გთხოვთ, მირჩიოთ, როგორ მოვიქცე, რომ ბუშმალა ჩემს ეზოშიც მსხმოიარე გახდეს? მიწის განოყიერებაც არაერთხელ ვცადე, რა არ ვიღონე, მაგრამ შედეგი ვერ მივიღე.
ეთერ ვაშაყმაძე. ოზურგეთი, სოფელი ლიხაური
ბუშმალა დეკორატიული მცენარეა, უგემრიელესი ნაყოფით. სამწუხაროდ, აქ ნიადაგი არაფერ შუაშია. სრულიად მოსალოდნელია, რომ ერთ სოფელში, სადაც მაღლობი და დაბლობი ერთმანეთს ენაცვლება, ერთგან მოისხას, მეორეგან _ არა. საქმე იმაშია, რომ ბუშმალა ნოემბერსა და დეკემბერში ყვავილობს. დაბლობში ამ დროს უმეტესად ცივა და ყინავს. ყვავილიც ადვილად იყინება და ყოველ გაზაფხულზე მხოლოდ ცარიელი ხე რჩება, ლამაზი ფოთლებით.
მეც არაერთხელ ვცადე სოფელ გურიანთაში ბუშმალის მოშენება, თუმცა, დაბლობზე ვცხოვრობ და არ მოისხა. მისი ყვავილი ცივ ტემპერატურას ვერ უძლებს. სასურველია, არ მოჭრათ, რადგან ის ძალიან ლამაზი მარადმწვანე დეკორატიული მცენარეა და კარმიდამოს ამშვენებს.
აკაკი ღლონტი, სწავლული აგრონომი
