ოზურგეთის მუნიციპალიტეტის საკრებულოს წევრმა, სოფელ ჭანიეთის მაჟორიტარმა დეპუტატმა დავით მჟავანაძემ, ოზურგეთის დემოკრატიული ჩართულობის ცენტრში ბრიფინგი გამართა, სადაც ხელისუფლების მხრიდან სადამსჯელო ღონისძიებების გატარებაზე ისაუბრა.
"დღევანდელი ხელისუფლება ცდილობს სადამსჯელო ღონისძიებები გაატაროს ისეთ სოფლებში, სადაც არჩევნებში მათთვის სასურველი შედეგი ვერ მიიღეს.
ასევე, ხელი შეუშალოს ისეთი პროექტების განხორციელებას, როგორიცაა "კომპიუტერული ცოდნის გამავრცელებელი საზოგადოება", _ აღნიშნა მჟავანაძემ.
მან ისაუბრა სოფელ ჭანიეთში დაგეგმილ პროექტზე, რომლის თანახმადაც აქ "სოფლის სახლი" უნდა გახსნილიყო.
"სოფლის სახლში", პირველ ეტაპზე განთავსდებოდა ფეიცენტრი. სამომავლოდ იგეგმებოდა კომპიუტერის გამავრცელებელი საზოგადოების და საკონსულტაციო ცენტრის შექმნა. აღნიშნული პროექტის განხორციელების შედეგად, 360 კომლი შეძლებდა სოფლიდან გაუსვლელად გადაეხადათ კომუნალური გადასახადი, 1120 თემის მაცხოვრებელი ადგილზე შეასრულებდა ნებისმიერი ტიპის საბანკო მომსახურებას, ასევე 253 პენსიონერი ადგილზე შეძლებდა პენსიის და 30 სოციალურად დაუცველი ოჯახი, სოციალური დახმარების აღებას.
სოფლის მაცხოვრებლებს და განსაკუთრებით ახალგაზრდებს, მიეცემოდათ საშუალება, სოფლიდან გაუსვლელად შეესწავლათ კომპიუტერული პროგრამები და ჰქონოდათ ინტერნეტთან წვდომა.
"სოფლის სახლის" გახსნისთვის, გარდა საოფისე ფართისა, ყველა პრობლემა მოგვარებულია, ასევე მოვიძიეთ ოფისის რემონტისთვის საჭირო სახსრები.
2014 წლის 5 აგვისტოს საინიციატივო ჯგუფმა წერილობით მივმართეთ მუნიციპალიტეტის გამგებელს, მერაბ ჭანუყვაძეს, ჭანიეთის თემის ადმინისტრაციულ შენობაში დროებით გადმოეცა გასარემონტებელი ფართი", _ აღნიშნა მჟავანაძემ და დასძინა, რომ მიუხედავად ამ თხოვნისა, ჭანუყვაძემ საკითხის მოგვარებას თავი აარიდა.
"გამგებლის მოადგილისგან, ალექსანდრე ყველაშვილისგან 2014 წლის 12 აგვისტოს, მივიღეთ სიტყვიერი უარი. რადგან მას მიაჩნია, რომ თუ პროექტი 2-3 წლის მერე დაიხურება, კომფორტს მიჩვეული სოფლის მაცხოვრებლები, უცებ აღმოჩნდება დისკომფორტში და ამით მომავალში გაიზრდება ხელისუფლებაზე განაწყენებული ადამიანების რიცხვი.
თუმცა, 2014 წლის 13 აგვისტოს მივიღე 1014 წლის 12 აგვისტოს დარეგისტრირებული წერილი, სადაც ოზურგეთის მუნიციპალიტეტის გამგეობა გამოთქვამდა მზადყოფნას ფართის გადმოცემასთან დაკავშირებით, მაგრამ ითხოვდნენ აბსურდულ კითხვებზე პასუხის გაცემას. აღნიშნული წერილი მიზნად ისახავდა, ხელი შეეშალათ პროექტის განხორციელებისთვის, რადგან ჩვენს მიერ გაგზავნილი პასუხის შემდეგ 2014 წლის 20 აგვისტოს მივიღეთ უარი ფართის გამოყოფასთან დაკავშირებით", _ ამბობს მჟავანაძე და იქვე განმარტავს მუნიციპალიტეტის მხრიდან უარის თქმის მიზეზებს.
"ერთ-ერთი არგუმენტი იყო ის, რომ ოზურგეთის მუნიციპალიტეტს ჯერ არ აქვს აღნიშნული ფართი დარეგისტრირებული."
რა მიზეზით არ დაკმაყოფილდა სოფელ ჭანიეთის მაჟორიტარი დეპუტატის, დავით მჟავანაძის წერილი, ამაზე კომენტარის მოპოვებას "გურია ნიუსი" ოზურგეთის მუნიციპალიტეტის გამგებელ მერაბ ჭანუყვაძისგან შეეცადა.
თუმცა, გამგებელმა კითხვებე პასუხის გაცემისგან თავი შეიკავა და ოზურგეთის მუნიციპალიტეტის გამგეობის მიერ, სოციალურ ქსელში გავრცელებულ განცხადებაზე მიგვითითა, სადაც ვკითხულობთ:
"ამა წლის 5 აგვისტოს, ოზურგეთის მუნიციპალიტეტის გამგეობაში, სოფელ ჭანიეთში მცხოვრებ დავით მჟავანაძისგან შემოვიდა წერილი, რომლის მიხედვითაც ის ითხოვდა "სოფლის სახლისთვის" თემის ადმინისტრაციულ შენობაში საოფისე ფართის უფასო უზურფრუქტით 5 წლის ვადით გადაცემას.
ჩვენ გავეცით განმარტებითი პასუხი, რომ საქართველოს ორგანული კანონი ადგილობრივი თვითმართველობის კოდექსის 122 მუხლის მეექვსე ნაწილის თანახმად, მუნიციპალიტეტის აღმასრულებელი ორგანო (ოზურგეთის მუნიციპალიტეტის გამგეობა) წარმომადგენლობითი ორგანოს (საკრებულო) თანხმობით უფლებამოსილია მუნიციპალიტეტის ქონება (ჭანიეთის თემის ადმინისტრაციული შენობა) უსასყიდლო აღნაგობის უსასყიდლო უზურფრუქტისა და თხოვების ფორმებით აუქციონის გარეშე გადასცეს სახელმწიფოს და ავტონომიური რესპუბლიკების ორგანოებს, სხვა მუნიციპალიტეტებს, ს.ს.ი.პ.–ებს (გარდა პოლიტიკური პარტიებისა), მუნიციპალიტეტის მიერ დაფუძნებულ ა.ა.ი.პ.–ებს და მუნიციპალიტეტის 100 %–იანი წილობრივი მონაწილეობით მოქმედ საწარმოებს.
ამავდროულად, გასათვალისწინებელია, რომ ოზურგეთის მუნიციპალიტეტი არის ახალშექმნილი თვითმმართველი ერთეული და საჯარო რეესტრში, დღეის მდგომარეობით, ქონება ჯერ არ აქვს დარეგისტრირებული, შესაბამისად, არ გააჩნია უძრავი ქონების კერძო პირზე გადაცემის უფლებამოსილება (საქართველოს კანონის საჯარო რეესტრის შესახებ 11 მუხლის მესამე პუნქტი).
აღნიშნულიდან გამომდინარე, ოზურგეთის მუნიციპალიტეტის გამგეობა მოკლებულია სამართლებრივ საფუძველს დააკმაყოფილოს ჭანიეთის თემის მაჟორიტარი დეპუტატის თხოვნა ქონების სარგებლობის უფლების თაობაზე.
რაც შეეხება, ბატონი მჟავანაძის მიერ ბრიფინგზე გაკეთებულ განცხადებას, თითქოს ოზურგეთის მუნიციპალიტეტის გამგეობა კომპიუტერული ცოდნის გამავრცელებელ საზოგადოებას ხელს უშლის პროექტის განხორციელებაში, ამის პასუხად ვაცხადებთ, რომ მუნიციპალიტეტის გამგეობა მუშაობს გენერალურ გეგმაზე, რომლის მიხედვითაც მოხდება თემებისა და ცალკეული სოფლების ადმინისტრაციული შენობების ინტერნეტით უზრუნველყოფა, ასევე, მიმდინარეობს აქტიური განხილვა სხვა პროექტებისა, რომლითაც სოფლის მაცხოვრებლებს გაუადვილდებათ პრიორიტეტული პრობლემების გადაწყვეტა.
რაც შეეხება, დავით მჟავანაძის სხვა ბრალდებებს მუნიციპალიტეტის გამგეობის ხელმძღვანელობა კომენტარის გარეშე ტოვებს".
