განათლებისა და მეცნიერების მინისტრ თამარ სანიკიძის განცხადებით, "მეცნიერთა ხელფასები 2015 წლის პირველი იანვრიდან 2,5-ჯერ, 150-200 ლარიდან 700-800 ლარამდე გაიზარდა". თუმცა, ჩვენი გამოთვლით, 2,5-ჯერ 200 ვერანაირად ვერ აღემატება 500 ლარს.
აღსანიშნავია, რომ აღნიშნული განცხადება მინისტრმა გუშინ, კვლევებისა და ინოვაციების საბჭოს პირველი სხდომის დასრულების შემდეგ გააკეთა და დღეს, ცნობილ მეცნიერებთან ერთად გამართულ პრესკონფერენციაზეც გაიმეორა.
პრემიერ-მინისტრ ირაკლი ღარიბაშვილის განცხადებით კი, "მეცნიერთა ხელფასები 250 პროცენტით გაიზარდა". ამ შემთხვევაში კი, მეცნიერების ხელფასი ნამდვილად გამოდის 600-დან 800 ლარამდე.
"გურია ნიუსი" დაინტერესდა, რეალურად რამდენი ლარით განისაზღვრა მეცნიერთა ხელფასები. ამ კითხვით განათლების სამინისტროს პრესსამსახურს დავუკავშირდით. თუმცა, აღნიშნულზე პასუხი მაინც ვერ მივიღეთ.
პრესსამსახურმა მხოლოდ პრემიერის მიერ ნათქვამი სიტყვები გაიმეორა და ამის სქემაც მოგვაწოდა.
ამავე კითხვით მივმართეთ საქართველოს მეცნიერებათა აკადემიასაც, მაგრამ ზუსტი ინფორმაცია არც მათ აქვთ.
მეცნიერებათა აკადემიის საზოგადოებასთან ურთიერთობის სამსახურის უფროსმა ნათია ვადაჭკორიამ "გურია ნიუსს" განუცხადა, რომ დაქსაქსულ და სხვადასხვა უნივერსიტეტებთან შეხიზნულ სამეცნიერო დაწესებულებებში მომუშავე მეცნიერ-თანამშრომლებს ძალიან დაბალი ხელფასები ჰქონდათ. დაახლოებით, 200 ლარამდე, რომელიც იბეგრებოდა კიდეც.
"მათი ხელფასების მომატებისთვის ვიბრძოდით. განათლების სამინისტრო გვიმტკიცებდა, რომ მეცნიერი თუ მაღალი ხარისხის სპეციალისტია, შეეძლო დაფინანსება სხვადასხვა ფონდებიდან დამოუკიდებლად მოეპოვებინა და მატერიალურად უზრუნველყოფილი იქნებოდა.
თუმცა, ეს გრანტი ერთჯერადი მოვლენაა, რითაც კონკრეტულად პროექტი ფინანსდება, ანუ მასზე მომუშავე რამდენიმეკაციანი ჯგუფი და არა დაწესებულება. მთელი გასული წლის განმავლობაში ვიბრძოდით, რომ სამეცნიერო დაწესებულებების თანამშრომლებს ხელფასები მომატებოდათ. სწორედ ეს დაწესებულებები იმყოფებიან ყველაზე სავალალო პირობებში, რომელთაც იურიდიული სტატუსიც აღარ გააჩნიათ და სხვადასხვა უნივერსიტეტების შენობებში არიან შეხიზნულები," _ უთხრა "გურია ნიუსს" ვადაჭკორიამ.
