რის ცოდნაა საჭირო საჯარო სამსახურში მუშაობის დასაწყებად

ჩოხატაურის მუნიციპალიტეტის გამგებლის, ირაკლი კუჭავას საკრებულოს სხდომაზე წარმოდგენილი განმარტებითი ბარათის თანახმად, ზემოაღნიშნული დადგენილების მიღების საფუძველი გახდა "საჯარო სამსახურის შესახებ" საქართველოს კანონში გახორციელებული ცვლილება, რომელიც ითვალისწინებს ადგილობრივი თვითმმართველობის ორგანოებში საჯარო მოხელეთა დასანიშნად კონკურსის ეტაპის გავლის ვალდებულებას და კონკურსის წესით დანიშნულ მოხელეთა ატესტირებას.

დადგენილების ზოგადი დებულების თანახმად, გამგეობის საშტატო ნუსხით გათვალისწინებული ყოველი დანიშვნითი თანამდებობისთვის დგება საკვალიფიკაციო მოთხოვნა. საკვალიფიკაციო მოთხოვნით განისაზღვრება თანამდებობის დასაკავებლად საჭირო კვალიფიკაცია, სამუშაო სტაჟი, განათლება, ცოდნა და უნარ-ჩვევები. საკვალიფიკაციო მოთხოვნა შედგება მინიმალური და დამატებითი საკვალიფიკაციო მოთხოვნებისაგან. მინიმალური საკვალიფიკაციო მოთხოვნა საერთოა გამგეობის ყოველი საშტატო თანამდებობისათვის და განსაზღვრავს გამგეობაში თანამდებობის დასაკავებლად აუცილებელ ცოდნასა და უნარ-ჩვევებს. დამატებითი საკვალიფიკაციო მოთხოვნა წესდება თითოეული საშტატო თანამდებობისათვის და განსაზღვრავს ცალკეული თანამდებობის დასაკავებლად საჭირო კვალიფიკაციას, სამუშაო სტაჟს, აგრეთვე, დამატებით ცოდნასა და უნარ-ჩვევებს.

ჩოხატაურის მუნიციპალიტეტის გამგეობის მოხელეთა შტატით გათვალისწინებულ  ნებისმიერ თანამდებობაზე დანიშვნის მინიმალური საკვალიფიკაციო მოთხოვნაა: ა) ქართულ ენაზე გამართული ზეპირი და წერილობითი კომუნიკაციის უნარი  ბ) საოფისე კომპიუტერული პროგრამების (Microsoft   Office   Word,  Microsoft  Office   Excel)  და Internet   Explorer–ის სამომხმარებლო დონეზე ცოდნა.

სამსახურის მსურველმა პირმა უნდა იცოდეს  საქართველოს კონსტიტუცია, ევროპული ქარტია "ადგილობრივი თვითმმართველობის შესახებ"; საქართველოს ორგანული კანონი "ადგილობრივი თვითმმართველობის კოდექსი"; საქართველოს კანონი  "საჯარო სამსახურის" შესახებ; ჩოხატაურის მუნიციპალიტეტი გამგეობის დებულება; შესაბამისი სტრუქტურული ერთეულის დებულება;

 გამგეობის საჯარო მოხელის დამატებითი საკვალიფიკაციო მოთხოვნები მოიცავს შემდეგ კომპონენტებს: პროფესიული ცოდნის მოთხოვნები; ზოგადი უნარების მოთხოვნები; პროფესიული უნარების მოთხოვნები;

გამგეობის სამსახურის განყოფილების უფროსის თანამდებობის დასაკავებლად, ასევე სავალდებულოა არანაკლებ საშუალო სპეციალური ან ტექნიკური განათლება ან ბაკალავრის აკადემიური ხარისხი,  თანამდებობაზე (საჯარო ან კერძო სამსახურში) მუშაობის არანაკლებ 1-წლიანი გამოცდილება, სამუშაოთა აღწერილობით დადგენილი ნორმატიული აქტების ცოდნა და საჭირო უნარები.   

გამგებლის თანაშემწის თანამდებობის დასაკავებლად, სავალდებულოა, არანაკლებ საშუალო სპეციალური ან  ტექნიკური განათლება ან ბაკალავრის აკადემიური ხარისხი, სამუშაოთა აღწერილობით დადგენილი ნორმატიული აქტების ცოდნა და საჭირო უნარები.

სპეციალისტის თანამდებობის დასაკავებლად, ასევე აუცილებელია  არანაკლებ საშუალო სპეციალური ან ტექნიკური განათლება ან ბაკალავრის აკადემიური ხარისხი, სამუშაოთა აღწერილობით დადგენილი ნორმატიული აქტების ცოდნა და საჭირო უნარები.

ადმინისტრაციულ ერთეულში გამგებლის წარმომადგენლის თანამდებობის დასაკავებლად დამატებით  სავალდებულოა საშუალო განათლება მაინც, სამუშაოთა აღწერილობით დადგენილი ნორმატიული აქტების ცოდნა და საჭირო უნარები.

ჩოხატაურის მუნიციპალიტეტის საკრებულომ ამ დადგენილების გამოსაცემად ადმინისტრაციული წარმოება უკვე დაიწყო.