თუ Yahoo-ს მომხმარებელი ხართ, კომპანიას თქვენთვის ცუდი ამბავი აქვს. 2014 წელს ჰაკერებმა მისი 500 მილიონი მომხმარებლის ანგარიში გატეხეს. მათ შორის, შესაძლოა თქვენიც იყოს, _ აღნიშნულის შესახებ ინფორმაციას პერსონალურ მონაცემთა დაცვის ინსპექტორის აპარატი ავრცელებს.
მათი ცნობით, საუბარია მილიონობით პერსონალურ მონაცემზე მათ შორის: სახელებსა და გვარებზე, ელექტრონული ფოსტის მისამართებზე, ტელეფონის ნომრებზე, დაბადების თარიღებზე, პაროლებზე და უსაფრთხოების კითხვებზე – ყველა ეს მონაცემი კომპრომეტირებულია.
"პირველი, რაც უნდა გააკეთოთ, შეცვალოთ პაროლი და უსაფრთხოების კითხვები. თუმცა ეს მხოლოდ ერთი ნაბიჯია. კარგად გაიხსენეთ, ხომ არ გაქვთ დაყენებული იგივე პაროლი ან შეკითხვა სხვა ელექტრონულ ფოსტასა თუ სოციალურ ქსელში. თუ ასეა, შეცვალეთ ისინიც", _ აცხადებენ პერსონალურ მონაცემთა დაცვის ინსპექტორის აპარატში.
ექსპერტებმა უკვე შეაფასეს მომხდარი, როგორც ერთ-ერთი ყველაზე მასშტაბური შეტევა ინტერნეტ მომხმარებლების პირად ცხოვრებაზე:
„Yahoo-დან მოპარული მონაცემები კრიტიკული მნიშვნელობისაა, რადგან მხოლოდ ერთ სისტემას არ აზიანებს. საუბარია მომხმარებლების კავშირებზე ბანკებთან, სოციალური ქსელებთან და კიდევ სხვა ბევრ ისეთ ინფორმაციასთან, რომლის გამჟღავნებამაც, შესაძლოა, მათ და მათ ოჯახებს ზიანი მიაყენოს“, _ აცხადებენ ექსპერტები.
Yahoo-ს თვეში დაახლოებით 1 მილიარდი მომხმარებელი ჰყავს. ის ერთ-ერთი უძველესი კომპანიაა უფასო ელექტრონული ფოსტის ბაზარზე და ძალიან ბევრს ადამიანს საკუთარი ციფრული იდენტობა მის გარშემო აქვს აწყობილი.
ვის ინტერესებში იყო Yahoo-ს ანგარიშების გატეხვა? როგორც კომპანიის განცხადებაშია ნათქვამი, საუბარია „სახელმწიფო დაფინანსების მქონე აქტორზე.“ თუმცა რომელი სახელმწიფო შეიძლება იდგეს მომხდარის უკან დაკონკრეტებული არ არის.
პერსონალურ მონაცემთა დაცვის ინსპექტორის აპარატი გირჩევთ, ყურადღება მიაქციოთ უსაფრთხოების საკითხებს ინტერნეტში და ხშირად ცვალოთ პაროლი ელექტრონული ფოსტისა თუ სოციალური ქსელების ანგარიშებზე. თუ Yahoo-ს მომხმარებელი ხართ, ეს ამ პოსტის წაკითხვის დასრულებისთანავე გააკეთეთ!
