"მთვარის ასტროლოგიური კალენდრის მეშვეობით შესაძლებელია გაცილებით მეტ სასურველ შედეგს მივაღწიოთ ჩვენს კარმიდამოში, ვიდრე მისი უგულვებელყოფით", _ გვეუბნება გამოცდილი სპეციალისტი, ფერმერი, ასოციაცია "ელკანას" წარმომადგენელი, ჯაბა ჭეიშვილი.
_ მთვარის პერიოდების გათვალისწინებით მომუშავე სოფლის მეურნეობის მოყვარული ადამიანები, რომლებიც სამუშაო დღეს მთვარის კალენდარის გარეშე არ იწყებენ, გაცილებით წარმატებული შედეგებით გამოირჩევიან, _ ამბობ ჯაბა ჭეიშვილი და მეურნეებს სთავაზობს მისეულ გამოცდილებას, თუ როგორ მუშაობს მთვარის კალენდარის მიხედვით ნოემბერში.
_ პირველი ნოემბრიდან ათი ნოემბრის ჩათვლით, მთვარის დაღმავალი პერიოდია. ამ დროს, სამი ნოემბრის ჩათვლით, ნივრის დარგვის აქტიური პერიოდია. კარგია სათბურსა და ღია გრუნტში ნიადაგის დამუშავება, გაფხვიერება. ასევე, ამ დღეებში აგროვებენ სამკურნალო ნაყოფს, მარცვლეულსა და ძირნაყოფებს.
საუკეთესო დროა ხილის ხმობისთვის. კარგია სათბურში ფოთლოვანი ბოსტნეულის თესვა. გამუდმებით უნდა მოვასუფთავოთ ნიადაგი და დავამზადოთ კომპოსტი. მოვერიდოთ დაკონსერვებას და ხეხილის გასხვლას.
6-7 ნოემბერს, მთვარის დაღმავლობისას, განსაკუთრებით კარგია შეშის ჭრა. ამ დღეებში უნდა მოიკრიფოს საშემოდგომო ხილი, მაგალითად, ვაშლის ცალკეული სახეობები.
8-9-10 ნოემბრის დღეებში კარგია ახალი ნარგავების მულჩირება, რომელსაც მოსალოდნელი ყინვისგან დაიცავთ.
11-20 ნოემბრის ჩათვლით მთვარეს, ყოველი სამი დღის შემდეგ, ძველი, ახალი და აღმავალი ფაზა აქვს. ამ შუალედებში ნივრის რგვის ბოლო პერიოდია. ვინახავთ ყვავილების ბოლქვებსა და თესლებს. სრულდება სასათბურე სამუშაოები. სასურველია ხეხილის გასხვლა, ტოტების შეჭრა, გაახალგაზრდავება, სათბურის მოწესრიგება (14-15 რიცხვში).
მომდევნო დღეებში კარგია ხეხილის დარგვა, ნიადაგის დამუშავება საბაღჩედ, დეკორატიული მცენარეების გადარგვა, გაზონების რგვა.
19-20 ნოემბერს ნიადაგში შევიტანოთ კომპოსტი.
21 – 30 ნოემბერი _ ეს პერიოდი მთვარის აღმავალი და სავსე ფაზაა.
28 ნოემბერი სავსემთვარეობის კულმინაციაა.
21 -22 ნოემბერს დასაშვებია სათბურში თესვა, მიუღებელია ხეხილის რგვა, დაკონსერვება და შეშის მოჭრა.
23-25 ნოემბერი საუკეთესო პერიოდია ხეხილის, დეკორატიული და მრავალწლიანი მცენარეების რგვისთვის. ასევე, კარგია ხეხილის ძირების შემობარვა, ნაცრის მოყრა. ახალდარგულ ან 2-3 წლიან ნერგებს უნდა დავუსოთ სარები და ავაკრათ, ავახვიოთ, ან სულაც ტომარა ჩამოვაცვათ თოვლისგან დასაცავად.
26 ნოემბრიდან 30 რიცხვის ჩათვლით, ღია გრუნტის ზამთრისწინა დამუშავება მოვახდინოთ _ უნდა მოხდეს მავნებლების საწინააღმდეგოდ ნაცრის მოფრქვევა. მშრალი ამინდების შემთხვევაშიც კი, მიუღებელია მცენარეების რწყვა.
ჩვენ თვეების მიხედვით განვაგრძობთ მთვარის კალენდრის ჭეიშვილისეული ვარიანტის მიწოდებას ჩვენი მეურნეებისთვის.
