ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურში ახალი კადრი სოფიკო ორაგველიძე მიიღეს, რომელიც პროფესიით უცხო ენის სპეციალისტია.
ორაგველიძე "ქართული ოცნების" ერთ-ერთი აქტივისტია და 19 ოქტომბერს "ერთიანი ნაციონალური მოძრაობის" პარტიის ოფისთან გამართულ აქციაში აქტიურად მონაწილეობდა. იგი პირველად გამგეობაში 2012 წლის საპარლამენტო არჩევნების შემდეგ დასაქმდა ახალგაზრდულ საქმეთა განყოფილებაში მთავარი სპეციალისტის თანამდებობაზე, თუმცა საჯარო მოხელეთა კონკურსის ჩატარების შემდეგ, მიუხედავად ზღვარის გადალახვისა, უმუშევარი დარჩა.
როგორც ირკვევა, ორაგველიძის დანიშვნას წინ არქიტექტორ გია ხოფერიას სამსახურიდან გათავისუფლება უძღოდა. ბატონი გია მუნიციპალიტეტში ერთ-ერთი კვალიფიციურ კადრადაა მიჩნეული, თუმცა მან საჯარო მოხელეთა ტესტირებისას მინიმალური ზღვარი ვერ გადალახა და ამ დრომდე მოვალეობის შემსრულებლად იყო დანიშნული.
სამსახურის უფროსმა ლევან ჩხაიძემ ჩვენთან საუბარში დაადასტურა გია ხოფერიას სამსახურიდან გაშვების ფაქტი.
"გია ხოფერია გათავისუფლებულია. სამსახურში მოხდა შიდა გადანაცვლება, პროფესიით არქიტექტორი ალეკო კირვალიძე გადავიყვანეთ გია ხოფერიას ადგილას, ხოლო სოფიკო ორაგველიძე დაინიშნა იმ თანამდებობაზე, სადაც არაა საჭირო სპეციფიური განათლება," -გვითხრა სამსახურის უფროსმა ლევან ჩხაიძემ.
კომენტარისთვის თავად სოფიკო ორაგველიძესთანაც ვცადეთ დაკავშირება, თუმცა მან ჩვენს სატელეფონო ზარს არ უპასუხა.
