მარტვილის მუნიციპალიტეტის ა(ა)იპ მარტვილის მუნიციპალიტეტის კომპლექსური სასპორტო სკოლის 2015 წლის ბიუჯეტი 150 840 ლარითაა განსაზღვრული. აქ ჯამში 39 თანამშრომელი ირიცხება (საიდანაცორ ადგილი ვაკანტურია) და ამათგან 21 მწვრთნელია, რომლებიც 12 სახეობის 20 სპორტულ სექციას ხელმძღვანელობენ.
მწვრთნელებისთვის გამოყოფილი თანხა (ხელფასი) ჯამში, 6 140 ლარს შეადგენს. ისინი 250-მდე ბავშვს ემსახურებიან.
სასპორტო სკოლაში შემდეგი სახის სპორტული სექციებია: 2 მძლეოსნობის, რომლის მწვრთნელებიც არიან ბექა დანელია (ანაზღაურება 350 ლარი) და დავით რურუა (ანაზღაურება 250 ლარი); ერთი ძიუდოს სექცია, სადაც მწვრთნელის ანაზღაურება 450 ლარია; 3 ჭადრაკის სექცია, რომლის მწვრთნელებიც არიან ლია წოწონავა (ანაზღაურება 270 ლარი), მამუკა სულავა (ანაზღაურება 270 ლარი), რეზო კოკაია (ანაზღაურება 270 ლარი); ერთი რაგბის სექციაა, რომელსაც შოთა კუპრავა ხელმძღვანელობს და მისი ანაზღაურება 350 ლარია; ასევე ერთი სექციაა ლელო-სი, რომელსაც თანაზ დანელია ხელმძღვანელობს და მისი ანაზღაურება 260 ლარით განისაზღვრება; უშუ – მწვრთნელი დათა წულაია, ანაზღაურება 450 ლარი; ბერძნულ რომალური ჭიდაობის მწვრთნელი მილერ კუპრავაა და მისი ანაზღაურებაა 280 ლარი.
მარტვილის სასპორტო სკოლაში სულ 3 სახეობის ტაეკვანდოს სექციაა, რომლის მწვრთნელებიც არიან – ირაკლი წულაია (ანაზღაურება 350 ლარი); ანზორ ბახია (ანაზღაურება 280 ლარი); კობა ადამია (ანაზღაურება 280 ლარი).
აქ კიკბოქსინგის 2 სექციაა. მწვრთნელები – იოსებ დანელია (ანაზღაურება 260 ლარი) და გიგა კაკულია (ანაზღაურება 240 ლარი).
ტანვარჯიშის ერთ სექციას მარინე მნათობიშვილი ხელმძღვანელობს და მისი ყოველთვიური ანაზღაურება 270 ლარს შეადგენს.
სასპორტო სკოლაში კრივის 2 სექციაა, საიდანაც ერთი სექციის მწვრთნელის ადგილი ანაზღაურებით 260 ლარი ვაკანტურია, ხოლო მეორეს გოგიტა ძარია ხელმძღვანელობს და მისი ხელფასი 300 ლარით განისაზღვრება.
რაც შეეხება ფრენბურთის 2 სექციას, მას იროდი ბასილაია (ანაზღაურება 280 ლარი) და როლანდ კეკელია (ანაზღაურება 210 ლარი) ხელმძღვანელობენ.
აქვს თუ არა რაიონს ყველა ზემოთ ჩამოთვლილი სპორტული წრისთვის საჭირო რეკვიზიტი/სტადიონი/დარბაზი/?
როგორც მარტვილის სასპორტო სკოლის მწვრთნელთა განყოფილების უფროსი გოჩა ლაშხია ამბობს, ზოგიერთი სექციის მეცადინეობები თვითონ სასპორტო სკოლის 2 დარბაზში, ხოლო სხვების, რაიონში მდებარე საჯარო სკოლების დარბაზებში მიმდინარეობს მუნიციპალიტეტის გამგეობასთან შეთანხმებით და მათთან ხელშეკრულებები აქვთ გაფორმებული.
თუმცა, აღსანიშნავია, რომ მარტვილის მუნიციპალიტეტის ცენტრში მდებარე 2 საჯარო სკოლის დირექტორი, სასპორტო სკოლის მხრიდან მათთან დადებულ რაიმე სახის ხელშეკრულების არსებობას უარყოფს.
როგორც პირველი საჯარო სკოლის დირექტორმა მალხაზ კვესელავამ "გურია ნიუსს" განუცხადა, მას უბრალოდ სთხოვეს, რომ სასწავლო საათების შემდგომ, სკოლის ტერიტორიაზე არსებული მოედნით ისარგებლებდნენ, რაზეც დასთანხმდა. თუმცა, ამისთვის რაიმე სახის ხელშეკრულება არ გაფრომებულა.
"არანაირი ხელშეკრულება არ გაგვიფორმებია. ისე სარგებლობენ ზოგჯერ. ამით ჩვენი მინდორი არ იტვირთება, რადაგან პრინციპში არც გვაქვს შესაბამისი სტადიონი, არ ვარგა, მწყობრში არაა."
მნიშვნელოვანია ის ფაქტიც, რომ მარტვილის სასპორტო სკოლის მწვრთნელთა განყოფილების უფროს გოჩა ლაშხიას თქმით, ლელოს სავარჯიშოდ რაიონის პირველ საჯარო სკოლის სტადიონს იყენებენ (ასევე ლელოსთვის სოფ. ნაგებერაოსა და ლეხაინდრაოს სკოლის ტერიტორიას), თუმცა როგორც სკოლის დირექტორი ამბობს, სკოლის ტერიტორიას რაგბის სპორტული სექციისთვის იყენებენ.
რაგბი მარტვილის სასპორტო სკოლის ის სექციაა, რომელზეც მწვრთნელთა განყოფილების უფროსი "გურია ნიუსთან" ამბობს, რომ ჯერ მეცადინეობები არ დაწყებულა, რადგან ჯგუფი არაა დაკომპლექტებული. ჩვენს კითხვაზე კი ჯგუფის ჩამოყალიბების შემთხვევაში, სად გაიმართება მეცადინეობები, ამბობს, რომ ჯერჯერობით ეს განსაზღვრული არაა.
რაც შეეხება ფრენბურთისთვის საჭირო რეკვიზიტებს, სასპორტო სკოლის მწვრთნელთა განყოფილების უფროსის თქმით, ეს მათ კომპეტენციაში არ შედის და საფეხბურთო სკოლის დაქვემდებარებაშია.
ჩვენ დავუკავშირდით, მარტვილის მუნიციპალიტეტის საფეხბურთო სკოლის ხელმძღვანელ ჯესი სურმავას, რომელიც აღნიშნულს უარყოფს და ამბობს, რომ მის დაქვემდებარებაში მხოლოდ ფეხბურთია.
"ჩემთან მხოლოდ ფეხბურთი შემოდის. შარშან იყო ერთი შემთხვევა, როცა ქვიშის ფრენბურთის ღონისძიება გავაკეთე, მაგრამ ეს იყო დამოუკიდებლად. ცალკე მაქვს არასამთავრობო ორგნიზაცია, საიდანაც სპორტის სამინისტროსგან მივიღე გრანტი და მოვაწყვე ეს ღონისძიება", _ აღნიშნავს "გურია ნიუსთან" სურმავა.
აღსანიშნავია ისიც, რომ "გურია ნიუსის" მიერ მოპოვებული ინფორმაციით, იმ 2 დარბაზში, რომელიც რაიონის სასპორტო სკოლაშია განთავსებული, ვარჯიშებისთვის საჭირო რეკვიზიტები მხოლოდ 2-3 მსხლით (გრუშა), ერთი ჭიდაობისთვის განკუთვნილი ხალიჩითა და რამდენიმე ხელთათმანით შემოიფარგლება.
მარტვილის მუნიციპალიტეტის ა(ა)იპ მარტვილის მუნიციპალიტეტის კომპლექსური სასპორტო სკოლის დირექტორი დავით სურმავაა, რომელიც მანამ მარტვილის მუნიციპალიტეტის გამგებლის წარმომადგენლებთან კოორდინაციის განყოფილებას ხელმძღვანელობდა.
