ბოლო დროს, ჩაის რეკულტივაციასთან დაკავშირებით, ლანჩხუთში აქტიურად დაიწყო საუბარი. მეჩაიეობის დარგში არსებულ პრობლემებთან დაკავშირებით არა ერთი შეხვედრა თუ ფორუმი იმართება, რომელშიც მონაწილეობას ლანჩხუთის მუნიციპალიტეტის წარმომადგენლებიც იღებენ.
სოფლის მეურნეობის სამინისტროს ინფორმაციის მიხედვით იკვეთება, რომ 9 000 ჰექტარის ჩაის ფართობის გაკულტურებაა შესაძლებელი, დღესდღეობით კი ნედლეულს მხოლოდ 1970 ჰექტარი იძლევა. კოოპერატივების ასოციაციის ინფორმაციაზე დაყრდნობით, ოფიციალურად ქვეყანაში 27 ჩაის კოოპერატივია დარეგისტრირებული, ოთხი ფართომასშტაბიანი და რამდენიმეც მცირე და საშუალო მასშტაბების მქონე ჩაის გადამამუშავებელი ფაბრიკები.
ზემონახსენები შეხვედრებიდან გაირკვა, რომ სოფლის მეურნეობის სამინისტროს აქტიურად აქვს განზრახული ხელი შეუწყოს ქვეყანაში ჩაის კულტურის აღორძინებას და საამისოდ შემუშავებული აქვს სპეციალურ სტრატეგია და ხუთწლიანი სამოქმედო გეგმა. გეგმის მიხედვით, პირველ ეტაპზე უნდა მოხდეს ჩაის პლანტაციების აღწერა, რეაბილიტაცია და ა.შ. შემდეგ უკვე მცირე საწარმოების ჩამოყალიბება და მისი განვითარებისთვის ხელშეწყობა. ასევე, გეგმაშია ჩინეთიდან ახალი ნერგების შემოტანა და ზოგადად ამ ქვეყანასთან ამ კუთხით მჭიდრო თანამშრომლობა.
ლანჩხუთის მუნიციპალიტეტის ა(ა)იპ „საგარეო-ეკონომიკური კავშირურთიერთობების, ინვესტიციების, ტრანსპორტის, ტურიზმისა და მეწარმეობის განვითარების" ცენტრის ხელმძღვანელის გელა ზოიძის ინფორმაციით, მუნიციპალიტეტში უკვე მიმდინარეობს ჩაის ფართობების ინვენტარიზაცია: "ლანჩხუთში უკვე დაწყებულია ინვენტარიზაცია, როგორც კერძო მფლობელობაში არსებული, ასევე, სახელმწიფოს კუთვნილ ჩაის პლანტაციებში. რეკულტივაციის სამუშაოები კი სექტემბრიდან დაიწყება და პირველ ეტაპზე, მუნიციპალიტეტში 500 ჰა ჩაის ფართობი გაკულტურდება", _ ამბობს ზოიძე.
თავის მხრივ, სახელმწიფოსგან წამოსულ ინიციატივას ჩაის მრეწველობის აღდგენასთან დაკავშირებით, დადებით შეფასებას აძლევს ლანჩხუთის მოსახლეობაც, თუმცა, იმედს გამოთქვამს, რომ ყველაფერი მხოლოდ ფურცელზე არ დარჩება და სიტყვას რეალური შედეგი მოჰყვება.
