„მტყუანს შეს…ს შენზე ბანძმა“ _ ეკა ნინიძე „ნაციონალების“ ლიდერის ფეისბუქპოსტის გასაჩივრებას გეგმავს

ოზურგეთელი „ნაციონალების“ ლიდერის, დავით მჟავანაძის წინააღმდეგ განცხადების შეტანას, ოზურგეთის სკოლამდელი აღზრდის ცენტრის ყოფილი  დირექტორი,  ეკა ნინიძე ჯერ ოზურგეთის საკრებულოში აპირებს.

_ ჯერ მივმართავ ოზურგეთის მუნიციპალიტეტის საკრებულოს თავმჯდომარეს და  ეთიკის კომისიას, შემდეგ კი, თუ საჭირო გახდა, საქმეში ძალოვან  სტრუქტურებსაც ჩავრთავ. ახლა დასასვენებლად ვიმყოფები, ჯანმრთელობა ყველაფერზე მეტად მიღირს, უახლოეს პერიოდში კი, ოზურგეთში  დაბრუნებისთანავე  მჟავანაძის წინააღმდეგ  ვიმოქმედებ, _ თქვა „გურია ნიუსთან“ ეკა  ნინიძემ _ შეგიძლიათ, ნახოთ ჩემს ფეისბუქგვერდზე როგორი სტატუსი გააკეთა დავით მჟავანაძემ, ოზურგეთელი ნაციონალების ლიდერმა.

დღეს, 21-ე საუკუნეში, პოლიტიკოსმა ისე როგორ ვერ უნდა მოახერხოს ოპონირება ოპონენტთან, რომ შეურაცხყოფების კორიანტელი არ დააყენოს? აუცილებლად მივმართავ ოზურგეთის მუნიციპალიტეტის საკრებულოს თავმჯდომარეს და ეთიკის კომისიას წერილობითი განცხადებით. იმედია, იმსჯელებენ ეთიკის კომისიაში. თუ საჭირო იქნება,   ძალოვან სტრუქტურებსაც მივმართავ. მე საკრებულოს  წევრის, დავით  მჟავანაძის მიმართ მაქვს კითხვა: ასე მიმართავს ამომრჩევლებს და  საზოგადოებასთან ურთიერთობის ეს  გამოცდილება აქვს და ასე გაგრძელებას აპირებს?

ეკა  ნინიძემ განმარტა, რომ აღნიშნული სტატუსის გამოქვეყნების შემდგომ მალე მოუწია დასასვენებლად წასვლა, რასაც ვერ შეწყვეტდა „მჟავანაძის ყოვლად შეურაცხმყოფელი სტატუსის გამო“, თუმცა, როგორც მან აღნიშნა,  დაბრუნებისთანავე გასცემს პასუხს.

„გურია  ნიუსი“  „ერთიანი ნაციონალური მოძრაობის“,  ოზურგეთის რაიონული ორგანიზაციის თავმჯდომარეს, დავით მჟავანაძეს ესაუბრა.

_ თუ ეკა ნინიძე თავს შეურაცხყოფილად გრძნობს, შეუძლია მიბრძანდეს სასამართლოში. მე გავაკეთე  ისეთი კომენტარი, რის დაწერაც მივიჩნიე  საჭიროდ. სხვა სერიოზულ კომენტარს მე ეკა ნინიძის არასერიოზულ და არაადეკვატურ გამოსვლებზე ვერ გავაკეთებ.

_ რატომ მიიჩნევთ არასერიოზულად და ერთ კონკრეტულ მაგალითს თუ დაასახელებდით, როგორც თქვენ, ამბობთ, ამ არაადეკვატურობის ან არასერიოზულობის გამომხატველს?

_ მაგისთვის დროს ვერ დავკარგავ. თუ საჭიროდ თვლის, მიმართოს სასამართლოს, _ გვითხრა მჟავანაძემ.

ფეისბუკსტატუსი, რამაც ეკა ნინიძის და დავით მჟავანაძის დაპირისპირება გამოიწვია, ასეთი შინაარსისაა:

ეკა  ნინიძე (საკუთარ გვერდზე წერს) : „მოშიმშილე ენმ-ს ადგილობრივი ორგანიზაციის ლიდერს ბოდვითი აშლილობა დაეწყო,  ლეიბის ქვეშ თაგვივით ხურხნის  ფონზე. ისემც მაგას რა ვუთხრა, ნაშიმშილარი ეგ არ იყოს.

ციც, დათული, გაგიგეს და  მიგიხვდნენ!!! რამდენი გადაგიხადა  ნიკანორმა, თქვი ბარემ? იმას  გაუყავი?  პროვოკაციების მამას?  მედროშეს?

დავით მჟავანაძე კი იქვე ასე პასუხობს: „მტყუანს შეს…ს შენზე ბანძმა, დღეში სამჯერ, ნუ, შაბათ-კვირის გამოკლებით“.

შეგახსენებთ, რომ ივნისში,   ოზურგეთის  საკრებულოში ნაციონალი დეპუტატის, ბესო ქათამაძის ცემის ფაქტს, ოზურგეთში აქციები მოჰყვა, შემდეგ კი „ნაციონალმა“ დეპუტატებმა ოზურგეთის საკრებულოში შიმშილობის  აქცია გამართეს,  საკრებულოს სხდომის მოწვევის  და დამნაშავეების დასჯის მოთხოვნით. ამ ფაქტს დიდი გამოხმაურება  მოჰყვა  სოციალურ  ქსელში.  მჟავანაძის და ნინიძის   დაპირისპირებაც ამ ამბების პარალელურად  მოხდა.