თუმცა, დღემდე მასიური სამუშაოები არ ჩატარებულა, ბაღის დასუფთავებას მხოლოდ მაშინ იწყებდნენ, თუ რომელიმე მაღალჩინოსანი სტუმარი აპირებდა ზუგდიდში ჩასვლას. ახლა კი უკვე რამდენიმე დღეა ზუგდიდის ბოტანიკური ბაღის დასუფთავება დაიწყო. ზუგდიდის მუნიციპალიტეტის გამგებლის მოვალეობის შემსრულებლის, ედიშერ თოლორაიას თქმით, ბაღის გაწმენდას არასამეწარმეო იურიდიულ პირი _ “კეთილმოწყობის ცენტრი” ახორციელებს. მისივე თქმით, ხეების ვარგისიანობას სპეციალური კომისია შეისწავლის, რომელიც უახლოეს დღეებში შეიქმნება, დასუფთავდება ტერიტორია და ყველაფერს გააკეთებენ, რომ ბაღს პირვანდელი მდგომარეობა დაუბრუნდეს.
კეთილმოწყობის ცენტრის მთავარი სპეციალისტი ანზორ ჩახაია ამბობს: “პირველ რიგში, მიმდინარეობს ტბის ამოწმენდა, რაც 25 წელია არ გაკეთებულა. შემდეგ მივყვებით არხების ამოწმენდას და სხვა სამუშაოებს. ტბის ამოწმენდას ამ კვირაში დავამთავრებთ, ამინდმა თუ არ შეგვიშალა ხელი.”
ბოტანიკურ ბაღში მიმდინარე სამუშაოები ადგილობრივი ბიუჯეტიდან ფინანსდება, თუმცა, თანხა ჯერ არ არის დადგენილი, ამიტომ პირველ ეტაპზე ის სამსახურები მუშაობენ, რომლებიც მუნიციპალიტეტის ბაზაზე არიან და დამატებითი ხარჯების გაღება არ არის საჭირო: “მთავარია, რომ სურვილი არის საზოგადოების და ჩვენი, რომ ბაღი გალამაზდეს”, _ განაცხადა ედიშერ თოლორაიამ.
ჩვენ საზოგადოების აზრით დავინტერესდით და ზუგდიდის მკვიდრს, დავით კვაშილავას ვესაუბრეთ.
დავით კვაშილავა: “მიხარია, რომ ზუგდიდის მუნიციპალიტეტის გამგეობამ დროულად დაიწყო ბოტანიკური ბაღის დასუფთავება. წინა ხელისუფლების დროს თუ ვინმე მაღალჩინოსანი დააპირებდა ზუგდიდში ჩამოსვლას, მაშინ თუ მოასუფთავებდნენ და იმასაც სანახევროდ. უამრავი ტურისტი ჩამოდის ზუგდიდში და ბოტანიკურ ბაღს შორიდან რომ ნახავდნენ, შესვლის სურვილი უქრებოდათ. დარწმუნებული ვარ, ზუგდიდის მუნიციპალიტეტის გამგეობა დაწყებულ საქმეს ბოლომდე მიიყვანს და ბოტანიკური ბაღს დაუბრუნებენ იმ სილამაზეს, როგორითაც თავს იწონებდა რამდენიმე ათწლეულები.”
