თელავში საკონსტიტუციო ცვლილებების საერთო-სახალხო განხილვა მიმდინარეობს. განხილვაზე საქართევლოს პარლამენტის თავმჯდომარე ირაკლი კობახიძე გამოვიდა სიტყვით. მისი თქმით, საკონსტიტუციო ცვლილებებით, საპარლამენტო უმცირესობას საგამოძიებო კომისიის შექმნის შესაძლებლობა ექნება, რაც აქამდე არ ჰქონდა. ”დღეს ეს უფლება მინიჭებული აქვს საპარლამენტო უმრავლესობას. ახალი რედაქციით, ეს საპარლამენტო უმცირესობის უფლება იქნება. საპარლამენტო უმცირესობას ექნება შესაძლებლობა თავისი გადაწყვეტილებით შექმნას საგამოძიებო კომისია. ეს დადებითად აისახება როგორც ოპოზიციის როლის გაძლიერებაზე, ისე პარლამენტის”, – განაცხადა კობახიძემ.
მისი თქმით, ამით საპარლამენტო ცხოვრებაში ოპოზიციის როლი იზრდება.
პარლამენტის თავმჯდომარემ საქართველოს კონსტიტუციაში ტერიტორიული მოწყობის ჩანაწერზე გააკეთა განცხადება. მისი თქმით, საქართველოს ტერიტორიული მთლიანობის აღდგენამდე, ქვეყნის ტერიტორიული მოწყობის საკითხი არ გადაისინჯება.
“ტერიტორიულ მოწყობასთან დაკავშირებით ის ძირითადი გზავნილი დავტოვეთ, რომელიც საქართველოს კონსტიტუციაში 1995 წელს ჩაიდო. გზავნილის მიხედვით, ვიდრე საქართველოს ტერიტორიული მთლიანობა არ აღდგება, მანამდე ქვეყნის ტერიტორიული მოწყობის საკითხი არ გადაისინჯება. მხოლოდ მას შემდეგ, რაც საშუალება გვექნება, აფხაზეთისა და ცხინვალის რეგიონის მოსახლეობასთან ერთად გადავწყვიტოთ ჩვენი ქვეყნის ტერიტორიული მოწყობის საკითხი, ეს კონსტიტუციის დონეზე მოწესრიგდება”, – განაცხადა ირაკლი კობახიძემ.
საკონსტიტუციო განხილვაში დღეს პრეზიდენტი არ მონაწილეობს. პრეზიდენტის ადმინისტრაციაში ვერ აკონკრეტებენ, გიორგი მარგველაშვილი დაესწრება თუ არა საერთო საყოველთაო განხილვის დარჩენილ შეხვედრებს, რომლებიც მცხეთაში, რუსთავსა და თბილისში გაიმართება.
პროექტის საჯარო განხილვა 5 მაისს დაიწყო. ცვლილებები სულ 11 ქალაქში უნდა წარადგინონ. ბოლო შეხვედრა 15 მაისს თბილისში გაიმართება. საკონსტიტუციო ცვლილებების პროექტი პარლამენტში 1 მაისს დარეგისტრირდა. პროექტს “ქართული ოცნების” 108 დეპუტატი აწერს ხელს. საკონსტიტუციო კომისიამ სამუშაო ვერსიის მუხლებს და ალტერნატიულ წინადადებებს მხარი 22 აპრილს დაუჭირა (43 მომხრე, 8 წინააღმდეგი).
