ანასეულის მოსახლეობა უწყლობის გამო გზის გადაკეტვით იმუქრება

ქალაქ ოზურგეთის მუნიციპალიტეტის დაბა ანასეულის მოსახლეობა უწყლობას აპროტესტებს. აქ მცხოვრებლები ხელისუფლებას უყურადღებობაში ადანაშაულებენ:

ანასეულში,   მეცნიერების ქუჩის # 22 მრავალ ბინიანი კორპუსების მცხოვრებლები  ნონა ჯაყელი, ელისო ფაშტიანი, ნანი ნაკაშიძე, ნანა სალუქვაძე  "გურია ნიუსს" დაუკავშირდნენ და დახმარება სთხოვეს:

"უკიდურესობამდე ვართ მისულები.  გაუსაძლისია ჩვენი ყოველდღიურობა უწყლობის გამო. პატრონი არავინაა,   არც ამბის მკითხველი, არც აინტერესებს ვინმეს, რა მდგომარეობაშია ჩვენი ოჯახები წყლის გაერშე. არჩევნებზე ხომ დარბიან ხმა მოგვეცითო? ახლა ვითხოვთ დახმარებას, წყალი გვინდა!"–აცხადებდნენ ისინი.

როგორც დაბა ანასეულის  მრავალბინიანი კორპუსის  მაცხოვრებლები  ამბობენ, უკვე თვენახევარია წყალი არ  მიეწოდებათ. მათივე თქმით,  აქ ცხოვრებენ მოხუცები, პატარები, ინვალიდი ბავშვები, რომელთა ოჯახის წევრები ხელით, ვედროებით ეზიდებიან მეორე, მესამე და მეოთხე სართულებზე სასმელ და   საყოფაცხოვრებო მოხმარებისთვის  საჭირო წყალს.

"საყვავილე მეურნეობა, წვენების ქარხანა, – აი სად წყდება ჩვენი წყალი, რატომ უნდა ხდებოდეს მოსახლეობის ხარჯზე ეს, არავინ გამკთხავი და პატრონი არაა, დაშრა წყალი სათავეზეო, ესაა მათი პასუხი.

ამ მრავალბინიან საცხოვრებელში მეოთხე, მესამე სართულზე რამდენი ვედრო წყალი უნდა აიტანო? გვიშველეთ, დაგვეხმარეთ!

უკვე იმ ზომამდე მივედით,  გზას გადავკეტავთ –თქო ვიფიქრეთ. დავიხრჩვით, ასჯერ მივმართეთ ხელისუფლებას დახამრებისთვის,  მაგრამ პატრონი არაა, არც გამკითხავია ვინმე!"– წუხს მოსახლეობა.

"ინვალიდი ბავშვი მყავს სახლში ერთი, მეორე მცირეწლოვანი. რომ წავედი წყლის მოსაზიდად, ბავშვი ლოგინიდან გადმოვარდნილი დამხვდა. გაუსაძლისია ჩვენი ყოფა.  არაფერს არ ვითხოვ, არც სხვა დახმარებას, უბრალოდ წყალი გვინდა!"–ამბობს ნანი ნაკაშიძე.

"ზოგი მანქანით ეზიდება ნარუჯიდან, ქალაქიდან, ჩვენ არ გვაქვს მაგის საშუალება, რომ მანქანით მოვზიდოთ, რა გავაკეთოთ? პატრონი არ ყავს ამ ოზურგეთს"–ამბობდნენ შეკრებილები.

ქალაქ ოზურგეთის მუნიციპალიტეტის მერიის პოზიცია აღნიშნულთან დაკავშირებით ასეთია:

"ანასეულის მოსახლეობას ტექნიკური წყალი სოფელ ლიხაურიდან  თვითდინებით, 1975 წლიდან მიეწოდება. წელს ქალაქ ოზურგეთის მუნიციპალიტეტის მერიამ ყველა დაზიანებული მილის კაპიტალური რებილიტაცია მოახდინა და მოსახლეობისთვის წყლის მიწოდების გრაფიკიც გაიზარდა. მაგრამ წყლის აღნიშნული სისტემით ლიხაურისა და სხვა მიმდებარე სოფლების მოსახლეობაც სარგებლობს, რაც წყლის დებეტს ამცირებს.

ამას ემატება გვალვა, რომელმაც რესურსი მნიშვნელოვნად შეამცირა. ქალაქის მერმა, ბეგლარ სიორიძემ ანასეულის და ექადიის მოსახლეობის ნაწილის სასმელი წყლით უზრუნველყოფის საკითხი პრემიერთან, ირაკლი ღარიბაშვილთან შეხვედრაზე უკვე დააყენა. სავარაუდოდ, აღნიშნული საკითხი 2016 წელს გადაწყდება."