დაფარვის მიზნით სამხილების განადგურებით ძნელია ისაუბრო ნამდვილ დამნაშავეზე, ძნელია ისაუბრო დამკვეთზე და აღმსრულებელზე”.
“ქართული ოცნება – დემოკრატიული საქართველოს” აღმასრულებელი მდივანი არმაზ ახვლედიანი კი აცხადებს, რომ არსებული მთავრობა ერთ დღეში ვერ გათავისუფლდება იმ მძიმე მემკვიდრეობისგან, რომელიც წინა ხელისუფლებისგან ერგო. მისი თქმით, ხელისუფლება მზადაა საზოგადოების ყველა გონივრულ კითხვას გასცეს პასუხი.
“კარგად მესმის იმ ადამიანების, რომლებიც უმძიმეს მდგომარეობაში არიან ციხეებში, ხელისუფლება საზოგადოების მხრიდან წამოსულ ნებისმიერ გონივრულ მოთხოვნას პასუხს გასცემს, მათ შორის მართლმსაჯულების ხარვეზების შემსწავლელი კომისიის შექმნასთან დაკავშირებით. ის, რაც გააკეთა ჩვენმა ხელისუფლებამ პატიმრებთან მიმართებაში, არის უპრეცედენტო. უამრავი ადამიანი, რომელიც უსამართლოდ იყო ციხეში, გავათავისუფლეთ, შევუმსუბუქეთ სასჯელი და ბევრი პირობა გავუუმჯობესეთ. ჩვენს გრძელვადიან ინტერესებში შედის, რომ ციხე მოწესრიგდეს და გახდეს ისეთი დაწესებულება, როგორიც ის ნორმალურ ქვეყნებშია”.
ახვლედიანი აცხადებს, რომ არავინ აღარასოდეს დაუშვებს ციხეში უკანონოს ჩადენას და თუკი ციხეში პატიმართა მხრიდან წამების პრეცედენტი განმეორდა, შესაბამისი და მყისიერი ზომები იქნება მიღებული.
