ორშაბათს, დღის მეორე ნახევარში, მედიისთვის პრესკონფერენცია გამართა მარინა თოთლაძემ. ჩვენი გაზეთის წინა ნომერში ვიუწყებოდით, რომ ქალბატონი მარინა თოთლაძე, რომლის ძმაც, კობა მირზაშვილი ა (ა) ი პ საფეხბურთო კლუბ "გურიას" დირექტორი იყო 2012 წლის საპარლამენტო არჩევნების შემდეგ და თანამდებობიდან მიმდინარე წლის 5 აგვისტოს გაათავისუფლეს, ლანჩხუთის ხელმძღვანელობას 150 ათას დოლარს ედავება.
მისი თქმით, აღნიშნული თანხა ლანჩხუთის მუნიციპალიტეტს საფეხბურთო გუნდის დასაფინანსებლად ასესხა და დღემდე არ მიუღია უკან. მართალია მან რიგი დეპუტატებისგან მიიღო კიდეც დაპირება, რომ შეიკრიბებოდნენ და იმსჯელებდნენ აღნიშნულზე, თუმცა, როგორც აღმოჩნდა მსგავსი არაფერი მომხდარა. თოთლაძის თქმით, მას არავინ შეხმიანებია საკითხთან დაკავშირებით და ამიტომაც გადაწყვიტა პრესკონფერენციის გამართვა, რომელსაც გარდა ჟურნალისტებისა დეპუტატის ბიუროს წარმომადგენელი გოგი გეგიაძე და შუხუთის ადმინისტრციული ერთეულის მაჟორიტარი აკაკი იმნაიშვილიც ესწრებოდნენ.
"მე კიდევ ერთხელ ხაზგასმით მინდა დავაფიქსირო, რომ ვითხოვ იმ 150 ათას დოლარს, რომელიც გუნდს გასული სეზონის პირველ წრეში ვასესხე. ამაში არ შედის 10 ათასი, რომელიც "გურიას" თბილისის "დინამოსთან" მოგებისთვის ვაჩუქე, არ შედის ასევე ყველა გატანილ გოლზე 200 დოლარს რომ ვჩუქნიდი გუნდს, ასევე აქ არ არის ნაგულისხმევი გასვლითი თამაშებისას გულშემატკივართა მგზავრობისა და ზოგ შემთხვევაში ბილეთების ხარჯები, არ შედის ასევე ის 4 ათასი, რომელიც საახალწლოდ გადმოვურიცხე ფეხბურთელებს, სახლში რომ შეხვედროდნენ ახალ წელს. კიდევ ბევრი წვრილმანი ხარჯები არ მაქვს შეყვანილი, ეს იყო ჩემი საჩუქარი ფეხბურთელებისა და ლანჩხუთელი გულშემატკივრებისთვის.
ვითხოვ მხოლოდ იმას, რაც ვალის სახით გავეცი და ეს ძალიან კარგად იცის მუნიციპალიტეტის გამგებელმა ზაზა ურუშაძემ, რომელიც ყველა საქმის კურსში იყო. ჩემი სიტყვა თუ ნაკლებად სარწმუნოა, მაშინ თემურ ალექსაიას დავეკითხოთ, ის ხომ მაინცაა "ოცნება" და ყველა წვრილმან საქმეში, რასაც მე ვაკეთებდი კარგადაა ჩახედული.
ნახონ თითოეული საბანკო ოპერაცია, რომელსაც ვახორციელებდი, შეამოწმონ სახელფასო უწყისები რაზე აწერდნენ ფეხბურთელები ხელს, დაჯდნენ დაიანგარიშონ რა ჯდება ძირითადის, დუბლებისა და ჭაბუკთა გუნდების შენახვა, რა თანხაა გახარჯული და საიდან. ისიც ნახონ რა თანხა გაიღო ბიუჯეტმა საამისოდ იმ პერიოდში და ასე შემდეგ. ნუთუ ეს უმადურობა იმისთვის მეკუთვნის, რაც გავაკეთე? დაშლის პირას მყოფი გუნდი უმაღლეს ლიგაში გადავიყვანე და მადლობას ასე მიხდიან?
მინდა ვკითხო გამგებელს, სად არის ის ზღვა სპონსორებისა, რომელთა რიგიც იდგა? პირადად მე მყავდა ორი სპონსორი მოძებნილი, რომელიც გუნდსაც უპატრონებდა და გრიგოლეთის ბაზასაც ( თანაც მიწის გასხვისების გარეშე, რადგან ამასთან დაკავშირებით ჩემი ჩემი პრინციპული დამოკიდებულება მაქვს) და მას ისე მოაწყობდა, რომ იქედან დაფინანსდებოდა "გურია" .
თუმცა, ჩემი არაერთი შეხვედრისა მუნიციპალიტეტის ხელმძღვანელობასთან, ვერ ვეღირსე კონკრეტულ წინადადებებს და ვერ მივიღე პასუხი.
ფაქტები აჩვენებს, რომ მე უბრალოდ აფერა მომიწყვეს და გადამაგდეს. გამგებელი იმუქრება, რომ საფინანსო პოლიციას შეუშვებს კლუბში, კი ბატონო, შეუშვას.ფაქტი ერთია, თანხა რომელიც სესხად გავეცი უკან უნდა დამიბრუნდეს", _ აცხადებს თოთლაძე.
თოთლაძის მხრიდან სესხად გაღებული 150 ათასი დოლარის უკან დაბრუნების აუცილებლობას ხაზს უსვამდნენ ასევე იქ მყოფი აკაკი იმნაიშვილიც და გოგი გეგიაძეც.
მათი თქმით, ლანჩხუთის ხელმძღვანელობამ უნდა გამოიჩინოს კეთილი ნება და სესხად აღებული თანხა, როგორც სხვა შემთხვევებში მომხდარა და თან არაერთხელ, უკან უნდა დააბრუნოს, თანაც ისე, რომ საქმე სასამართლომდე არ მივიდეს.
ყველაფერთან ერთად, როგორც ისინი ამბობენ, ეს უშუალოდ მუნიციპალიტეტისა და კლუბის იმიჯზე აისახება ცუდად.
აღნიშნულ სადაო საკითხთან დაკავშირებით ჩვენ მუნიციპალიტეტის გამგებელ ზაზა ურუშაძესაც მივმართეთ კითხვით:
_ ბატონო ზაზა, აღიარებს თუ არა მუნიციპალიტეტის ხელმძღვანელობა იმ 150 ათას დოლარიან ვალს, რომელსაც თოთლაძე გედავებათ?
_ მე არაერთხელ მითქვამს და ახლაც ვიმეორებ, თუკი წარმოდგენილი იქნება სათანადო დოკუმენტაცია, რომელიც დაადასტურებს, რომ მართლაც გაიხარჯა თოთლაძის მხრიდან ოფიციალურად საფეხბურთო კლუბისთვის რაიმე სახის თანხა, თითოეული თეთრი ანაზღაურდება.
_ თუ კი თქვენ თვლით, რომ ამხელა თანხას უმიზეზოდ ედავებიან მუნიციპალიტეტს, არ აპირებთ, თავადვე დაიწყოთ საქმის წარმოება და მოიძიოთ ყველა საჭირო დოკუმენტაცია, რომ საკითხი საბოლოოდ ამოიწუროს?
_ კი, უკვე დაწყებული მაქვს ამ კუთხით მუშაობა, ყველა ა (ა) ი პ საქმიანობის შესწავლა მოხდება და მათ შორის საფეხბურთო კლუბისაც.
როგორც მოვლენები ცხადყოფს, ნაკლებია შანსი იმისა, რომ ურუშაძემ კეთილი ნება გამოიჩინოს და თანხა, რომელიც თოთლაძემ "გურიას" დაახარჯა, ვალად აღიაროს, თუმცა არც მეორე მხარე აპირებს ვინმეს შეარჩინოს საკუთარი ნაოფლარი ათასები.
