“კონკურსის ვადა, შესაბამისი შესწავლისა და ანალიზის საფუძველზე განისაზღვრა”

საქართველოს პარლამენტმა მიიღო კანონპროექტი, რომელმაც ადგილობრივი თვითმართველობაში თანამდებობების დასაკავებლად სავალდებულო კონკურსის ვადა, 31 ოქტომბრიდან 31 დეკემბრამდე გადაწია. 

საქართველოს პარლამენტის მიერ გავრცელებული ინფორმაციით, საპროცედურო საკითხთა და წესების კომიტეტის სხდომაზე, პარლამენტის წევრის, გია ჟორჟოლიანის მიერ საკანონმდებლო ინიციატივის წესით წარმოდგენილი კანონპროექტი განიხილეს, რომელიც "საჯარო სამსახურის შესახებ" საქართველოს კანონში ცვლილების შეტანას ითვალისწინებს. მომხსენებლის, გია ჟორჟოლიანის განცხადებით, კანონპროექტი ადგილობრივი თვითმმართველობის მოხელის თანამდებობაზე დანიშნული მოვალეობის შემსრულებლის უფლებამოსილების ვადის, რომელიც 2014 წლის 31 ოქტომბერს იწურება, 2014 წლის 31 დეკემბრის ჩათვლით გახანგრძლივებას ითვალისწინებს.

პარლამენტის წევრის ინფორმაციით, ვადის გახანგრძლივების საჭიროება კონკურსის მომზადებასთან დაკავშირებულმა ორგანიზაციულმა ღონისძიებებმა და კონკურსანტთა დიდმა რაოდენობამ განაპირობა. მისივე თქმით, დამატებით დროს მოითხოვს კონკურსის სავალდებულო ეტაპის ტესტირების ჩატარების ორგანიზებაც. როგორც გია ჟორჟოლიანმა აღნიშნა, იქმნება საფრთხე, რომ ზოგიერთ მუნიციპალიტეტში, განსაკუთრებით, იქ, სადაც არჩევნების მეორე ტური იყო დანიშნული და ახლად შექმნილ მუნიციპალიტეტებში, 31 ოქტომბრამდე ვერ მოესწროს კონკურსების დასრულება, რაც ავტომატურად გამოიწვევს ყველა მოვალეობის შემსრულებლის უფლებამოსილების შეწყვეტას.

საპროცედურო საკითხთა და წესების კომიტეტის თავმჯდომარე, გიორგი კახიანი ვადის განსაზღვრის კრიტერიუმებით დაინტერესდა. როგორც გია ჟორჟოლიანმა განმარტა, კონკურსის ვადა შესაბამისი შესწავლისა და ანალიზის საფუძველზე განისაზღვრა.