2016 წელს წელს, ლანჩხუთში გასახორციელებელი სხვადასხვა სოციალური პროგრამების დასაფინანსებლად, ჯანდაცვის სფეროს დაფინანსების გამოკლებით, ადგილობრივი ბიუჯეტიდან 395 ათასი ლარის გახარჯვა იგეგმება, რაც მიმდინარე ბიუჯეტის, დაახლოებით, 11% მოიცავს.
სოციალურ პროგრამა მზრუნველობამოკლებულთა უფასო კვებით უზრუნველყოფად 77 ათას ლარს ითვალისწინებს. იგი მიზნად ისახავს უკიდურესად შეჭირვებული მოხუცებისა და შეზღუდული შესაძლებლობების მქონე პირთა დახმარებას. აღნიშნული პროგრამით ლანჩხუთში 60 ბენეფიციარი სარგებლობს.
"მრავალშვილიანი ოჯახების დახმარების" პროგრამის დასაფინანსებლად წელს 40 ათასი ლარია გამოყოფილი და პროგრამა მიზნად ისახავს მრავალშვილიანი ოჯახებისთვის ყოველთვიურად ფინანსურ დახმარებას. პროგრამის მიხედვით, ოჯახს, სადაც 16-დან 18 წლამდე ასაკის ოთხი და მეტი შვილია და მისი სარეიტინგო ქულა არ აღემატება 1000001-ს, თითოეულ ბავშვზე დახმარების სახით მიეცემა 25 ლარი. ამავე პროგრამის მიხედვით, დახმარებას მიიღებენ ის მრავალშვილიანი ოჯახებიც, რომელთაც ოთხი ან მეტი 18-წლამდე ასაკის შვილი ჰყავთ და მათი სარეიტინგო ქულა აღემატება 100001-ს.
მძიმე საცხოვრებელ პირობებში მყოფი ოჯახების დროებით თავშესაფრით უზრუნველსაყოფან მუნიციპალიტეტის სოციალური პროგრამა 45 ათას ლარს ითვალისწინებს. გამგეობა პროგრამით მოსარგებლე ოჯახს ქირის თანხით უზრუნველყოფს, თვეში არაუმეტეს 100 ლარისა.
სხვადასხვა ომსა და კონფლიქტში მონაწილე ვეტერანთა დასახმარებლად, შესაბამისი პროგრამის მიხედვით, ჯამში, 2016 წელს 50 ათასი ლარია გაწერილი. კერძოდ, გარდაცვლილი ომის მონაწილის ოჯახისთვის ერთჯერადი დახმარების გასაწევად 250 ლარია გათვალისწინებული. ცხრა მაისის თარიღთან დაკავშირებით, 200 ლარის ოდენობით ერთჯერად დახმარებას მიიღებენ მეორე მსოფლიო ომის მონაწილეები (სულ 19 პირი). ასევე, გიორგობის დღესასწაულთან დაკავშირებით, ერთჯერადად 100-100 ლარს მიიღებენ მეორე მსოფლიო ომის ვეტერანები და საქართველოს ტერიტორიული მთლიანობისთვის დაღუპული მეომრების ოჯახები (სულ 34 ბენეფიციარი). სოციალური პროგრამის მიხედვით, საქართველოს ტერიტორიული მთლიანობისთვის დაღუპული მეომრების ოჯახებისთვის, 27 სექტემბერსა (სოხუმის დაცემის დღესთან დაკავშირებით 14 ბენეფიციარი) და რვა აგვისტოს (აგვისტოს ომის სამი ბენეფიციარი) მუნიციპალიტეტის გამგეობა ერთჯერადად 200-ლარიან შემწეობას გასცემს. გარდა ამისა, ყოველთვიურად 50-ლარიანი დახმარება გაიცემა ტერიტორიული მთლიანობისთვის ომის შემდგომ გარდაცვლილი ვეტერანებისა და ამავე კატეგორიის ომში მონაწილე ვეტერანთა შეჭირვებული ოჯახებისთვის (სულ 55), სხვა სახელმწიფოთა ტერიტორიაზე საბრძოლო მოქმედებების ვეტერანების შეჭირვებული ოჯახებისთვის (ხუთი ბენეფიციარი), რომელთა სარეიტინგო ქულა არ აღემატება 120 000-ს და საქართელოს ტერიტორიული მთლიანობისთვის ბრძოლაში დაღუპული მეომრების ოჯახებისთვის. პირველი და მეორე ჯგუფის შეზღუდული შესაძლებლობების მქონე ვეტერანებზე, მუნიციპალიტეტის სოციალური პროგრამით მიხედვით, 100 ლარი გაიცემა. ლანჩხუთში სამი ვეტერანია და შესაბამისად, გასაცემი თანხის წლიური ჯამი 3 600 ლარს ითვალისწინებს. დედის დღესთან დაკავშირებით კი დაღუპული მეომრების დედებს მუნიციპალიტეტი 100 ლარით დაასაჩუქრებს (15 ვეტერანის დედა _ თანხა 3000 ლარი). ასევე, ომში დაღუპული მეომრების პატივის მისაგებად მუნიციპალიტეტის ადმინისტრაციულ ერთეულებში გასამართ ღონისძიებებთან დაკავშირებით, საჩუქრების გასაცემად გათვალისწინებულია 400 ლარი.
სოციალურ პროგრამაში აგრეთვე გათვალისწინებულია მუნიციპალიტეტის მაღალმთიანი სოფლებიდან მოსწავლეთა ტრანსპორტირების ხარჯებიც, ვინაიდან აღნიშნულ ტერიტორიაზე არ ფუნქციონირებს სამგზავრო ტრანსპორტი. ბიუჯეტში საამისოდ 5400 ლარია გათვალისწინებული.
ცენტრ "იავნანას" თანადაფინანსებისთვის პროგრამიდან 10 ათასი ლარია გამოყოფილი. აღნიშნული ცენტრის მიზანია სოციალურად დაუცველი ბავშვების ფსიქო-სოციალური რეაბილიტაციისთვის ხელისშეწყობა. ამჟამად ცენტრში 24 ასეთი ბავშვია აღრიცხული.
იძულებით გადაადგილებულ პირთა დახმარების პროგრამით მუნიციპალიტეტი დევნილთა ოჯახებზე საშეშე მერქნის შესაძენად ერთჯერადად გაცემს 200 ლარს. ოფიციალური მონაცემით, სულ 64 ასეთი ოჯახია ლანჩხუთში და შესაბამისად, ადგილობრივი ბიუჯეტი საამისოდ 12 800 ლარს გაიღებს.
ჰუმანიტარული ორგანიზაციების თანადაფინანსების, ეროვნული სკრინინგ ცენტრიდან და სამედიცინო დაწესებულებაში მოწვეული სპეციალისტის ბინის უზრუნველსაყოფად 8600 ლარია გათვალისწინებული.
მძიმე საცხოვრებელ პირობებში მყოფი ოჯახებისთვის ერთჯერადი დახმარების პროგრამა კი 100 ათასი ლარით ფინანსდება. 15 ათასი ლარია გამოყოფილი "გამარჯვებულ ქალთა კლუბის" სარეაბილიტაციო თანადაფინანსების პროგრამისთვის.
მუნიციპალიტეტის სოციალურ პაკეტში 2 000 ლარია ჩადებული "ლანჩხუთის მუნიციპალიტეტში მცხოვრები და რეგისტრირებული 100 და 100 წელს გადაცილებული ხანდაზმულების ერთჯერადად დახმარებისთვის.
