საპარლამენტო უმრავლესობის ერთ-ერთი წევრის, გოგი თოფაძის მიერ რამდენიმე დღის წინ გაკეთებულ განცხადებამ, რომ იოსებ სტალინის სურათი ყველა კაბინეტში დაიკიდება, საზოგადოებაში აზრთა სხვადასხვაობა გამოიწვია.
პარლამენტარები ზვიად კვაჭანტირაძე, თამაზ მეჭიაური და თემურ ჭკუასელი აღნიშნულთან დაკავშირებით ამბობენ, რომ თოფაძის მიერ გაკეთებულ ამ განცხადებაში საგანგაშოს ვერაფერს ხედავენ:
თემურ ჭკუასელი ამბობს, რომ მას კერპები არ ჰყავს და არც არავის სურათს იკიდებს თავის სამუშო ოთახში:
“ცხოვრებაში მსგავსი რამ არ გამიკეთებია, ახალგაზრდობაში ჰემინგუეის სურათი მეკიდა, გოგი არის პოლიტიკოსი და პარლამენტარი, ის რომ პოლიტიკოსი არ იყოს საერთოდ არ მივაქცევდით მის ნათქვამს ყურადღებას, იმიტომ, რომ მასეთი ადამიანები საქართველოში ბევრი არიან, რომლებსაც სტალინთან თავისი დამოკიდებულება აქვს, მე ამაში ტრაგედიას ვერ ვხედავ, სტალინის კი არა და სააკაშვილის მიმდევრები არიან და ეგ უფრო მაოცებს, ეს იმიტომ გახდა ამდენი სალაპარაკო რომ ის პოლიტიკოსია და როგორც პოლიტიკოსს უზარმაზარი პატივისცემა მაქვს მისი, ეს იცის თვითონაც, მაგრამ ალბათ ცოტა უფრო მეტი უნად დაფიქრდეს, როცა ასეთ რამეს ამბობს“_ ამბობს ჭკუასელი
ზვიად კვაჭანტირაძე “გურია ნიუსთან“ ამბობს, რომ ყველაზე გენიალური განცხადება ამ მოვლენებთან დაკავშირებით მისმა კოლეგამ ირაკლი სესიაშვილმა გააკეთა:
“მერვე კლასში ვიყავი, როცა რეიგანის სურათი ჩამოვკიდე ჩემს ოთახში, ამას მიემატა ტეტჩერის სურათი, უკვე სტუდენტი ვიყავი, ამის შემდეგ არავის სურათი არ ჩამომიკიდია, ოქტომბრელიც ვიყავი, პიონერიც, კომკავშირელიც, მაგრამ არასდროს არც ლენინის და არც სტალინის სურათი არ მქონია, რაც შეეხება გოგის მიერ გაკეთებულ განცხადებას, ეს ადამიანები, რომლებიც ასეთ განცხადებას აკეთებენ, პიროვნულად არიან არაჩვეულებრივი ადამიანები, ეს იგივეა, იმის გამო, რომ ბაბუაჩემსაც უყვარდა სტალინი, ამიტომ ბაბუაჩემი მოვიხსენიო ცუდად? მე ვფიქრობ, რომ ყველაზე გენიალური განცხადება ამ მოვლენებთან დაკავშირებით ჩემმა მეგობარმა ირაკლი სესიაშვილმა გააკეთა, რომ მაშინ როდესაც ამდენი მიშისტი ზის პარლამენტში ერთი სტალინისტიც რომ იჯდეს უბედურება არ არისო“, _ აღნიშნა კვაჭანტირაძემ.
თამაზ მეჭიაური კი ამბობს, რომ ის მის ოთახში მხოლოდ პატრიარქის ფოტოს დაკიდებს:
“მე ჩემს ოთახში პატრიარქის ფოტოს დავკიდებდი, ადამიანს აქვს უფლება, ვის ფოტოც უნდა ის დაკიდოს, ყოველშემთხვევაში ბატონი გოგი წესიერი კაცია“, _ აცხადებს მეჭიაური.
