წლებია, რაც ლანჩხუთში, ქალაქის ცენტრში, ყოფილ სასტუმროსა და ხუთსართულიან საცხოვრებელ სახლს შორის მდებარე ტერიტორიაზე სრული ქაოსი სუფევს, რაც აქ არსებული სხვადასხვა სავაჭრო ობიექტის მეპატრონეების უკმაყოფილებას იწვევს.
აქ შექმნილი მდგომარეობის გამო, “გურია ნიუსს” დახმარების თხოვნით ყოფილი სასტუმროს შენობის პირველ სართულზე განთავსებული კომერციული ფართის მფლობელებმა მომართეს, რომლებიც ადგილობრივი ხელისუფლებისგან გარემოვაჭრეთა საკითხის დროულ მოგვარებას ითხოვენ.
“ათასობით ლარი შეაქვს თითოეულ ჩვენგანს ბიუჯეტში და გამოდის, რომ ჩვენი უფლება მცირედითაც არაა დაცული. არ ვამბობთ, რომ უკეთესები ვართ გარემოვაჭრეებზე და მათთან შედარებით პრივილეგირებულ მდგომარეობაში უნდა ვიყოთ, მაგრამ არც ისე შეიძლება, რომ ჩვენი უგულებელყოფის ხარჯზე ისინი იყვნენ მომგებიან მდგომარეობაში.
როცა ამხელა გადასახადებს ვიხდით, თანაბარი უფლებები და პირობები მაინც ხომ უნდა გვქონდეს?! გამოუყონ ამ ადამიანებს სადმე ადგილი, რომ მათაც ივაჭრონ და ჩვენც არ შეგვეშალოს ხელი გამართულად მუშაობაში.
არ უნდა დიდი დაკვირვება და ანალიზი _ კარგად ჩანს, რაც ხდება გარშემო და რა მდგომარეობაცაა აქ. მთლიანად ჩახერგილია აქაურობა ტომრებითა და გაფუჭებული მანქანებით, რის გამოც მომხმარებელს არ აქვს საშუალება, ჩვენამდე მოვიდეს. ზოგ მოვაჭრეს დღე და ღამე აქ უდგას მანქანა, ვითომ გაფუჭებულია. ბევრმა, ვისაც აქ ფართი ჰქონდა დაქირავებული, დაკეტა ობიექტი და წავიდა _ რა უნდა ექნა, ვერ იმუშავა. ცემენტს რომ ყიდი მაღაზიაში, ხომ უნდა იყოს იმის საშუალება, რომ მომხმარებელმა მანქანის მოყვანა შეძლოს და შიგ ტვირთის ჩადოს?! აბა, ხელით ხომ ვერ ათრევს ტომრებს?! ამიტომაც იძულებული გახდა, დაეკეტა ობიექტი. თუ ასე გაგრძელდა და დროულად არ მოგვარდა ეს პრობლემა, მოგვიწევს ჩვენც დავკეტოთ ჩვენი მაღაზიები. თუ ვაჭრობის საშუალება არ მოგვეცა, ტყუილად რა გვინდა აქ?! გადასახადების გარდა, ნაწილს ფართის ქირაც გვაქვს გასასტუმრებელი და აბა, როგორ? მანქანით კი არა, ფეხით მოსვლასაც ვერ ახერხებენ ჩვენამდე”, _ ამბობენ სავაჭრო ობიექტების მეპატრონეები.
ამ ტერიტორიაზე შექმნილი ქაოსური მდგომარეობის გამო უკმაყოფილებას, გარდა სავაჭრო ობიექტების მეპატრონეებისა, მიმდებარე მრავალბინიანი საცხოვრებელი სახლის მობინადრეები და ამ ტერიტორიით მოსარგებლე რიგითი ლანჩხუთელებიც გამოთქვამენ.
“აქაურობა მაღალი რისკის ზონაა და უნდა ვილოცოთ, რომ რამე გაუთვალისწინებელი არ მოხდეს, რადგან ბავშვებთან გვაქვს საქმე. წლებია უკვე, აუტანელი მდგომარეობაა ამ ტერიტორიაზე _ გარემოვაჭრეებით, სამარშრუტო ტაქსებით, კერძო მფლობელობაში მყოფი ავტომობილებითაა გადატვირთული აქაურობა. ლამის კიბეებზე ამოვიდნენ. სხვაგან რომ ვერ ნახეს ადგილი, ჩვენ ეზოში აჩერებენ მანქანებს. გვიჭირს ბავშვების ეზოში თავისუფლად გამოშვება. თან აქვე, საცურაო აუზთან მოზარდებისთვის ტრენაჟორებიცაა დამონტაჟებული და სანამ რამე უბედურება მომხდარა, მანამდე უნდა ყურადღების მიქცევა აქაურობას. ბავშვებს კი არა, დიდებს გვიჭირს გზის გაკვლევა _ რომელი მანქანა საით მიდის, ვერ გაიგებ, თან ზოგიერთი მძღოლი მაინც ახერხებს მაღალი სიჩქარით აქ გავლას.
ეს პრობლემა, რაც შეიძლება დროულად მოსაგვარებელია, რომ ერთხელ და სამუდამოდ წესრიგი დამყარდეს, აქაურობა ანტისანიტარიის და ქაოსის ადგილი რომ არ იყოს. აყალმაყალი და ჩხუბიც არაა უცხო აქაურობისთვის, წინა პლანზე დგომისთვის ხშირად ჩხუბობენ ერთმანეთში გარემოვაჭრეები”, _ ამბობენ ქალაქის ცენტრალურ ნაწილში შექმნილი ქაოსური მდგომარეობით შეწუხებული ლანჩხუთელები.
ქალაქის ცენტრში, ყოფილ სასტუმროსა და ხუთსართულიან საცხოვრებელ სახლს შორის მდებარე ტერიტორიის განტვირთვა და აქაურობის კეთილმოწყობა რომ მოხდეს, როგორც ირკვევა, მერიას ალტერნატიული ფართიც შერჩეული აქვს და შესაბამისი პროექტიც თვეებია მზადაა. როგორც მერიაში ამბობენ, პროექტის გახორციელება მოკლე ხანში იგეგმება. ინფრასტრუქტურის სამსახურის უფროსის, ლევან ჩხაიძის თქმით, “სამუშაოების შესასრულებლად ტენდერი უკვე დასრულებულია და დაახლოებით, 10 დღეში დაიწყება აღნიშნული ტერიტორიის კეთილმოწყობა”.
